Ration Rice Smuggling: 'పుష్ప అంటే నేషనల్‌ అనుకుంటిరా, ఇంటర్నేషనల్‌' ఈ మధ్య విడుదలైన 'పుష్ప 2' చిత్రంలోని డైలాగ్‌ ఇది. కాకినాడను కేరాఫ్‌ అడ్రస్‌గా మార్చుకున్న రేషన్ మాఫియాది కూడా ఇదే రూటు. ఇక్కడ జరిగిన అక్రమాల చిట్టా చెప్పాలంటే చాంతాడంత అవుతుంది. వ్యవస్థలను గుప్పెట్లో పెట్టుకుని, తమ చేతికి బియ్యం గింజ అంటకుండా వేల కోట్ల రూపాయల అక్రమ వ్యాపారం సాగించినోళ్లు చాలా మందే ఉన్నారు. అయితే ఈ రేషన్ మాఫియా సామ్రాజ్యానికి కర్త-కర్మ-క్రియ మాత్రం తెరవెనుక మరొకరు ఉన్నారన్నది జగమెరిగిన సత్యం. అక్రమాలపై ఆరా తీస్తుంటే, జిల్లాలు, రాష్ట్రాలు, దేశాలు, దాటేసి ఇంటర్నేషన్ స్థాయి వరకూ అక్రమాల సామ్రాజ్యం వెలుగుచూస్తోంది.
గడిచిన ఐదు సంవత్సరాలూ కాకినాడ పోర్టులపై విమర్శలు వస్తున్నా, అప్పటి ప్రభుత్వం స్పందించలేదు. కూటమి ప్రభుత్వం అధికారంలోకి వచ్చిన తరువాత తీగ లాగితే, రేషన్ మాఫియా డొంక కదిలింది. వివిధ రాష్ట్రాల్లో 137 మిల్లుల నుంచి కాకినాడలోని ఎగుమతిదారులకు రేషన్ బియ్యం వచ్చినట్లు తేలింది. రాష్ట్రంలో ఏ పోర్టులో సాధ్యం కానంతగా రికార్డు స్థాయిలో కాకినాడ పోర్టు నుంచి గత మూడు ఆర్థిక సంవత్సరాల్లో 48 వేల 537 కోట్ల రూపాయల విలువైన 1.31 కోట్ల టన్నుల బియ్యం విదేశాలకు ఎగుమతి అయ్యిందని మంత్రి నాదెండ్ల మనోహర్ స్వయంగా చెప్పారు. ఇందులో రేషన్ బియ్యమే అధికమన్నది ఆరోపణ. గత ఎగుమతుల్లో అక్రమం ఎంత, సక్రమం ఎంత అనేది దర్యాప్తులో తెలియాల్సి ఉంది.
అధికారులు ఆరాతీస్తే: ప్రభుత్వం పర్యవేక్షిస్తున్న కాకినాడ యాంకరేజి పోర్టుతో పాటు ప్రైవేటు వ్యక్తుల ఆధీనంలో ఉన్న కాకినాడ డీప్‌ వాటర్‌ పోర్టులోని ఎగుమతులు-దిగుమతులు జరుగుతున్నాయి. అయితే డీప్‌వాటర్‌ పోర్టుకి సంబంధించిన వాటాలు బలవంతంగా చేతులు మారాయన్న కేవీ రావు ఫిర్యాదుపై సీఐడీ విచారణ చేస్తోంది. గడిచిన అయిదు సంవత్సరాల్లో కార్గోతోపాటు లావాదేవీల డాక్యుమెంట్స్ ఇటీవల సీఐడీ స్వాధీనం చేసుకుంది. యాంకరేజీ పోర్టు నుంచి విదేశాలకు బియ్యం ఎగుమతులపైనా సిట్‌ బృందం ఆరాతీయనున్నట్లు తెలుస్తోంది.