அண்ணாமலை வாழ்நாள் முழுவதும் செருப்பு அணிய முடியாது; அமைச்சர் ரகுபதி சபதம்..!

திமுகவை அகற்றுவேன் என்று கூறினால், அண்ணாமலை வாழ்நாள் முழுவதும் செருப்பு அணிய முடியாது என்று சட்டத்துறை அமைச்சர் ரகுபதி விமர்சித்துள்ளார்.

புதுக்கோட்டை: அண்ணா பல்கலை. மாணவி பாலியல் வன்கொடுமை செய்யப்பட்ட சம்பவத்தை கண்டித்து பாஜக மாநில தலைவர் அண்ணாமலை சாட்டை அடித்துக்கொண்டு நடத்திய போராட்டம் பேசுபொருளாகியுள்ளது. இந்நிலையில், '' சாட்டையால் அடித்துக்கொள்வது ஒருவருக்கு கொடுக்கக்கூடிய தண்டனை அல்லது பாவ விமோசனம்'' என்று சட்டத்துறை அமைச்சர் ரகுபதி விமர்சித்துள்ளார்.

புதுக்கோட்டையில் செய்தியாளர்களை சந்தித்த சட்டத்துறை அமைச்சர் ரகுபதி கூறியதாவது; '' சாட்டையால் அடித்துக்கொள்வது என்பது ஒருவருக்கு கொடுக்கக்கூடிய தண்டனை அல்லது பாவ விமோசனம். எனவே, அண்ணாமலை செய்த தவறின் அடிப்படையில் பாவ விமோசனத்திற்காக சாட்டை அடித்துக் கொண்டாரா, அல்லது செய்த தவறுக்காக தனக்குத்தானே சாட்டையால் அடித்துக் கொண்டாரா? என்பதுதான் கேள்வியே தவிர, திமுக அரசு அவருக்கு எந்த பாதகமும் செய்யவில்லை.

பாரதிய ஜனதா கட்சியில் பழனி பாத யாத்திரை செல்வதற்காக 40 நாள் செருப்பு போடாமல் இருப்பார்கள். அதை அண்ணாமலை கடைப்பிடித்து வருகிறார். ஆனால், திமுகவை அகற்றுவேன் என்று கூறினால், அவர் வாழ்நாள் முழுவதும் செருப்பு அணிய முடியாது.

ஞானசேகரனுக்கும் திமுகவுக்கும் தொடர்பு இல்லை

ஞானசேகரனுக்கும், திமுகவுக்கும் எந்த சம்பந்தமும் இல்லை என்று தெளிவுபடுத்தி விட்டோம். ஞானசேகரனுக்கும் எங்களது கட்சிக்கும் எந்த தொடர்பும் இல்லை. அண்ணா பல்கலைக்கழக வளாகத்தில் உள்ள சிசிடிவி ஒயர்கள் இருக்கா இல்லையா என்பது விசாரணையில் தெரிய வரும். அவர் எந்த வழியாக வந்தார் என்பது விசாரணையில் கண்டுபிடித்து விடுவோம். அப்போது 'நிர்பயா நிதி' எப்படி செலவு செய்யப்பட்டது என்பது தெரிய வரும்.

இதையும் படிங்க:"லண்டனில் இருந்து திரும்பியபின் என் பாதை தெளிவாக இருக்கின்றது"- அண்ணாமலை பேட்டி!

பொதுவாக எஃப்ஐஆர் காப்பி புகார் கொடுத்தவர்களிடம் ஒரு நகல் வழங்கப்படும். அவர்கள் மூலமாகவோ கூட எஃப்ஐஆர் காப்பி வெளி வந்திருக்கலாம். எஃப்ஐஆர் காப்பியில் தரம் தாழ்ந்த வார்த்தைகள் இருப்பதற்கு வாய்ப்பு இல்லை. அவ்வாறு காவல்துறையினர் எழுத மாட்டார்கள். அண்ணா பல்கலைக்கழக வளாகம் 250 ஏக்கர் பரப்பளவு கொண்டது. மிகப்பெரிய பகுதி அது. கைதான ஞானசேகரன் இரவு நேரத்தில் திருட்டுத்தனமாக வந்துள்ளார். இனிமேல் பாதுகாப்பை எவ்வாறு அதிகரிக்க வேண்டுமோ அதை நாங்கள் செய்வோம்.

பல வழக்குகளில் குற்றவாளி

ஞானசேகரன் ஏற்கனவே குற்றவாளி என்பது நேற்று தான் தெரிய வருகிறது. அவர் பல வழக்குகளில் குற்றவாளி என்பது நேற்று தான் தெரிய வருகிறது. இனிமேல் தான் கண்டுபிடிக்க வேண்டும்.

ஞானசேகரன் வழக்கு நீதிமன்றத்தில் உள்ளது. பல்கலைக்கழக வளாகத்தில் உள்ள சிசிடிவி கேமராவில் உள்ள அவரது புகைப்படத்தை வைத்து விசாரணை நடைபெற்று வரும். எப்படி இருந்தாலும் ஞானசேகரன் அதிலிருந்து தப்பிக்க முடியாது. ஞானசேகரனை நாங்கள் காப்பாற்ற வேண்டிய அவசியம் கிடையாது. ஞானசேகரன் யார் என்று எங்களுக்கு தெரியாது. அவர் கட்சியில் எந்த பொறுப்பிலும் இல்லை.

குற்றத்தை யூகிக்க முடியாது

கடந்த சில மாதங்களுக்கு முன்பு நீதிமன்றத்தில் நடந்த சம்பவத்திற்கு பிறகு நீதிமன்றங்களில் துப்பாக்கி ஏந்திய போலீஸ் பாதுகாப்பு போடப்பட்டுள்ளது. அதுபோன்று பல்கலைக்கழக வளாகத்தில் பாதுகாப்பு போட வேண்டும் என்று சொன்னால், அதையும் ஆலோசித்து முடிவு செய்வோம். பொது இடங்களில் காவல்துறை ரோந்து மட்டும் இருக்குமே தவிர, எந்தெந்த இடங்களில் குற்றம் நடக்கும் என்று நம்மால் யூகிக்க முடியாது. குற்றம் நடத்த பிறகுதான் அந்த இடத்தை மையமாக வைத்து பாதுகாப்பு போட முடியும்.

பொள்ளாச்சி சம்பவம்

இரண்டு பேருக்கும் இடையே உள்ள பகைமையை வைத்து, அடித்துக்கொண்டு சாகிறார்கள் என்றால் அதற்கு நாம் என்ன செய்ய முடியும். உடனடியாக அவர்களை பிடித்து தண்டிக்க மட்டுமே முடியும். எங்களைப் பொறுத்தவரை குற்றவாளிகளுக்கு நாங்கள் உடந்தை இல்லை. குற்றச் சம்பவங்கள் நடைபெற்ற பிறகு, நாங்கள் விசாரணை செய்கிறோம். அதில் ஏதும் பாரபட்சம் இருந்தால் கேளுங்கள். பொள்ளாச்சி சம்பவத்தை அப்போதைய அரசாங்கம் மறைத்தது, ஆனால் நாங்கள் மறைக்கவில்லை. குற்றவாளியை கைது செய்துள்ளோம்.

பாலியல் குற்றங்களுக்கு எதிராக கடுமையான சட்டங்கள் நடைமுறையில் உள்ளது. ஆயுள் தண்டனை வரை அவர்களுக்கு வழங்கப்பட்டு வருகிறது. பாலியல் குற்றங்களில் எந்த குற்றவாளியையும் தப்பிக்கப்படுவது கிடையாது. தமிழக அரசு தொடுக்கும் வழக்குகளில் நூற்றுக்கு 90 சதவீதம் வெற்றியடைகிறது'' என இவ்வாறு அமைச்சர் கூறினார்.