யானைகளுடன் கட்சிக் கொடி.. த.வெ.க-வுக்கு தேர்தல் ஆணையம் வழங்கிய அறிவுரை என்ன? - TVK Flag Symbol Issue

தமிழக வெற்றிக் கழகம் கொடியில் உள்ள யானை சின்னத்திற்காக பகுஜன் சமாஜ் கட்சி அளித்த புகாருக்கு, இந்திய தேர்தல் ஆணையம் பதிலளித்துள்ள சம்பவம் அரசியல் வட்டாரத்தில் பெரும் பரபரப்பை ஏற்படுத்தியுள்ளது.

சென்னை: தமிழக வெற்றிக் கழகம் (Tamilaga Vettri Kazhagam) எனும் கட்சியைத் தொடங்கி 2026 சட்டமன்றத் தேர்தலை இலக்காக நிர்ணயத்து, புதிய அரசியல் பயணத்தைத் தொடங்கியிருக்கும் விஜய், தனது கட்சியின் முதல் மாநில மாநாட்டை அடுத்த மாதம் 27ஆம் தேதி விழுப்புரம் மாவட்டம் விக்கிரவாண்டியில் நடத்தவிருக்கிறார்.

அரசியல் கட்சி தொடங்கிய பிறகு நடைபெறும் முதல் மாநில மாநாட்டில் கட்சியின் கொடிக்கான விளக்கத்தையும், கொள்கை முழக்கத்தையும் அறிவிப்பார் என்பதால் அந்த மாநாடு தமிழக அரசியலில் மிகவும் முக்கியத்துவம் வாய்ந்த மாநாடாகப் பார்க்கப்படுகிறது.

இதற்கிடையில் கடந்த மாதம் தமிழக வெற்றிக் கழகத்தின் கொடி அறிமுக நிகழ்ச்சியோடு பாடல் வெளியீட்டு நிகழ்ச்சியும் நடைபெற்றது. அப்போது, விஜய் ஏற்றி வைத்து அறிமுகப்படுத்திய தமிழக வெற்றிக் கழகத்தின் கொடி பெரும் சர்ச்சையானது.

அதாவது த.வெ.க(TVK) கொடியில் இடம்பெற்றிருந்த யானைகளின் உருவம் ஏற்கனவே தேசிய அளவில் அங்கீகரிக்கப்பட்ட அரசியல் கட்சியான பகுஜன் சமாஜ் கட்சியின் சின்னமாக இருப்பதாகக் கூறி அக்கட்சியின் தலைவர்கள் தேர்தல் ஆணையத்தில் புகார் அளித்தனர். மேலும், தமிழக வெற்றிக் கழகத்தின் கட்சிக் கொடியில் இருக்கும் யானைகளின் சின்னத்தை அகற்ற வேண்டும் என வலியுறுத்திய நிலையில், அது தொடர்பாக தேர்தல் ஆணையத்திற்கு கடிதமும் எழுதியிருந்தனர்.

தொடர்ந்து, பகுஜன் சமாஜ் கட்சி அனுப்பிய கடிதத்திற்குக் கடந்த மாதம் 30ஆம் தேதி இந்திய தேர்தல் ஆணையம் அனுப்பிய கடிதத்தின் நகல் பிரபல தனியார் தொலைக்காட்சிக்கு பிரத்தியேகமாகக் கிடைத்திருக்கிறது. அதில், "அரசியல் கட்சியாகப் பதிவு செய்யப்பட்ட கட்சிகளுக்கு தேர்தல் நெருங்கும் நேரத்தில் சின்னம் வழங்கப்படும். அதே நேரத்தில் அரசியல் கட்சிகளின் கொடிகளைப் பொறுத்த வரையில், தேர்தல் ஆணையம் ஒப்புதலும் தருவதுமில்லை, அங்கீகாரமும் தருவதில்லை என்ற தெளிவான விளக்கத்தையும் இந்திய தேர்தல் ஆணையம் அளித்திருந்தது.

இதன்மூலம் தமிழக வெற்றிக் கழகத்தின் கொடிக்கு எந்தவித பிரச்சினையும் இல்லை என்றாலும் கூட, சின்னங்கள் மற்றும் பெயர்கள் (முறையற்ற பயன்பாடு தடுப்புச் சட்டம்) 1950க்கு உட்பட்ட வகையில் கொடிகள் இருப்பதை உறுதி செய்ய வேண்டும். மேலும் இந்திய தேர்தல் ஆணையத்திற்கு உட்பட்டு இருப்பதை அந்தந்த கட்சிகள் உறுதி செய்ய வேண்டும் எனவும், மற்றொரு அரசியல் கட்சிகளின் கொடிகளை ஒத்த தோற்றம் உடைய வகையில் கொடிகள் அமைவதைத் தவிர்க்க வேண்டும்" எனவும் அறிவுறுத்தியுள்ளது குறிப்பிடத்தக்கது.

ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறியஇங்கே க்ளிக் செய்யவும்