வெள்ளம் பாதித்த பகுதிகளில் எவ்வளவு நாட்களுக்கு மருத்துவ முகாம்? - அமைச்சர் மா.சுப்பிரமணியன் தகவல்!

வெள்ளம் பாதித்த இடங்களில் தினமும் சிறப்பு மருத்துவ முகாம்கள் நடைபெற்று வருவதாகவும், எவ்வளவு நாட்கள் தேவைப்படுமோ அவ்வளவு நாட்கள் மருத்துவ முகாம் நடைபெறும் என மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் தெரிவித்துள்ளார்.

சென்னை: எழும்பூரில் உள்ள நலவாழ்வு மற்றும் குடும்ப நல மையத்தில் தமிழ்நாடு மாநில எய்ட்ஸ் கட்டுப்பாடு சங்கத்தின் சார்பில் உலக எய்ட்ஸ் தினம் 2024 நிகழ்ச்சி நடைபெற்றது. இந்த நிகழ்ச்சியில், மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் சிறப்பு விருந்தினராக கலந்து கொண்டு, உலக எய்ட்ஸ் தினம் 2024 உறுதிமொழியை வாசிக்க அங்கிருந்தவர்கள் அதனை ஏற்றுக் கொண்டனர்.

அதனைத் தொடர்ந்து செய்தியாளர்களை சந்தித்து பேசிய மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் கூறுகையில், "சென்னையில் கனமழை இருந்ததால் டிசம்பர் 1ஆம் தேதி நடைபெற வேண்டிய இந்த நிகழ்ச்சி அன்று நடைபெறாமல் இன்று (டிச.05) சிறப்பாக நடைபெற்றுள்ளது.

இந்த ஆண்டிற்கான உலக எய்ட்ஸ் தின கருப்பொருளாக "Take The Right Path: My Health My Right", அதாவது, "எனது ஆரோக்கியம் எனது உரிமையே சரியான வழி" என்பதாகும். ஒவ்வொரு தனி மனிதனின் தனிப்பட்ட உரிமைகளை அங்கீகரிப்பதன் மூலமே, எச்.ஐ.வி, எய்ட்ஸை முழு அளவில் கட்டுப்படுத்த முடியும் என்பதே அதன் பொருளாகும்.

எய்ட்ஸ் பாதிப்பை பொறுத்தவரை இந்தியாவில் 0.23 சதவீதமாக உள்ளது தமிழ்நாட்டில் அரசு எடுத்த நடவடிக்கை காரணமாகவும், விழிப்புணர்வு தொடர்ந்து மேற்கொண்டதாலும் தமிழ்நாட்டில் எய்ட்ஸ் 0.16 சதவீதமாக உள்ளது. இதை பூஜ்யம் நிலைக்கு கொண்டு செல்ல அரசு பல்வேறு நடவடிக்கைகளை மேற்கொண்டு வருகிறது.

தமிழ்நாட்டைப் பொறுத்தவரை எய்ட்ஸ் தொற்றை கண்டறிய 3,161 நம்பிக்கை மையங்கள் உள்ளது, எயிட்ஸ் பாதிக்கப்பட்டவர்களுக்கு இலவச சிகிச்சை அளிப்பதற்கு 74 கூட்டு மருத்துவ சிகிச்சை மையங்கள் உள்ளது. இதற்கு இணை கூட்டு சிகிச்சை மையம் என்ற வகையில் 173 இடங்களில் உள்ளது.

இதையும் படிங்க:ஃபெஞ்சல் புயல் பாதிப்பு: ஒரு மாத ஊதியத்தை நிவாரண நிதிக்கு வழங்கிய மு.க.ஸ்டாலின்!

கடந்த 2009ஆம் ஆண்டு எய்ட்ஸ் நோயால் பாதிக்கப்பட்டு குழந்தைகளுக்கு உதவ ரூ.5 கோடியை தந்து முன்னாள் முதலமைச்சர் கருணாநிதி ஒரு அறக்கட்டளையை தொடங்கினார். இந்த ஆண்டு அந்த அறக்கட்டளையின் பணம் ரூ.25 கோடியாக பெருகியுள்ளது. அதன் மூலம் வரும் வட்டி பணத்தின் மூலம் குழந்தைகளுக்கு கல்வி உதவி, ஊட்டச்சத்து உதவி பல்வேறு உதவிகள் செய்யப்பட்டு வருகிறது.

அந்த வகையில் இதுவரை 7,303 குழந்தைகளுக்கு முன்னாள் முதலமைச்சர் கருணாநிதியால் தொடங்கப்பட்ட அறக்கட்டளையின் மூலம் உதவிகள் செய்யப்பட்டுள்ளன. தமிழ்நாடு அரசு தொடர்ந்து பல்வேறு விழிப்புணர்வை ஏற்படுத்தி வருகிறது இதனால் பாதிப்பு வரும் காலங்களில் பெரிய அளவில் குறையும்" என்று தெரிவித்தார்.

மேலும் இதன் தொடர்ச்சியாக பேசிய அவர், "ஃபெஞ்சல் புயலால் ஏற்பட்ட கனமழை மற்றும் வெள்ளத்தால் பாதிக்கப்பட்ட மாவட்டங்களை பார்வையிட மத்திய குழுவினர் வர உள்ளனர். கடந்த ஆண்டு ஏற்பட்ட வெள்ள பாதிப்பை 2 மத்திய அமைச்சர்கள் மற்றும் மத்திய அரசின் ஆய்வு குழுவினர் பார்வையிட்டனர். ஆனால், ஒரு ரூபாய் நிதி கூட வரவில்லை. இந்த நிலையிலும், தமிழ்நாடு முதலமைச்சர் நிவாரணம் அறிவித்துள்ளார் அதனை எல்லோரும் பாராட்ட வேண்டும் என்று கருதுகிறேன்.

இதுமட்டும் அல்லாது, வெள்ளம் பாதித்த இடங்களில் தினமும் சிறப்பு மருத்துவ முகாம்கள் நடைபெற்று வருவதாகவும், எவ்வளவு நாட்கள் மக்களுக்கு மருத்துவ உதவிகள் தேவைப்படுமோ அவ்வளவு நாட்கள் மருத்துவ முகாம்கள் நடைபெறும்" என்று உறுதியளித்தார்.