சட்டவிரோத கொடிக்கம்பம் விவகாரம்; நெடுஞ்சாலைகள் ஆணையத்திற்கு பதிலளிக்க தமிழக அரசுக்கு உத்தரவு!

Madras High Court: தேசிய நெடுஞ்சாலைகளில் சட்டவிரோதமாக வைக்கப்படும் அரசியல் கட்சி கொடிக்கம்பங்களை அகற்ற ஒத்துழைப்பு அளிப்பதில்லை என்ற தேசிய நெடுஞ்சாலைகள் ஆணையத்தின் குற்றச்சாட்டுக்கு பதிலளிக்கும்படி, தமிழக அரசுக்கு சென்னை உயர் நீதிமன்றம் உத்தரவிட்டுள்ளது.

சென்னை: தமிழகத்தில் தேசிய நெடுஞ்சாலைகளில் அரசியல் கட்சிகள் சட்டவிரோதமாக கொடிக் கம்பங்களை நட்டுள்ளதாக சென்னையைச் சேர்ந்த வழக்கறிஞர் ராமலிங்கம், சென்னை உயர் நீதிமன்றத்தில் மனுத்தாக்கல் செய்திருந்தார்.

அந்த மனுவில், “அரசியல் கட்சிகள் சட்டவிரோதமாக நெடுஞ்சாலைகளில் கொடிக் கம்பங்கள் நடுவது பொதுமக்களுக்கு அச்சுறுத்தலாக உள்ளது. பள்ளி வாகனங்கள், ஆம்புலன்ஸ்களின் போக்குவரத்து பாதிக்கப்பட்டுள்ளது. அரசியல் கட்சிகள் தேசிய நெடுஞ்சாலைக்குச் சொந்தமான நிலத்தை ஆக்கிரமித்து, அரசியல் மேடையாக பயன்படுத்துகின்றன.

தகவல் அறியும் உரிமைச் சட்டத்தின் கீழ் கேட்கப்பட்ட கேள்விக்கு, தேசிய நெடுஞ்சாலைகள் ஆணையம், சென்னை - தடா, கோயம்பேடு - மதுரவாயல் உள்பட மூன்று பகுதிகளில், 40 சட்டவிரோத கொடிக்கம்பங்கள் உள்ளதாகவும், மதுரவாயல் முதல் வாலாஜாபேட்டை இடையே, காஞ்சிபுரம் மாவட்டத்தில் 34 சட்டவிரோத கொடிக்கம்பங்களும், ராணிப்பேட்டை மாவட்டத்தில் 14 சட்டவிரோத கொடிக் கம்பங்களும் இருப்பதாக பதிலளித்துள்ளது. எனவே, தேசிய நெடுஞ்சாலைகளில் சட்டவிரோத வைக்கப்பட்ட கொடிக்கம்பங்களை அகற்ற உத்தரவிட வேண்டும்” என மனுவில் குறிப்பிடப்பட்டுள்ளது.

இந்த மனுவானது, தலைமை நீதிபதி சஞ்சய் கங்கபுர்வாலா மற்றும் நீதிபதி பரத சக்கரவர்த்தி அமர்வில் இன்று விசாரணைக்கு வந்தது. அப்போது இந்திய தேசிய நெடுஞ்சாலைகள் ஆணையம் தரப்பில், “அரசியல் கட்சிகள் சட்டவிரோதமாக அமைத்துள்ள கொடிக் கம்பங்களை அகற்ற தமிழக அரசும், காவல் துறையும் ஒத்துழைப்பு வழங்குவதில்லை” என்று புகார் தெரிவிக்கப்பட்டது.

இதையடுத்து, வழக்கை விசாரித்த நீதிபதிகள், “தமிழக தலைமைச் செயலாளர் தாமாக முன் வந்து எதிர்மனுதாரராக சேர்த்து, நெடுஞ்சாலைகளில் சட்டவிரோதமாக வைக்கப்படும் அரசியல் கட்சி கொடிக்கம்பங்களை அகற்ற ஒத்துழைப்பு அளிப்பதில்லை என்ற தேசிய நெடுஞ்சாலைகள் ஆணையத்தின் குற்றச்சாட்டுக்கு பதிலளிக்கும்படி உத்தரவிட்டு, வழக்கின் விசாரணையை மார்ச் 11ஆம் தேதிக்கு ஒத்தி வைத்தனர்.

மேலும், நெடுஞ்சாலைகளில் உள்ள சட்டவிரோத கொடிக் கம்பங்களை அகற்றும்படி உயர் நீதிமன்றம் பல உத்தரவுகளை பிறப்பித்துள்ளதாக சுட்டிக்காட்டிய நீதிபதிகள், அவற்றை அகற்றாதது நீதிமன்ற அவமதிப்பு செயல் எனவும் எச்சரித்தனர்.

இதையும் படிங்க:உதயநிதி நேரில் ஆஜராக சம்மன்! சனாதன விவகாரத்தில் பெங்களூரு நீதிமன்றம் தீர்ப்பு!