நீலகிரி:மலைகளின் அரசி என அழைக்கப்படும் நீலகிரி மாவட்டத்தில் உள்ள சுற்றுலா தலங்களை காண அண்டை மாநிலங்களான கேரளா, கர்நாடகா மற்றும் சமவெளி பிரதேசங்களில் இருந்து நாள்தோறும் ஆயிரக்கணக்கான சுற்றுலா பயணிகள் வருகை புரிகின்றனர்.
இவ்வாறு வரும் சுற்றுலா பயணிகள் உதகையில் உள்ள உலகப் புகழ்பெற்ற அரசு தாவரவியல் பூங்கா, ரோஜா பூங்கா, படகு இல்லம், பைக்காரா படகு இல்லம் உள்ளிட்ட பல்வேறு சுற்றுலா தளங்களை கண்டு ரசித்து செல்கின்றனர். இந்நிலையில் கிருஷ்ண ஜெயந்தி மற்றும் வார விடுமுறை என தொடர் விடுமுறை காரணமாக உதகையில் உள்ள சுற்றுலா தலங்களில் ஏராளமான சுற்றுலாப் பயணிகள் குவிந்து வருகின்றனர்.
குறிப்பாக உதகையில் உள்ள உலக புகழ்பெற்ற அரசு தாவரவியல் பூங்காவில் வார விடுமுறையையொட்டி சுற்றுலா பயணிகளின் கூட்டம் இன்று அதிகரித்து காணப்பட்டது. பூங்காவில் உள்ள வானுயர்ந்த மரங்கள் மற்றும் கண்ணாடி மாளிகையில் பூத்துக் குலுங்கும் வண்ண மலர்களை கண்டு ரசித்த சுற்றுலாப் பயணிகள் அவற்றை புகைப்படம் எடுத்து மகிழ்ந்தனர்.