కొత్త జంటలకూ రేషన్ కార్డు - కుటుంబ సభ్యుల చిత్రాలతో సరికొత్తగా!

ఏపీలో కొత్త రేషన్​ కార్డుల జారీపై కూటమి ప్రభుత్వం కసరత్తు

NDA Government Issue New Ration Cards 2024 :రాష్ట్రంలో రేషన్‌ కార్డులు కొత్త డిజైన్లతో అందుబాటులోకి రానున్నాయి. గతంలో జగన్‌ చిత్రాలతో ముద్రించిన రేషన్​ కార్డుల స్థానంలో కొత్త సాంకేతికత జోడించి కార్డులు ముద్రించి ఉచితంగా అందజేయడానికి ప్రభుత్వం చర్యలు చేపట్టింది. తాజా సమీక్షలో పౌర సరఫరాల శాఖ మంత్రి నాదెండ్ల మనోహర్‌ ఈ మేరకు త్వరలో తీసుకొస్తామని వెల్లడించారు. ఇందుకు ఆ శాఖ అధికారులు కసరత్తు చేస్తున్నట్లు సమాచారం.

కూటమి ప్రభుత్వం వచ్చాక రేషన్‌ వ్యవస్థ ప్రక్షాళనకు శ్రీకారం చుట్టింది. అర్హులందరికీ పోర్టిఫైడ్‌ బియ్యం అందజేస్తోంది. ఈ రకం బియ్యంతో ఐరన్‌ లోపం నివారణకు ఆస్కారం కలుగుతోంది. అదే విధంగా కార్డుల ఆధునికంగా తయారు చేసి పేదలకు ఇవ్వాలన్న సంకల్పం కాగా ఇవన్నీ మున్ముందు ఏర్పాటు చేయబోయే రైస్‌ ఏటీఎంలకు అనుసంధానంగా తీర్చిదిద్దనున్నారు.

ఆహార భద్రత చట్టానికి అనుగుణంగా :జగన్‌ సర్కార్‌ రేషన్‌ కార్డులను లబ్ధిదారులకు అందజేయడంలో ఆలస్యం చేసింది. కొత్త కార్డులకు 6 నెలలు ఆగాల్సిన దుస్థితి కాగా కూటమి ప్రభుత్వం కొత్త జంటలకు వెంటనే కార్డులు ఇవ్వాలని నిర్ణయించింది. ఇదే తీరుగా ఆహార భద్రత చట్టం 2013 అమలు మేరకు కార్డులు అందించాల్సి ఉంది. ఇందుకు గతంలో వైఎస్‌, జగన్​ చిత్రాలతో కార్డులు ఉండగా వాటిని తొలగించనుంది.

కొత్త జంటలకు కార్డులు : కొత్తగా పెళ్లయిన వారికి రేషన్​ కార్డులు ఇవ్వాలన్న నిర్ణయం అమల్లో ఉంది. దీంతో అర్హులైన ప్రతి ఒక్కరికి కొత్తగా కార్డులు ఇవ్వనున్నారు. కొత్త జంటలతో పాటు తల్లిదండ్రుల నుంచి విడిపోయిన వారికి, ఒంటరిగా ఉన్న వారికి కొత్తగా బియ్యం కార్డులు దక్కనున్నాయి. కొత్తగా జారీ చేసే రేషన్​కార్డులకు క్యూఆర్‌ కోడ్‌తో పాటు కుటుంబ సభ్యుల చిత్రాలతో కూడిన కార్డులు ఇవ్వనున్నారు.

రైస్‌ ఏటీఎంల ఏర్పాటు : ఇప్పటికే చౌక దుకాణాల్లో ఉత్తరప్రదేశ్​, ఒడిశా రాష్ట్రాల్లో రైస్‌ ఏటీఎంలు ప్రారంభించారు. దీంతో అక్కడి లబ్ధిదారులకు ఊరటగా ఉంది. క్యూలైన్లులో గంటల తరబడి నిలబడకుండా నిమిషాల్లోనే సరకులు తీసుకొనే అవకాశం కలిగింది. ఇదే తీరుగా ఏపీ కూడా రైస్‌ ఏటీఎంలు ఏర్పాటు చేయనున్నట్లు సమాచారం.