மங்களூரு வங்கி கொள்ளை: நெல்லையைச் சேர்ந்த மூவர் கைது; ஒன்றரை கோடி மதிப்பிலான 2 கிலோ நகை, பணம் பறிமுதல்!

மங்களூரு வங்கி கொள்ளைச் சம்பவம் தொடர்பாக, நெல்லையைச் சேர்ந்த 3 பேர் கைது செய்யப்பட்டுள்ளனர். அவர்களிடம் இருந்து ரூ.1.5 கோடி மதிப்பிலான 2 கிலோ நகைகள், ரூ.3 லட்சம் ரொக்கம் உள்ளிட்டவை பறிமுதல் செய்யப்பட்டன.

திருநெல்வேலி: மங்களூரு வங்கியில் ரூ.4 கோடி மதிப்பிலான நகைகள் மற்றும் பணம் கொள்ளையடிக்கப்பட்ட சம்பவத்தில் திருநெல்வேலி மாவட்டத்தைச் சேர்ந்த 3 பேரை போலீசார் கைது செய்துள்ளனர். திருநெல்வேலியில் கைது செய்யப்பட்ட 2 பேர், நீதிமன்றத்தில் ஆஜர்படுத்தப்பட்டு மங்களூரு போலீசாரிடம் ஒப்படைக்கப்பட்டனர். அவர்களிடம் இருந்து ரூ.1.5 கோடி மதிப்பிலான 2 கிலோ நகைகள், ரூ.3 லட்சம் ரொக்கம் மற்றும் 2 நாட்டுத்துப்பாக்கி, 3 தோட்டாக்கள் பறிமுதல் செய்யப்பட்டன.

கர்நாடக மாநிலம் தட்சிணகன்னடா மாவட்டம் மங்களூரு அருகே உள்ள உல்லால் பகுதியில் கூட்டுறவு வங்கி செயல்பட்டு வருகிறது. இந்த வங்கியில், கடந்த 17ஆம் தேதி காலை 11.30 மணி அளவில் 5 பேர் கொண்ட கும்பல் முகமூடி அணிந்து, கைத்துப்பாக்கிகள், மற்றும் கத்திகளுடன் நுழைந்துள்ளது. அப்போது வங்கியில் 5 ஊழியர்கள் இருந்துள்ளனர். அந்த கும்பல் துப்பாக்கி முனையில் ஊழியர்களை மிரட்டி ரூ.4 கோடி மதிப்பிலான தங்க நகைகள் மற்றும் ரொக்கத்தை கொள்ளை அடித்து தப்பிச் சென்றது.

இது குறித்து, மங்களூரு மாநக காவல் ஆணையர் அனுபம் அகர்வால் கூறுகையில், “வங்கி கொள்ளைச் சம்பவம் குறித்து மங்களூரு போலீசார் விசாரணை மேற்கொண்டு வருகின்றனர். இச்சம்பவத்தில்,கொள்ளையர்கள் போலியான பதிவு எண் கொண்ட இரண்டு கார்களில் கேரளா நோக்கி தப்பிச் சென்றது தெரியவந்துள்ளது. மேலும், வங்கியில் பொருத்தப்பட்ட சிசிடிவி கேமராக்கள் வேலை செய்யாமல பழுதடைந்துள்ளன.

இதனையடுத்து, வங்கிக்கு வெளியே இருந்த கேமரா காட்சிகளை ஆய்வு செய்த நிலையில், கொள்ளையர்கள் கருப்பு நிற ஃபியட் காரில் தப்பிச் சென்றுள்ளனர். இதனையடுத்து, சுங்கச்சாவடி உட்பட பல்வேறு பகுதிகளில் இருந்த சிசிடிவி காட்சிகளை போலீசார் ஆய்வு செய்துள்ளனர். அதன் அடிப்படையில், கொள்ளையர்களின் கார் நம்பரை வைத்து விசாரணை செய்ததில், அவர்கள் மும்பையைச் சேர்ந்தவர்கள் என்பது தெரிய வந்துள்ளது.

மேலும், இந்த வழக்கை விசாரித்து குற்றவாளிகளை கைது செய்ய சிறப்பு குழுக்கள் அமைக்கப்பட்டுள்ளன. தொழில்நுட்ப கண்காணிப்பு அடிப்படையில் கொள்ளையர்களை விரைவில் பிடிக்க நடவடிக்கை மேற்கொள்ளப்பட்டு வருகிறது” இவ்வாறு அவர் தெரிவித்திருந்தார்.

இதனையடுத்து, மங்களூரு தனிப்படை போலீசார் மும்பை விரைந்தனர். அங்கு கண்ணன் மணி என்பவரை பிடித்து போலீசார் விசாரணை மேற்கொண்டனர். இதில், தமிழ்நாட்டின் நெல்லை மாவட்டத்தைச் சேர்ந்த அவரும், மேலும் 2 பேரும் இந்த கொள்ளை சம்பவத்தில் தொடர்புடையது தெரியவந்தது.

இது குறித்து நெல்லையைச் சேர்ந்த காவல் அலுவலர் ஒருவர் கூறியதாவது, “நெல்லை மாவட்டம் களக்காடு அருகே பத்மநேரி பகுதியைச் சேர்ந்த முருகாண்டி, கல்லிடைக்குறிச்சியைச் சேர்ந்த யோசுவா மற்றும் கண்ணன் மணி ஆகிய 3 பேரும் பல ஆண்டுகளாக மும்பையில் வசித்து வருகின்றனர். இவர்கள் மீது மும்பையில் ஏற்கனவே பல்வேறு கொள்ளை வழக்குகள் இருப்பதாக கூறப்படுகிறது. இவர்கள், குற்ற வழக்குகளில் சிறைக்கு சென்ற போது, சிறையில் இருந்த பிரபல கொள்ளை கும்பலுடன் பழக்கம் ஏற்பட்டுள்ளது.

இதையும் படிங்க:கரியாபந்த் என்கவுன்ட்டர்: சத்தீஸ்கரில் மேலும் 12 நக்சலைட்டுகள் சுட்டுக்கொலை

அவர்களுடன் இணைந்து, மங்களூரு வங்கியில் கொள்ளையடிக்க பல நாட்களாக திட்டம் தீட்டியுள்ளனர். அதன் அடிப்படையில், கடந்த 17 ஆம் தேதி மங்களூருவில் உள்ள வங்கியில், நெல்லை மாவட்டத்தைச் சேர்ந்த மூன்று பேர் மற்றும் வட மாநிலங்களைச் சேர்ந்த 14 பேர் என மொத்தம் 20 பேர் துப்பாக்கிமுனையில் பணம் மற்றும் நகையை கொள்ளையடித்தது சென்றுள்ளனர்.

மேலும், கொள்ளையடித்த பணத்தை தனித்தனியாக பங்கு போட்டு, ஆளுக்கு ஒரு திசையில் தப்பி சென்றதாக கூறப்படுகிறது. இதில், கண்ணன் மணி உள்பட நெல்லையை சேர்ந்த 3 பேர் மும்பைக்கு சென்றுள்ளனர். போலீசார் தங்களை தேடுவது அறிந்த 3 பேரும் சொந்த ஊரான நெல்லை மாவட்டத்திற்கு வர முடிவு செய்துள்ளனர். ஆனால், கண்ணன் மணி சொந்த ஊருக்கு செல்ல விரும்பாத காரணத்தால், யோசுவா மற்றும் முருகாண்டி ஆகிய இருவரும் நெல்லை மாவட்டம் களக்காட்டிற்கு வந்துள்ளனர்.

இதற்கிடையே, கண்ணன் மணியை மங்களூரு போலீசார் மும்பையில் கைது செய்துள்ளனர். தொடர்ந்து அவர் அளித்த தகவலின் அடிப்படையில் நேற்று (ஜனவரி 20) திங்கட்கிழமை, மங்களூரு போலீசார் நெல்லை மாவட்ட காவல்துறை உதவியுடன் யோசுவா மற்றும் முருகாண்டியை கைது செய்துள்ளனர். தொடர்ந்து, அவர்களிடம் இருந்து ரூ.1.5 கோடி மதிப்பிலான 2 கிலோ நகைகள், ரூ.3 லட்சம் ரொக்கம் மற்றும் 2 நாட்டுத்துப்பாக்கி, 3 தோட்டாக்கள் பறிமுதல் செய்யப்பட்டன.

இந்த நிலையில், நெல்லையில் கைது செய்த இரண்டு பேரும் இன்று (ஜனவரி 21) செவ்வாய்க்கிழமை மாலை நெல்லை மாவட்ட நீதிமன்றத்தில் ஆஜர்படுத்தி, மங்களூரு போலீசாரிடம் ஒப்படைக்கப்பட்டனர்.” இவ்வாறு அவர் தெரிவித்தார்.

தேசிய அளவில் பரபரப்பை ஏற்படுத்திய மங்களூரு வங்கி கொள்ளை வழக்கில் தமிழ்நாட்டின் நெல்லை மாவட்டத்தைச் சேர்ந்த 3 பேர் கைது செய்யப்பட்ட சம்பவம் பெரும் பரபரப்பை ஏற்படுத்தியுள்ளது.