விபத்தில்லா சென்னை.. "ஜீரோ ஆக்சிடெண்ட் டே"- போக்குவரத்து கூடுதல் ஆணையர் சுதாகர் கூறுவது என்ன? - Zero Accident Day

Transport Additional Commissioner Sudhakar: சென்னையில் மெட்ரோ ரயில் பணிகள் நடந்தாலும், அனைத்து இடங்களிலும் போக்குவரத்து சீராக செயல்பட்டு வருகிறது என சென்னை பெருநகர போக்குவரத்துக் கூடுதல் ஆணையர் சுதாகர் தெரிவித்தார்.

சென்னை: விபத்தில்லா சென்னையை உருவாக்க வேண்டும் என்பதற்காக போக்குவரத்து காவல்துறை சார்பில் "ஜீரோ ஆக்சிடெண்ட் டே" என்ற தலைப்பில் பல்வேறு விழிப்புணர்வு நிகழ்ச்சிகள் நடைபெற்று வருகிறது. அந்த வகையில், ஜீரோ ஆக்ஸிடென்ட் டே (ZAD) போக்குவரத்து தொடர்பான இன்ஸ்டாகிராம் ரீல்ஸ் போட்டி நிகழ்ச்சியை சென்னை கிண்டி ஐஐடி வளாகத்தில், சென்னை பெருநகர போக்குவரத்து கூடுதல் ஆணையர் சுதாகர் துவங்கி வைத்து பேசினார்.

அதனைத் தொடர்ந்து செய்தியாளர்களிடம் பேசிய சென்னை பெருநகர போக்குவரத்து கூடுதல் ஆணையர் சுதாகர், "சென்னையில் விபத்து இல்லாத வண்ணம் ஒரு மாற்றத்தைக் கொண்டு வரும் வகையில், சென்னை மாநகர போக்குவரத்து காவல் சார்பாக "Zero Accident Day" கடைபிடிக்கப்படுகிறது. இதற்காக பொதுமக்கள் ஒத்துழைக்கும் படியும், சாலை விதிமுறைகளை கடைபிடிக்கும்படியும் பல இடங்களில் விழிப்புணர்வு கொடுத்து வருகிறோம்.

அதனடிப்படையில் ஒன்றாக இன்று சென்னை போக்குவரத்தில் காவல் சார்பாக இன்ஸ்டாகிராம் ரீல்ஸ் போட்டியில் நிகழ்ச்சி துவங்கிவிடும். போக்குவரத்து பாதுகாப்பு, போக்குவரத்து விழிப்புணர்வு இதை சார்ந்து ரீல்ஸ் எடுத்து, எங்களது போக்குவரத்து காவல்துறை சார்பாக ஒரு கியூ ஆர் கோட் கொடுக்கப்படும் அதில் ஹேக் செய்து வீடியோவை பதிவிடலாம்.

இந்த இன்ஸ்டாகிராம் ரீல்ஸ் போட்டி ஆக.9ஆம் தேதி துவங்கி இந்த மாதம் 20ஆம் தேதி வரை நடைபெறும். இதில் மூன்று வித பரிசுகள் அளிக்கப்படுகிறது. இந்த ரீலை அதிகப்படியாக பார்த்திருந்தால் அவர்களுக்கு முதல் பரிசாக ரூ.2 லட்சமும், சிறந்த உள்ளடக்கம் உள்ள வீடியோக்களுக்கு ரூ.1 லட்சம் இரண்டாம் பரிசாகவும், ரூ.50 ஆயிரம் மூன்றாம் பரிசாகவும் சென்னை பெருநகர போக்குவரத்து காவல் சார்பாக அளிக்கப்படும்.

அதனால், பொதுமக்கள் அனைவரும் கலந்து கொள்ள வேண்டும். போக்குவரத்து தொடர்பாக விழிப்புணர்வு ஏற்படுத்தவே இந்த ஏற்பாடு செய்யப்பட்டுள்ளது. அதுமட்டுமின்றி பல உயிர்களை காப்பாற்ற இந்த விழிப்புணர்வு ஏற்பாடு செய்யப்பட்டுள்ளது. ஆகஸ்ட் 26ஆம் தேதியை விபத்து இல்லாத ஒரு நாளாக மாற்ற வேண்டும்.

சென்னையில் உள்ள 180 பள்ளிகளில் இருக்கக்கூடிய போக்குவரத்து விழிப்புணர்வு குறித்து பயிற்சி பெற்ற ஒரு ஆசிரியர் ஒரு மாணவர் ஆகியவை தேர்ந்தெடுத்து, ஒன்பது பிரிவாக பிரித்து இந்த ஐஐடி வளாகத்தில் அவர்களுக்கு பயிற்சி அளிக்கப்படவுள்ளது. அனைத்து பள்ளிகளிலும் உள்ள மாணவர்களுக்கு போக்குவரத்து விழிப்புணர்வு ஏற்படுத்தும் வகையில் அவர்களை தயார்படுத்தப்படும்.

தற்போது சென்னையில் 2ம் கட்ட மெட்ரோ ரயில் பணிகள் நடைபெற்று வருகிறது. பணி நடக்கும் இடங்களில் கடந்த ஐந்து ஆண்டுகளுக்கு முன்பிருந்த அதே போக்குவரத்து தற்பொழுதும் உள்ளது. அந்த போக்குவரத்து பாதிக்காத அளவுக்கு சென்னை பெருநகர போக்குவரத்து துறை அதனை சீர்படுத்தி செயல்படுகிறது. இதை சென்னை போக்குவரத்து காவல்துறை ஒரு வெற்றியாக கருதுகிறது. மேலும், பள்ளி மாணவர்களின் பாட புத்தகத்தில் போக்குவரத்து விழிப்புணர்வு குறித்தான பாடத்தை கொண்டு வர முயற்சித்து வருகிறோம்" எனத் தெரிவித்தார்.

ஈடிவி பாரத் தமிழ் வாட்ஸ்ஆப் சேனலில் இணையஇங்கே கிளிக் செய்யவும்

Join ETV Bharat WhatsApp Channel click here (Credits - ETV Bharat Tamil Nadu)