గుంటూర్​ స్పెషల్​ "వంకాయ ఉల్లికారం" - అన్నం ఉడికేలోపు రెడీ! - చాలా సింపుల్

వంకాయలు, టమాటాలు కలిపి వండుకోవడం కామన్ - సింపుల్​గా వంకాయ ఉల్లికారం ట్రై చేయండి!

Vankaya Ulli Karam in Telugu : తెలుగు ప్రజలకు వంకాయ కర్రీ అంటే ఎంతో ఇష్టం. మరీ ముఖ్యంగా ఆంధ్రులకు గోంగూర, వంకాయ అంటే ప్రాణం. ఇంట్లో ఈ ఒక్క కూర ఉంటే చాలు కడుపు నిండా తృప్తిగా భోజనం చేయచ్చని ఎక్కువ మంది చెబుతుంటారు. అయితే, వంకాయ కర్రీని టమాటా వేసి వండుకోవడం చాలా కామన్​. అలా కాకుండా ఓసారి గుంటూర్​ స్టైల్లో వంకాయ ఉల్లికారం ట్రై చేయండి. ఈ వంకాయ ఉల్లికారం వేడివేడి అన్నంతో రుచి అద్దిరిపోతుంది. పైగా ఈ రెసిపీ చేయడానికి ఎక్కువ టైమ్​ కూడా పట్టదు. ఇప్పుడిప్పుడే వంట నేర్చుకునే వారు కూడా దీనిని ఈజీగా చేసేయచ్చు. మరి వంకాయ ఉల్లికారం చేయడానికి కావాల్సిన పదార్థాలు? తయారీ విధానం ఇప్పుడు చూద్దాం.

కావాల్సిన పదార్థాలు :

• పొడవు వంకాయలు - పావుకేజీ
• ఉప్పు - రుచికి సరిపడా
• కొత్తిమీర తరుగు - కొద్దిగా
• ఉల్లిపాయలు - 4
• కారం - రుచికి సరిపడా
• జీలకర్ర - టీస్పూన్
• పసుపు - అరటీస్పూన్
• వెల్లుల్లి రెబ్బలు - 4
• నూనె

తయారీ విధానం :

• ముందుగా పొడవు వంకాయలను శుభ్రంగా కడగాలి. ఆపై చాకుతో మధ్యలోకి ఒకసారి గాట్లు పెట్టి పక్కన ఉంచుకోవాలి. ఇలా అన్ని వంకాయలను మధ్యలోకి కట్​ చేసుకోండి.
• అలాగే ఉల్లిపాయలు ముక్కలుగా కట్​ చేసుకోండి.
• ఇప్పుడు ఒక మిక్సీ జార్లో తీసుకోండి. ఇందులో ఉల్లిపాయ ముక్కలు, జీలకర్ర, కారం, పసుపు, వెల్లుల్లి రెబ్బలు వేసి నీళ్లు లేకుండా మెత్తగా గ్రైండ్​ చేసుకోవాలి.
• ఈ ఉల్లికారం మిశ్రమాన్ని కట్​ చేసిన వంకాయల్లో స్టఫ్​ చేసుకోవాలి. ఆపై వీటిని ఒక ప్లేట్లోకి తీసుకోండి.
• ఇప్పుడు స్టవ్​పై పాన్ పెట్టి సరిపడా ​నూనె వేసి వేడి చేయండి. వేడివేడి నూనెలో ఉల్లికారం స్టఫ్​ చేసిన వంకాయలను వేసి మూత పెట్టండి.
• ఒక 5 నిమిషాల తర్వాత గరిటెతో మెల్లిగా కలుపుతూ వేపుకోండి. ఇందులోనే మిగిలిన ఉల్లికారం మిశ్రమాన్ని వేసి ఫ్రై చేసుకోండి.
• స్టవ్​ మీడియంలో ఫ్లేమ్​లో అడ్జస్ట్​ చేసి వంకాయలు మెత్తగా ఉడికించుకోండి. వంకాయలు మాడిపోకుండా ఉండడానికి మధ్యమధ్యలో కలుపుతూ వేపుకోండి.
• వంకాయలు మెత్తగా ఉడికిన తర్వాత కూరలో నూనె పైకి తేలుతుంది. ఈ స్టేజ్​లో ఉప్పు రుచి చూసుకోండి.
• ఉల్లికారం గోల్డెన్ బ్రౌన్​ కలర్లో మారిన తర్వాత కాస్త కొత్తిమీర తరుగు చల్లి స్టవ్ ఆఫ్ చేయండి. అంతే ఇలా సింపుల్​గా చేసుకుంటే నోరూరించే వంకాయ ఉల్లికారం రెడీ!
• వంకాయ ఉల్లికారం ఒక్కటి ఉంటే చాలు అన్నం తృప్తిగా తినొచ్చు!
• ఈ వంకాయ ఉల్లికారం నచ్చితే మీరు కూడా ఓ సారి ఇంట్లో ట్రై చేయండి.