ఇకపై నో బెనిఫిట్ షోలు - టికెట్ల రేట్ల పెంపునకు అనుమతిచ్చేది లేదు: మంత్రి కోమటిరెడ్డి

ఇకనుంచి ఎలాంటి బెనిఫిట్ షోలు ఉండవని అసెంబ్లీలో స్పష్టం చేసిన మంత్రి కోమటిరెడ్డి - అలాగే టికెట్ల రేట్ల పెంపునకూ అనుమతి ఇచ్చేది లేదని వెల్లడి

TG Minister Komatireddy Venkat Reddy About Movie Benefit Shows :సినిమా బెనిఫిట్​ షోలకు సంబంధించి తెలంగాణ ప్రభుత్వం కీలక నిర్ణయం తీసుకుంది. సినిమా విడుదలకు ముందురోజు ఎలాంటి బెనిఫిట్ షోలు ఉండవని తెలంగాణ మంత్రి కోమటిరెడ్డి వెంకటరెడ్డి అసెంబ్లీలో స్పష్టం చేశారు. ఇకనుంచి టికెట్ల రేట్ల పెంపునకూ అనుమతి ఇచ్చేది లేదన్నారు. సంధ్య థియేటర్​ ఘటనలో మృతి చెందిన రేవతి కుటుంబానికి పరిహారమిస్తానన్న హామీని అల్లు అర్జున్​ నిలబెట్టుకోలేదన్నారు. ప్రతీక్​ ఫౌండేషన్‌ నుంచి రేవతి కుటుంబానికి రూ.25 లక్షలు ఇస్తామని తెలిపారు. శ్రీతేజ్‌ చికిత్స ఖర్చును ప్రభుత్వమే భరిస్తుందని మంత్రి కోమటిరెడ్డి వెల్లడించారు.

పుష్ప-2 బెనిఫిట్​ షో సందర్భంగాహైదరాబాద్​లోనిసంధ్య థియేటర్​ దగ్గర జరిగిన తొక్కిసలాటలో ఓ మహిళ మృతి చెందగా, బాలుడు కిమ్స్ ఆసుపత్రిలో చికిత్స పొందుతున్న విషయం తెలిసిందే. ఈ కేసులో చిక్కడపల్లి పోలీసులు సినీ హీరో అల్లు అర్జున్​ను అరెస్ట్ చేయగా హైకోర్టు ఈ నెల 27 వరకు మధ్యంతర బెయిల్​ ఇచ్చిన సంగతి తెలిసిందే. అయితే ప్రస్తుతం ఇదే ఘటనపై తెలంగాణ అసెంబ్లీలో వాడివేడి చర్చలు జరిగాయి. చర్చ సందర్భంగా సంధ్య థియేటర్​ ఘటనపై సీఎం రేవంత్​ రెడ్డి అసెంబ్లీలో కీలక వ్యాఖ్యలు చేశారు.

'సినిమాలు తీసుకోండి, వ్యాపారం చేసుకోండి, డబ్బులు సంపాదించుకోండి, ప్రభుత్వం నుంచి రాయితీలు, ప్రోత్సాహకాలు తీసుకోండి, షూటింగ్​కు సంబంధించి ప్రత్యేక అనుమతులు కూడా తీసుకోండి కానీ ప్రజల ప్రాణాలు పోతుంటే మాత్రం ప్రభుత్వం చూస్తూ ఊరుకోదు" అని సినిమా ప్రముఖులకు సీఎం రేవంత్​ రెడ్డి హెచ్చరికలు పంపారు. తాను కుర్చీలో ఉన్నంత వరకు ఇలాంటి ఘటనలు ఉపేక్షించేది లేదని హెచ్చరించారు. ప్రజల ప్రాణాలు పోయే ఘటనలు జరిగితే ప్రత్యేక మినహాయింపులు ఉండవని తేల్చి చెప్పారు.

పోలీసులు వద్దన్నా వచ్చారు :సంధ్య థియేటర్​ యాజమాన్యం ఇచ్చిన లేఖను తిరస్కరించామని సీఎం రేవంత్​ రెడ్డి సభలో చెప్పారు. ఈనెల 2న సంధ్య థియేటర్​ యాజమాన్యం లేఖ ఇస్తే 3న తిరస్కరించామన్నారు. అయినా వాహనం రూఫ్​టాఫ్​ నుంచి చేతులు ఊపుతూ ర్యాలీ చేశారన్నారు. హీరో, హీరోయిన్​, ప్రొడ్యూసర్​ థియేటర్​కు రావొద్దని అప్పుడే చెప్పామన్నారు. కానీ పోలీసులు దరఖాస్తు తిరస్కరించినా రాత్రి 9.30 గంటల సమయంలో హీరో థియేటర్​కు వచ్చారని అందుకే ఈ దారణం జరిగిందని సీఎం రేవంత్ రెడ్డి అసెంబ్లీలో వెల్లడించారు.