Two Groups Clash in Kakinada: స్థలం సరిహద్దు వివాదంలో ఇరువర్గాల మధ్య చెలరేగిన ఘర్షణ ముగ్గురు హత్యకు దారి తీసిన దారుణ ఘటన కాకినాడ జిల్లా సామర్లకోట మండలం వేట్లపాలెం గ్రామంలో చోటుచేసుకుంది. గ్రామ శివారులలోని దళిత పేటకు చెందిన చెరువును ఆక్రమించి కార్దాల కుటుంబ సభ్యులు ఇల్లు నిర్మిస్తున్నారని బచ్చల కుటుంబానికి చెందిన వారు పంచాయతీలో ఫిర్యాదు చేశారు. దీనిపై మూడు నెలలుగా ఇరు వర్గాల మధ్య వివాదం నడుస్తోంది.
కార్దాల కుటుంబానికి చెందిన వ్యక్తులు ఇంటి నిర్మాణ పనులు చేస్తుండగా బచ్చల కుటుంబానికి చెందిన వ్యక్తులు కత్తులు, కర్రలు రాడ్లతో ఒక్కసారిగా దాడి చేయడంతో కార్దాల ప్రకాశం ఘటనా స్థలంలోనే మృతి చెందాడు. కార్దాల చంద్రరావు, కార్దాల ఏసుబాబు ఆసుపత్రిలో చికిత్స పొందుతూ మృతి చెందారు. మరో ఏడుగురికి తీవ్రంగా గాయపడ్డారు. క్షతగాత్రులను కాకినాడ జీజీహెచ్‌కు తరలించారు.