கோவையில் பேருந்து நிலையத்தை லாரிப்பேட்டையாக மாற்ற தீர்மானம்.. அதிமுக கடும் கண்டனம்!

கோயம்புத்தூரில் அதிமுக ஆட்சியில் கொண்டுவரப்பட்ட பேருந்து நிலையத்தை லாரி பேட்டையாக மாற்றுவதற்கு, மாநகராட்சி கூட்டத்தில் தீர்மானம் நிறைவேற்றப்பட்டதால் தீர்மானத்திற்கு எதிர்ப்பு தெரிவித்து அதிமுக கவுன்சிலர்கள் போராட்டத்தில் ஈடுபட்டுள்ளனர்.

கோயம்புத்தூர்:கடந்த அதிமுக ஆட்சியில், வெள்ளலூர் பகுதியில் ஒருங்கிணைந்த பேருந்து நிலையம் 61 ஏக்கர் பரப்பளவில் அமைக்க திட்டமிடப்பட்டுள்ளது. ரூ.160 கோடி மதிப்பீட்டில் திட்டமிடப்பட்ட பணிகள் நடைபெற்ற இத்திட்டத்தில், 37 சதவீதம் வரை பணிகள் நடைபெற்று முடிந்துள்ளது. இதனையடுத்து, திமுக ஆட்சிக்கு வந்த பின்னர் வெள்ளலூர் ஒருங்கிணைந்த புதிய பேருந்து நிலைய கட்டுமான பணிகள் நிறுத்தப்பட்டுள்ளது.

தொடர்ந்து ஒருங்கிணைந்த பேருந்து நிலையம் வேறு பகுதிக்கு இடமாற்றம் செய்ய திட்டமிடப்பட்டுள்ளதாகவும் தகவல் வெளியாகியது. இதனால், அதே பகுதியில் ஒருங்கிணைந்த பேருந்து நிலையம் அமைக்கப்பட வேண்டும் என அதிமுக சார்பில் வலியுறுத்தப்பட்டது. ஆனால், நீண்ட காலமாக ஒருங்கிணைந்த பேருந்து நிலைய திட்டம் கிடப்பில் போடப்பட்டுள்ளது.

தீர்மானம் நிறைவேற்றம்:

இந்நிலையில், கோவை மாநகராட்சி சாதாரண கூட்டம் கோவை மேயர் தலைமையில், மாநகராட்சி அலுவலகத்தில் இன்று (டிசம்பர் 30 ) திங்கட்கிழமை நடைபெற்றுள்ளது. இதில், வெள்ளலூரில் கட்டப்பட்டு வரும் ஒருங்கிணைந்த பேருந்து நிலையம் லாரிப்பேட்டையாகவும், காய்கறி சந்தையாகவும் மாற்றப்படும் என்று 90 வது தீர்மான பொருளாக கொண்டு வரப்பட்டுள்ளது.

இதற்கு அதிமுக கவுன்சிலர்கள் பிரபாகரன், ரமேஷ், சர்மிளா ஆகியோர் எதிர்ப்பு தெரிவிக்கும் வாசகங்கள் அடங்கிய பேனருடன் கூட்டத்தில் கலந்து கொண்டுள்ளனர். மேலும், இது குறித்து விவாதிக்க அனுமதிக்க வேண்டும் கேட்டுக்கொண்டுள்ளனர். இந்த நிலையில், மாமன்ற கூட்டத்தில் தொடர்ச்சியாக அதிமுக கவுன்சிலர்கல் மட்டுமே பேசிக்கொண்டு இருப்பதாகவும், பிற கவுன்சிலர்களுக்கு வாய்ப்பு அளிக்க வேண்டும் என திமுக கவுன்சிலர்கள் எதிர்ப்பு தெரிவித்துள்ளனர். இதனால், மாநகராட்சி கூட்ட அரங்கில் பரபரப்பான சூழல் நிலவியது.

இதனைத் தொடர்ந்து, அதிமுக கவுன்சிலர்கள் பிரபாகரன், ரமேஷ், ஷர்மிளா ஆகிய மூன்று பேரும் மேயர் இருக்கை முன்பாக தரை அமர்ந்து கொண்டு முழக்கம் எழுப்பினர். தொடர்ந்து, திமுக - அதிமுக கவுன்சிலர்கள் இருவரும் மாறி மாறி வாக்குவாதம் செய்து கொண்டுள்ளனர். இதனால், மாநகராட்சி கூட்ட அரங்கில் கூச்சல் குழப்பமான சூழல் நிலவியது.

இதையும் படிங்க:ஆளுநரை சந்தித்த தவெக தலைவர் விஜய்.. உடனே அண்ணாமலை கொடுத்த ரியாக்ஷன்..!

இதனையடுத்து, அதிமுக கவுன்சிலர்களின் கேள்விகளுக்கு பதில் அளிக்கப்படும் எனவும், பேசுவதற்கு உரிய வாய்ப்பு அளிக்கப்படும் என மாநகராட்சி ஆணையர் தெரிவித்ததை தொடர்ந்து அதிமுக கவுன்சிலர்கள் அவர்களது இருக்கையில் அமர்ந்துள்ளனர்.

தொடர்ந்து, ஒருங்கிணைந்த பேருந்து நிலையத்தை லாரிப்பேட்டையாக மாற்றும் தீர்மானத்திற்கு எதிர்ப்பு தெரிவித்து, அதிமுக கவுன்சிலர்கள் பிரபாகரன், ரமேஷ், சர்மிளா ஆகிய மூவரும் முழக்கமிட்டபடி கூட்ட அரங்கில் இருந்து வெளிநடப்பு செய்தனர். மாநகராட்சி கூட்ட அரங்கின் வாயிலில் அமர்ந்து போராட்டத்தில் ஈடுபட்டுள்ளனர்.

பேருந்து நிலையத்திற்காக பொது மக்களின் பணம் ரூ.52 கோடி வரை செலவழிக்கப்பட்டுள்ள நிலையில், தற்போது ஒருங்கிணைந்த பேருந்து நிலையத்தை லாரிப்பேட்டையாகவும், காய்கறி, பழ சந்தையாக மாற்ற தீர்மானம் நிறைவேற்றப்பட்டுள்ளது. இதனால், வெள்ளலூர் குப்பை கிடங்கில் இருந்து வெளியேறும் துர்நாற்றம் மற்றும் கிருமிகளால் காய்கறி சந்தை மற்றும் பழ சந்தைகளில் நோய் தொற்று ஏற்படும் சூழல் உருவாகும். எனவே, இதை ஏற்கனவே திட்டமிட்டபடி ஒருங்கிணைந்த பேருந்து நிலையமாகவே செயல்படுத்த வேண்டும்” என போராட்டத்தில் ஈடுபட்டவர்கள் கோரிக்கை வைத்துள்ளனர்.