3 ஆண்டுகளில் 31 லட்சம் பேருக்கு வேலை வாய்ப்பு: அமைச்சர் டிஆர்பி ராஜா தகவல் - minister trb raja

அரசியலில் மாணவர்களுக்கு ஆர்வம் அவசியம் வேண்டும் எனவும் அதை மாணவர்கள் சரியான முறையில் கையாளத் தெரிந்திருக்க வேண்டும் என்றும் சென்னை விஐடி கல்லூரி விழாவில் தொழில்துறை அமைச்சர் டிஆர்பி ராஜா தெரிவித்துள்ளார்.

சென்னை: விஐடி சென்னையில் சர்வதேச 'டெக்னோ விஐடி 24' என்ற தொழில்நுட்பத் திருவிழா நேற்று முன் தினம் (செப்.19) தொடங்கியது. முதல் இரண்டு நாட்களில் ரோபோ நிகழ்ச்சி, ட்ரோன் நிகழ்ச்சி உள்ளிட்ட 250-க்கும் மேற்பட்ட தொழில்நுட்பம் சார்ந்த நிகழ்ச்சிகள் நடைபெற்றது.

இதில் மலேசியா, ஜப்பான் உள்ளிட்ட பல்வேறு நாடுகளைச் சேர்ந்த பல்கலைக்கழக மாணவர்கள் 23 ஆயிரத்துக்கும் மேற்பட்டோர் ஆர்வமுடன் பங்கேற்று தொழில்நுட்பம் சார்ந்த நிகழ்வுகளை கண்டு ரசித்தனர். இந்நிலையில், டெக்னோ விஐடி-24 யின் நிறைவு விழா இன்று (செப்.21) நடைபெற்றது. இதில் சிறப்பு விருந்தினராக தொழில்துறை அமைச்சர் டிஆர்பி ராஜா கலந்துக்கொண்டார்.

நிகழ்ச்சியில் அமைச்சர் டிஆர்பி ராஜா பேசியதாவது, "மாணவர்கள் தங்களைப் பற்றி உயர்வாக கருத வேண்டும். இந்தியா சேவைகளுக்கான இடமாக திகழ்ந்து வருகிறது. அரசியலைப் பற்றி வெளியில் இருந்து குறை கூறாமல், சட்டம் இயற்றுபவர்களை தகுதியானவர்களாக தேர்ந்தெடுப்பதற்கான அடிப்படை முறைகளை பொது மக்கள் தெரிந்துகொள்ள வேண்டும்.

பொது மக்கள் தங்களது உரிமைகளை தெரிந்து கொண்டால் தான் பிறரை கேள்வி எழுப்ப முடியும். அரசியலில் மாணவர்களுக்கு ஆர்வம் அவசியம் வேண்டும். அதை மாணவர்களுக்கு சரியான முறையில் கையாளத் தெரிந்திருக்க வேண்டும். தமிழக அரசு மாணவர்களின் தொழில்நுட்பத் திட்டங்களை வரவேற்கிறது. சிறந்த திட்டங்களாக இருந்தால் தேவையான வழிகாட்டுதலை வழங்க தமிழக அரசு தயாராக உள்ளது.

இதையும் படிங்க:மீண்டும் பாஜகவில் கே.டி.ராகவன்? - தமிழிசை, எச்.ராஜா இல்லாமல் நிர்மலா சீதாராமனுடன் ஆலோசனை.. சென்னையில் நடந்தது என்ன?

இவை குறித்து மாணவர்கள் மற்றும் தொழில்முனைவோர் 'Startup TN' என்ற இணையதளத்தில் தெரிந்துகொள்ளலாம். எதிர்காலத்தில் விண்வெளி ஆய்வுக்கூடம் தமிழகத்தில் அமைவதற்கான வாய்ப்புள்ளது. எனவே, தமிழகத்தில் வேலை வாய்ப்புகள் அதிக அளவில் உருவாகும்" இவ்வாறு அவர் பேசினார்.

பின்னர் செய்தியாளர்களைச் சந்தித்து அமைச்சர் டிஆர்பி ராஜா பேசியதாவது, "கடந்த 3 ஆண்டுகளில் மட்டும் ஏறத்தாழ 31 லட்சம் நபர்களுக்கு வேலை வாய்ப்புகளை முதலமைச்சர் செய்திருக்கிறார். வேலை வாய்ப்புகளை ஏற்படுத்தி கொடுத்தது மட்டுமல்லாமல் அவற்றை எங்கெல்லாம் அமைத்து கொடுத்திருக்கிறார் என்பதுதான் முக்கியம். தமிழகம் முழுவதும் அனைத்து மாவட்டங்களிலும் பரவலாக வேலை வாய்ப்புகளை உறுதி செய்யப்பட்டுள்ளது. அனைத்து தரப்பு மக்களுக்கும் உயர்தர வேலை வாய்ப்புகளை உருவாக்கியுள்ளார்.

முதலைச்சர் அமெரிக்கா சென்று பல நிறுவனங்களோடு புரிதல் ஒப்பந்தங்கள் போடப்பட்டுள்ளது. இது 100 சதவீதம் வேலைகளை வழங்கும். படித்த இளைஞர்களுக்கும் சரி, புறநகரங்களில் இருக்கக்கூடிய தாய்மார்களுக்கும் சரி அனைத்து தரப்பு மக்களுக்கும் அவர்களது தகுதிக்கேற்ப வேலை வாய்ப்புகள் வழங்கப்படும்" என தெரிவித்தார்.