தனி விமான மூலம் சென்னை வந்தடைந்தது வெற்றி துரைசாமி உடல் சென்னை:சென்னை மாநகராட்சி முன்னாள் மேயரும், அதிமுக முக்கிய தலைவருமான சைதை துரைசாமியின் மகன் வெற்றி துரைசாமியும், அவரது நண்பர் கோபிநாத் ஆகியோர் இமாச்சல பிரதேசத்திற்குச் சுற்றுலா சென்று, வாடகை கார் ஒன்றில் கடந்த 4ஆம் தேதி பயணம் செய்த போது, ஓட்டுநரின் கட்டுப்பாட்டை இழந்த கார், கின்னூர் பகுதியில் உள்ள சட்லஜ் நதியில் கார் கவிழ்ந்து விபத்துக்குள்ளானது.
இந்த விபத்தில் கார் ஓட்டுநர் சம்பவ இடத்திலேயே உயிரிழந்தார். படுகாயங்களுடன் மீட்கப்பட்ட திருப்பூர் வெள்ள கோவில் பகுதியைச் சேர்ந்த கோபிநாத கின்னூர் அரசு மருத்துவமனையில் அனுமதிக்கப்பட்டு, பின்னர் மேல் சிகிச்சைக்காகச் சிம்லா அரசு மருத்துவமனையில் அனுமதிக்கப்பட்டுள்ளார். காணாமல் போன வெற்றி துரைசாமியைத் தேடும் பணியில் காவல்துறை, ராணுவம், விமானப்படை மற்றும் நீர்மூழ்கி வீரர்கள் என பெரும் படை களமிறக்கப்பட்டது.
அதைத் தொடர்ந்து, கடந்த 8 நாட்களாகத் தொடர் தேடுதல் வேட்டை நடத்தப்பட்ட நிலையில், வெற்றி துரைசாமியின் உடல் சட்லஜ் நதியிலிருந்து 6 கிலோ மீட்டர் தொலைவில் நேற்று கண்டெடுக்கப்பட்டது. அவரின் உடலை ஸ்கூபா டைவிங் வீரர்கள் கண்டெடுத்தனர். அவர்களுக்கு ஏற்கனவே அறிவித்தது போல், 1 கோடி ரூபாய் சன்மானம் வழங்கப்படவுள்ளதாகக் கூறப்படுகிறது.
பின்னர் வெற்றி துரைசாமியின் உடலை மீட்ட மீட்புப் படையினர், உடற்கூறு ஆய்விற்காக மருத்துவமனைக்கு அனுப்பி வைத்துள்ளனர். இந்த நிலையில் உடற்கூறு ஆய்வு முடிக்கப்பட்டு இன்று நாக்பூரிலிருந்து தனி விமானத்தில் சற்று முன் வெற்றி துரைசாமியின் உடல் சென்னை விமான நிலையம் கொண்டுவரப்பட்டது.
இதையடுத்து சென்னை விமான நிலையத்தில் செய்ய வேண்டிய நடைமுறைகளை அவரது உறவினர்கள் செய்து முடித்து, தற்போது வெற்றி துரைசாமி உடலைத் தாம்பரம் அடுத்த ராஜகீழ் பக்கம் பகுதியில் உள்ள அவரது இல்லத்திற்குக் கொண்டு சென்றுள்ளனர். இதனைத் தொடர்ந்து வெற்றி துரைசாமியின் உடல் இன்று (பிப்.13) மாலை 5 மணிக்கு, சென்னை நந்தனத்தில் உள்ள சி.ஐ.டி நகர், முதல் பிரதான சாலையில் உள்ள இல்லத்தில் பொதுமக்கள் அஞ்சலிக்காக வைக்கப்படும் எனவும், அதைத் தொடர்ந்து, இன்று மாலை 6 மணியளவில் கண்ணம்மா பேட்டை மயானத்தில் தகனம் செய்யப்பட உள்ளது எனவும் தெரிவிக்கப்பட்டுள்ளது.
இதனிடையே வெற்றி துரைசாமியின் மறைவிற்கு அரசியல் கட்சித் தலைவர்கள், சினிமா பிரபலங்கள், சைதை துரைசாமியின் அறக்கட்டளையில் படித்து அதிகாரியாக இருக்கும் பலரும் இரங்கல் தெரிவித்து வருகின்றனர்.
இதையும் படிங்க:ஹிமாச்சலில் சடலமாக மீட்கப்பட்ட வெற்றி துரைசாமி..! இன்று சென்னையில் உடல் தகனம்..முழு விபரம்..
