சென்னை:சென்னை சைதாப்பேட்டை ஸ்ரீராம்பேட் தெருவை சேர்ந்த கௌதம் (வயது 27) அதே பகுதியில் தனது மனைவி பிரியா மற்றும் இரு குழந்தைகளுடன் வசித்து வருகிறார். இந்த நிலையில், நேற்றிரவு சுமார் 11 மணியளவில் வீட்டில் மனைவி மட்டும் குழந்தைகளுடன் உறங்கிக் கொண்டிருந்த கௌதமை 6 பேர் கொண்ட மர்ம கும்பல் கத்தி போன்ற கூர்மையான ஆயுதங்களைக் கொண்டு சரமாரியாக தாக்கிவிட்டு அங்கிருந்து தப்பி சென்றுள்ளது.
இந்த தாக்குதலில் பலத்த காயமடைந்த கௌதம்‘ சம்பவ இடத்திலேயே உயிரிழந்தார். இதனைக் கண்டு அதிர்ச்சி அடைந்த கௌதமனின் மனைவி உடனடியாக காவல் துறைக்கு தகவல் தெரிவிக்க சம்பவ இடத்திற்கு விரைந்து வந்த சைதாப்பேட்டை காவல் துறையினர், கௌதமின் உடலை கைப்பற்றி, உடற்கூறு ஆய்விற்காக ராயப்பேட்டை அரசு மருத்துவமனைக்கு அனுப்பி வைத்தனர்.
இதனைத் தொடர்ந்து, இச்சம்பவம் தொடர்பாக போலீசார் நடத்திய முதற்கட்ட விசாரணையில், கொலை செய்யப்பட்ட கௌதம் தேனாம்பேட்டை காவல் நிலைய சரித்திர பதிவேடு குற்றவாளி என்பதும், இவர் மீது கொலை உட்பட சில வழக்குகள் நிலுவையில் இருப்பதும் தெரிய வந்துள்ளது.