கேத்தாண்டப்பட்டி எருது விடும் விழா; மாடுகளை துன்புறுத்தியதாக குற்றச்சாட்டு!

Tirupathur Bull race festival: திருப்பத்தூர் அடுத்த கேத்தாண்டப்பட்டி கிராமத்தில் நடைபெற்ற எருது விடும் விழாவில் 200க்கும் மேற்பட்ட காளைகள் சீறிப் பாய்ந்தன.

திருப்பத்தூர்: திருப்பத்தூர் மாவட்டம் நாட்றம்பள்ளி அடுத்த கேத்தாண்டப்பட்டி கிராமத்தில் எருது விடும் விழா நேற்று (பிப்.15) நடைபெற்றது. இதில் தருமபுரி, கிருஷ்ணகிரி, திருவண்ணாமலை, வேலூர், திருப்பத்தூர் மற்றும் ஆந்திர மாநிலத்தின் சில பகுதிகளிலிருந்து 200க்கும் மேற்பட்ட காளைகள் பங்கேற்று, விழாவில் சீறிப் பாய்ந்தன.

இந்த விழாவில், 2 ஆயிரத்திற்கும் மேற்பட்ட மாடுபிடி வீரர்கள் மற்றும் ஊர் மக்கள் என ஏராளமானோர் கலந்து கொண்டனர். விழாவில் நாட்றம்பள்ளி பகுதியைச் சேர்ந்த ஒருவரின் காளை சீறிப் பாய்ந்து ஓடிக் கொண்டிருந்தபோது, கொனமந்தை அருகே இருந்த 30 அடி ஆழமுள்ள கிணற்றில் தவறி விழுந்தது.

அதன் பின்னர், பாதுகாப்பு பணியில் இருந்த தீயணைப்பு மற்று மீட்புப் படை வீரர்கள் விரைந்து சென்று, மாட்டை உயிருடன் மீட்டு உரிமையாளரிடம் ஒப்படைத்தனர். இதனிடையே, இந்த விழாவில் பள்ளி மாணவர்கள் சிலர் சீருடையுடன் சீறிப் பாய்ந்து ஓடும் காளையை அடித்து விளையாடினர்.

குறைந்த நேரத்தில் நிர்ணயிக்கப்பட்ட தொலைவை கடந்து செல்லும் காளைகளுக்கு பரிசுகள் வழங்கப்பட்டன. அந்த வகையில், முதல் பரிசாக 1 லட்சம் ரூபாயும், இரண்டாம் பரிசாக 70 ஆயிரம் ரூபாயும், மூன்றாம் பரிசாக 60 ஆயிரம் ரூபாயும் வழங்கப்பட்டுள்ளது. குறிப்பாக, இந்த எருது விடும் விழாவின் பாதுகாப்பு கருதி 50க்கும் மேற்பட்ட போலீசார் பாதுகாப்பு பணியில் ஈடுபடுத்தப்பட்டனர்.

மேலும், இப்பகுதியில் நடக்கும் எருது விடும் விழாவில் பங்கேற்கும் காளைகளின் பின்புறம் மற்றும் வால் பகுதிகளில் இரும்பு கிளிப்புகள் மாட்டியும், காளைகளின் வயிற்றுப் பகுதியில் கயிற்றால் இறுக்கியும் காளைகள் துன்புறுத்தும் வகையில் நடத்தப்படுவதாக சமூக ஆர்வலர்கள் குற்றம் சாட்டுகின்றனர்.

இதையும் படிங்க:பூந்தமல்லி அருகே குப்பைத் தொட்டியில் இருந்து குழந்தை மீட்பு; சென்னையில் தொடரும் அவலம்!