నా ఆటోబయోగ్రఫీ రాయనున్న యండమూరి వీరేంద్రనాథ్ - స్వయంగా వెల్లడించిన మెగాస్టార్ - Autobiography of Chiranjeevi

Autobiography of Chiranjeevi : మెగాస్టార్​ చిరంజీవి ఆటో బయోగ్రఫీని ప్రముఖ రచయిత యండమూరి వీరేంద్రనాథ్ రాయనున్నారు. దీనికి సంబంధించిన అనుమతిని ఆయనకు ఇస్తున్నట్టు చిరంజీవి ప్రకటించారు. విశాఖలో లోక్​నాయక్ ఫౌండేషన్ అవార్డుల ప్రదానం చేసిన వేదికపై చిరంజీవి ఈ విషయాన్ని వెల్లడించారు. చిరంజీవి మాట్లాడుతూ, ఎవరికి వారే రాసుకునేది ఆటో బయోగ్రఫీ అవుతుందని తెలిపారు. కానీ తనకు అంత సమయం లేదని, గతంలో ఒకసారి యండమూరి వీరేంద్రనాథ్ తన ఆటో బయోగ్రఫీ రాసేందుకు ఆసక్తి వ్యక్తం చేశారని చెప్పారు. అయితే ఆ విషయంపై ఇప్పుడు నిర్ణయం తీసుకున్నానని సభ వేదికగా చిరంజీవి వెల్లడించారు. 

ఎన్టీఆర్, హరివంశరాయ్​బచ్చన్​ల పుణ్యతిథి, ఏఎన్ఆర్ శతజయంతి సందర్భంగా విశాఖలో లోక్‌నాయక్‌ ఫౌండేషన్‌ ఆధ్వర్యంలో లోక్‌నాయక్‌ పురస్కారాల ప్రదానోత్సవం జరిగింది. ఈ కార్యక్రమానికి ముఖ్య అతిథులగా సినీనటుడు చిరంజీవి, ఏపీ హైకోర్టు న్యాయమూర్తి జస్టిస్‌ ఏవీ.శేషసాయిలు హాజరయ్యారు. అనంతరం పలువురికి అవార్డులు ప్రదానం చేశారు. ఈ ఏడాది ప్రముఖ రచయిత యండమూరి వీరేంద్రనాథ్‌ను లోక్‌నాయక్‌ సాహిత్య పురస్కారంతో పాటు రూ.2 లక్షల రూపాయల నగదుతో సత్కరించారు. అదేవిధంగా బెంగళూరు తెలుగు సమాఖ్య అధ్యక్షుడు రాధాకృష్ణంరాజు, ప్రఖ్యాత వైద్యులు డాక్టర్‌ ఇండ్ల రామసుబ్బారెడ్డి, కవి విల్సన్‌ సుధాకర్​ తుల్లుమిల్లినికి పురస్కారాలు లభించాయి. వీరికి చెరో రూ. 50 వేల చొప్పున నగదుతో పాటు లోక్‌నాయక్‌ పురస్కారాలతో సత్కరించారు. గత 19 ఏళ్లుగా లోక్‌నాయక్‌ ఫౌండేషన్‌ ఈ పురస్కారాలను అందిస్తోంది.