ஸ்பா பெயரில் பாலியல் தொழில்.. சென்னையில் ஒருவர் கைது! - prostitution case

Prostitution Case: அயப்பன்தாங்கல் பகுதியில், அழகு நிலையம் என்ற பெயரில் பாலியல் தொழில் நடத்தி வந்த தினேஷ் என்ற பவுன்சரை போரூர் போலீசார் கைது செய்து சிறையில் அடைத்துள்ளனர். மேலும், இருவரை தேடி வருகின்றனர். இதிலிருந்து மீட்கப்பட்ட ஆறு பெண்கள் அரசு காப்பகத்திற்கு அனுப்பி வைக்கப்பட்டுள்ளனர்.

சென்னை: சென்னை, போரூர் அடுத்த அயப்பன்தாங்கல் புஷ்பா நகர் பகுதியில் பிரஸ்டீஜ் ஸ்பா என்ற பெயரில் அழகு நிலையம் ஒன்று இயங்கி வருகிறது. இருபாலருக்குமான இந்த அழகு நிலையத்தில் பாலியல் தொழில் நடப்பதாக ஆவடி காவல் துணை ஆணையருக்கு ரகசிய தகவல் கிடைத்தது. தகவலின் அடிப்படையில் தனிப்படை போலீசார் நேற்றிரவு அழகு நிலையத்தில் திடீரென சோதனை மேற்கொண்டனர். அப்போது அங்கு பாலியல் தொழில் நடந்து வந்தது தெரிய வந்தது.

இதையடுத்து, அந்த அழகு நிலையத்திலிருந்து பாடி குப்பம் பகுதியைச் சேர்ந்த பவுன்சர் தினேஷை (43) கைது செய்துள்ளனர். மேலும், அங்கிருந்த ஆறு பெண்கள் மீட்கப்பட்டுள்ளனர். மேலும், இது தொடர்பாக தலைமறைவாக உள்ள மற்றொரு தினேஷ், ஜெயக்குமார் ஆகிய இருவரையும் போலீசார் தேடி வருகின்றனர். பின்னர், இதுகுறித்து விசராணை மேற்கொண்டனர். அந்த விசாரணையில் அயப்பன்தாங்கலில் பிரபலமான அடுக்குமாடி குடியிருப்பு அருகே வாடகைக்கு வீடு எடுத்து இருபாலருக்குமான அழகு நிலையம் தொடங்கி உள்ளனர். இதில் அழகு நிலையம் என்ற பெயரில் பாலியல் தொழிலும் செய்து வந்துள்ளனர்.

குறிப்பாக, வெளியூரிலிருந்து சென்னைக்கு வேலை தேடி வரும் பெண்களை குறி வைத்து, அழகு நிலையத்தில் வேலை வாங்கி கொடுப்பதாக ஆசை வார்த்தை கூறி அழைத்து வந்துள்ளனர். பின்னர் அந்தப் பெண்களை பாலியல் தொழிலில் ஈடுபடுத்தி உள்ளனர்.

இந்த அழகு நிலையத்தை பவுன்சர்கள் சிலர் நடத்தி வந்ததும் தெரிய வந்தது. அதில், தினேஷ் என்ற ஒரு பவுன்சர் கைது செய்யப்பட்டுள்ளார். இந்த அழகு நிலையத்திலிருந்து ஆறு பெண்கள் மீட்கப்பட்டுள்ளனர். இதுகுறித்து வழக்குப்பதிவு செய்த போரூர் போலீசார், கைது செய்யப்பட்ட தினேஷை பூந்தமல்லி நீதிமன்றத்தில் ஆஜர்படுத்தி புழல் சிறையில் அடைத்தனர். மீட்கப்பட்ட ஆறு பெண்கள் அரசு காப்பகத்திற்கு அனுப்பி வைக்கப்பட்டனர்.

இதையும் படிங்க:திருமணத்துக்கு மீறிய உறவில் இருந்த பெண்ணுடன் தொடர்பில் இருந்த நண்பனை தீர்த்துக்கட்டியவர் கைது! - mayiladuthurai case