పండగంటే మూడు రోజుల ముచ్చట కాదు - ఇలా చేస్తే ఏడాదంతా ఎంతో హ్యాపీ

ఈ సంక్రాంతిని బాగా చేసుకుంటున్నారా? - అయితే సంక్రాంతి శోభ ఏడాదంతా ఉంటే ఉండాలంటే ఏం చేయాలో ఇప్పుడు చూద్దాం

Makar Sankranti Festival 2025: అబ్బో బస్సులన్నీ కిక్కిరిసిపోయాయి. రైళ్లు అయితే కిటకిటలాడిపోయాయి. ఇక విమానాలు అయితే వామ్మో అస్సలు ఖాళీలు లేవు. ఎలా అయితేనేం మొత్తానికి ఊరికి చేరుకున్నాం. ఈ మూడు రోజులూ స్నేహితులు, బంధువులు, చిన్న పిల్లలు ఇలా అందరితో సందడిగా గడిపేస్తున్నాం.

మీరంతా సంక్రాంతి పండుగను బాగా చేసుకుంటున్నారా? అమ్మ చేసిన అరిసెలు, అత్తమ్మ చేతి బోలెడు పిండివంటలు. చిన్ననాటి స్నేహితుల కబుర్లు వింటూ, వాటిని ప్రస్తుత తరం పిల్లలకు వివరిస్తున్నారా? ఎన్నో జ్ఞాపకాలతో తిరుగుపయనమవుతాము. మళ్లీ అక్కడకి వెళ్లిన వెంటనే అంతా మాములే. గందరగోళం నడుమ గజిబిజి పరుగులు. ట్రాఫిక్‌ జామ్‌లు. మళ్లీ సంవత్సరం తరువాతే సంక్రాంతిని జరుపుకునేది. అందుకే అంతటి ఆనందాన్నీ కేవలం ఈ మూడు రోజులకే సరిపెట్టకుండా, ఆ అనుభూతులను ఏడాదంతా గుర్తుండేలా నిర్మించుకుందాం.

మీ చిన్ననాటి అనుభవాలను పంచుకోండి: పట్టణాల్లో ఎవరికి వారే అన్నట్టుగా ఉంటున్నారు. అదే గ్రామాల్లో అయితే ఇంట్లోంచి బయటకు వస్తే అమ్మమ్మ, తాతయ్య, అత్తయ్య, మామయ్య, బాబాయ్, పిన్ని, పెదనాన్న, పెద్దమ్మ ఇలా అందరూ మన వాళ్లే. ఆ మమకారం, ఎవరెలా చుట్టాలు అవుతారు, మీ చిన్ననాటి జ్ఞాపకాలు, వాటితో సంబంధమున్న ప్రదేశాల అనుభవాలను పిల్లలకు తెలియజేయండి. ఆన్‌లైన్‌ స్నేహాలతో, పుస్తకాలతో బిజీబిజీగా ఉంటున్న మీ పిల్లలకు మీరు పంచే మధురానుభూతులు సాంత్వన కలిగిస్తాయి.

వారిని ఓసారి కలిసిరండి: చిన్నప్పుడు మీతో ఆటలాడుకున్నవారు, మీతో చదువుకున్న మీ స్నేహితులు, గ్రామంలో మీకు బాగా ఇష్టమైన వారు ఎవరైనా ఉంటే వారిని కలిసిరండి. వారి బాగోగుల గురించి అడిగి తెలుసుకోండి. వారి యోగక్షేమాలు తెలుసుకోండి. మీరు చిన్నప్పుడు చేసిన అల్లరి పనులను గుర్తుచేసుకుంటూ మనసారా నవ్వుకోండి. మీరు చదువుకున్న స్కూల్​కి వెళ్లండి. వీలైతే స్కూల్​కి మీ వంతుగా ఏదైనా సాయం చేయండి. మీ గుర్తుగా అక్కడ ఓ మొక్కను నాటండి. ఉపాధ్యాయులను సైతం కలిసేందుకు ప్రయత్నించండి. వారితో మాట్లాడి, వారి ఆశీర్వాదాలు తీసుకోండి.

పిల్లలకు మీరే చెప్పాలి: సంక్రాంతి సెలవులు పూర్తైన తరువాత తిరిగి రావడం అంటే పిల్లలకు ఎంతో కష్టంగా ఉంటుంది. తోటి పిల్లలతో ఆడుకున్న కొత్తకొత్త ఆటలు, ఊరి చెరువు అందాలు, అమ్మమ్మ కథలు, ఇలా అన్నింటినీ మిస్‌ అవుతామనే బాధ వారిలో ఉంటుంది. కేవలం సంక్రాంతి పండుగకు మాత్రమే కాకుండా మరిన్ని సందర్భాల్లో వారికి ఆ ఆనందాన్ని అందించండి. మీ ఊరి జ్ఞాపకాలు, మీ చిన్నప్పటి జ్ఞాపకాలను తరచూ వారితో పంచుకోండి. చుట్టాల ఇళ్లకు తీసుకెళ్లండి. వారిని మీ పిల్లలకు పరిచయం చేయండి.

మీ జీవిత పాఠాలు పంచుకోండి:మీరు మంచిగా చదువుకుని ఉన్నత స్థానంలో ఉంటే, మీ చుట్టాల పిల్లలకు కెరీర్‌ కౌన్సెలింగ్‌ ఇవ్వండి. వారు ఏం చదువుతున్నారు? భవిష్యత్తులో ఏ కోర్సులు చేస్తే మంచి అవకాశాలు ఉంటాయో అవగాహన కల్పించండి. మీ అనుభవాలను వారితో పంచుకోండి. జీవితంలో ఉన్నతంగా ఎదగాలంటే ఏం చేయాలి, ఎలా కృషి చేయాలో తెలియజేయండి.

మీ వంశవృక్షం ఉందా?: వీలైతే మీ కుటుంబ సభ్యులతో ఒక వంశ వృక్షాన్ని తయారు చేసుకోండి. మీ తాతలు, నాయినమ్మ, అమ్మమ్మల నుంచి, మీ తల్లిదండ్రులు, వారి సోదరులు, సోదరీమణులు, వారి కుటుంబ సభ్యులు వివరాలు సేకరించి వాటిని ఓ పేపర్‌పై పెడితే అందరూ ఎంతగానో సంతోషిస్తారు. అది ఓ మధుర జ్ఞాపకంగా ఉంటుంది.

ఎంతో కొంత తిరిగి ఇచ్చేయండి:‘ప్రతి ఒక్కరికీ మన ఊరు మనకి చాలా ఇచ్చింది. కాబట్టి మనం ఎంతో కొంత తిరిగి ఇచ్చేయాలి. లేదంటే లావు అయిపోతాం’ ఇది ఓ సినిమాలోని డైలాగ్. దీన్ని నిజజీవితానికి కూడా అనుసంధానించండి. మీరు పుట్టిన ఊరికి ఏదైనా మంచి చేయండి. దానికోసం మీరు లక్షల రూపాయలు ఖర్చు చేయాల్సిన అవసరం లేదు. మీ ఊరిలోని లైబ్రెరీకి కొన్ని పుస్తకాలు ఇవ్వండి. లేదంటే ఓ స్ట్రీట్​ని ఎంచుకుని మొక్కలు నాటించండి. శ్రమ రూపంలో అయినా, సేవ రూపంలో అయినా, అన్నదానం అయినా, ఇలా ఎలా అయినా సరే నలుగురితో పంచుకోండి. ఊరికి వెళ్లిన తరువాత కూడా ఆఫీస్‌ అంటూ టెన్షన్, వాట్సప్‌, ఇన్‌స్టా అంటూ వాటిని పట్టుకుని వేలాడకండి. డిజిటల్‌ ప్రపంచం నుంచి కాస్త బయటకు రండి.