சென்னை: சென்னை மற்றும் அதன் புறநகர் பகுதிகளில் இரண்டாவது நாளாக இன்றைய தினம் பிற்பகலிலும் திடீரென இடி மின்னல் சூறைக் காற்றுடன் கூடிய மழை பெய்தது. அந்த வகையில், சென்னை விமான நிலைய பகுதிகளிலும் கனமழை பெய்ததால், இரண்டாவது நாளாக இன்றும் சென்னை விமான நிலையத்தில் விமான சேவைகள் பாதிக்கப்பட்டன.
குறிப்பாக, திருவனந்தபுரத்திலிருந்து சென்னை உள்நாட்டு விமான நிலையத்திற்கு 136 பயணிகளுடன் வந்து கொண்டு இருந்த இண்டிகோ ஏர்லைன்ஸ் பயணிகள் விமானம், டெல்லியில் இருந்து சென்னை உள்நாட்டு விமான நிலையத்திற்கு 147 பயணிகளுடன் வந்து கொண்டு இருந்த இண்டிகோ ஏர்லைன்ஸ் பயணிகள் விமானம், அபுதாபியில் இருந்து சென்னை சர்வதேச விமான நிலையத்திற்கு 188 பயணிகளுடன் வந்து கொண்டிருந்த எத்தியாட் ஏர்லைன்ஸ் பயணிகள் விமானம், திருச்சியிலிருந்து 72 பயணிகளுடன் சென்னை உள்நாட்டு விமான நிலையத்திற்கு வந்து கொண்டிருந்த இண்டிகோ ஏரோலின் பயணிகள் விமானம் ஆகிய விமானங்கள் சென்னையில் தரையிறங்க முடியாமல் வானிலே வட்டம் அடித்து பறந்து கொண்டிருந்தன.