விருதுநகர்: ராமநாதபுரம் மாவட்டம், கீழ முடிமன்னார் கோட்டையைச் சேர்ந்தவர் பாலமுருகன் (43). இவர் புளிச்சகுளம் கிராமத்தில் உள்ள அரசு தொடக்கப் பள்ளியில் ஆசிரியராக பணிபுரிந்து வந்தார். மேலும், இவர் கோயில் திருவிழாவில் கலை நிகழ்ச்சிகள் நடத்தும் கலைக்குழுவும் நடத்தி வந்ததாக கூறப்படுகிறது.
இந்நிலையில் நேற்று பள்ளி விடுமுறை என்பதால், ஆசிரியர் பாலமுருகன் தனது கலைக்குழு நண்பர்களான சவ்வாஸ்புரம் பகுதியைச் சேர்ந்த மணி (18), ஆலடிபட்டியைச் சேர்ந்த சின்னத்துரை (22) மற்றும் அடையாளம் தெரியாத ஒரு நபர் உள்ளிட்ட நான்கு பேர் காரில் சொந்த வேலையாக வெளியூர் சென்று விட்டு, மீண்டும் ஊர் திரும்பிக் கொண்டிருந்தனர். அப்போது, காரை ஆசிரியர் பாலமுருகன் ஓட்டிச் சென்றதாக கூறப்படுகிறது.
இந்த நிலையில், அருப்புக்கோட்டை அருகே கல்லூரணியின் சாயல்குடி செல்லும் பிரதான சாலையில் கார் சென்று கொண்டிருந்த போது, கார் திடீரென கட்டுப்பாட்டை இழந்து சாலையோர புளிய மரத்தின் மீது மோதி விபத்து ஏற்பட்டது. இந்த விபத்தில் கார் அப்பளம் போல் நொறுங்கியது.