"ஆதாரம் இல்லாமல் பேசுவது முதலமைச்சருக்கு அழகல்ல" - நீட் தேர்வு குறித்து நாராயணன் திருப்பதி சாடல்! - BJP Narayanan Thirupathy

BJP Narayanan Thirupathy: நீட் தேர்வில் குளறுபடி நடந்துள்ளதாக முதலமைச்சர் ஒரு குற்றச்சாட்டை முன் வைக்கும் பொழுது, அதற்கான அடிப்படை ஆதாரங்கள் ஏதும் இல்லாமல் பொத்தாம் பொதுவாக கூறக்கூடாது என பாஜக மாநில துணைத்தலைவர் நாராயணன் திருப்பதி தெரிவித்துள்ளார்.

சென்னை: தி.நகரில் உள்ள பாஜக தலைமை அலுவலகமான கமலாலயத்தில், பாஜக மாநில துணைத் தலைவர் நாராயணன் திருப்பதி இன்று (ஜூன் 8) செய்தியாளர்களைச் சந்தித்தார். அப்போது அவர் பேசுகையில், “தேர்தல் பரபரப்புகளுக்கு இடையில் நீட் தேர்வு முடிவுகள் வெளியானது. தற்பொழுது புதிதாக நீட் தேர்வு குறித்து பல்வேறு சர்ச்சைக்குரிய தகவல்களை தமிழக முதலமைச்சர் மு.க.ஸ்டாலின் தெரிவித்து வருகிறார். இதில் எந்தவித அடிப்படை ஆதாரமும் இல்லாமல் அவர் இந்த குற்றச்சாட்டுகளை தெரிவித்து வருகிறார்.

ஏழை எளிய கிராமப்புற மாணவர்கள் வரை தற்பொழுது மருத்துவப் படிப்புகளை எளிதாக படிக்க முடிவதற்கு காரணமாக இருப்பது இந்த நீட் தேர்வு தான். குறிப்பாக, கடந்த காலங்களில் ஒரு சில குறிப்பிட்ட மாவட்டங்களைத் தவிர வேறு எந்த மாவட்டத்திலும் மருத்துவப் படிப்புகளில் மாணவர்கள் இல்லாத நிலை இருந்தது. ஆனால், நீட் தேர்வு வந்த பிறகு அப்படி அனைத்து மாவட்டத்திலும் மாணவர்கள் மருத்துவ படிப்பில் பயிலக் கூடியதைப் பார்க்க முடிகிறது.

மேலும், ஒரு மாநிலத்தின் முதலமைச்சர் ஒரு குற்றச்சாட்டை முன் வைக்கும் பொழுது, அதற்கான அடிப்படை ஆதாரங்கள் ஏதும் இல்லாமல் பொத்தாம் பொதுவாக கூறக்கூடாது. அப்படி கூறுவது ஒரு முதலமைச்சருக்கு அழகு இல்லை” என்றார்.

மேலும், முன்னாள் அமைச்சர் ஜெயக்குமார் தண்ணீரும் இலையும் இனி ஒட்டுவதற்கான வாய்ப்பே கிடையாது என்று கூறியதற்கு பதில் அளித்தவர், “தண்ணீர் எப்பொழுதும் ஒரே மாதிரியாகத்தான் இருக்கும். ஆனால், இலை அப்படி இல்லை. இலை கருகி விட்டால் தண்ணீருடன் ஒட்டாது” என்றார்.

தொடர்ந்து பேசியவர், பாஜகவுடன் இனி எந்த காலத்திலும் கூட்டணி இல்லை என்று அதிமுக பொதுச் செயலாளர் எடப்பாடி பழனிசாமி கூறி இருப்பது தனக்கு வேடிக்கையாக உள்ளதாகவும், தேர்தல் முடிந்து முடிவுகள் வெளியாகி உள்ள நிலையில் ஏன் தற்பொழுது கூட்டணி பற்றி அவர் பேச வேண்டும் என கேள்வி எழுப்பினார்.

மேலும், பாஜகவுடன் கூட்டணியிலிருந்து சட்டமன்றத் தேர்தலைச் சந்தித்ததால் தான் அதிமுகவைச் சேர்ந்த நாங்கள் தோல்வி அடைந்தோம் என முன்பு கூறினார். ஆனால், இப்பொழுது பாஜகவுடன் அதிமுகவினர் கூட்டணியில் இல்லை. இருந்தபோதிலும் அவர்கள் ஏன் தோற்றார்கள் என்பதை அவர்கள் கூற முடியுமா என்றார்.

அண்ணாமலையை தமிழகத்தில் அடையாளம் காட்டியது அதிமுக தான் என கூறுவது ஏற்றுக்கொள்ள முடியாத ஒன்று எனவும், 1996ல் நாங்கள் சட்டமன்ற உறுப்பினராகவும் இருந்தோம் என்பதை அவர்கள் மறந்து விட்டார்கள் போல என்றார். பாஜகவில் உள்ள உறுப்பினர்கள் சொல்லும் அனைத்து கருத்துகளையும் தேசிய தலைமை கேட்டறிந்து அதற்கு பிறகு தான் முடிவு எடுக்கும். அதனால் சமூக வலைத்தளங்களில் வரக்கூடிய கருத்துக்களையோ அல்லது பொறுப்பில் இல்லாத யாரோ ஒருவர் சொல்லும் கருத்துக்களையும் வைத்துக் கொண்டு இங்கு ஏதும் கூற முடியாது என்றார்.