ਚਿੰਟੂ ਕਤਲ ਮਾਮਲੇ 'ਚ ਪੁਲਿਸ ਨੇ ਆਰੋਪੀ ਨੂੰ ਕੀਤਾ ਕਾਬੂ

31 ਅਕਤੂਬਰ ਨੂੰ ਹੋਏ ਚਿੰਟੂ ਕਤਲ ਮਾਮਲੇ 'ਚ ਜਲੰਧਰ ਦਿਹਾਤੀ ਪੁਲਿਸ ਨੇ ਆਰੋਪੀ ਨੂੰ ਕਾਬੂ ਕੀਤਾ ਹੈ। ਜਿਸ ਕੋਲੋਂ ਪਿਸਤੌਲ ਅਤੇ ਚਾਰ ਜ਼ਿੰਦਾ ਕਾਰਤੂਸ ਬਰਾਮਦ ਕੀਤੇ ਗਏ ਹਨ।

ਜਲੰਧਰ: ਪੁਲਿਸ ਨੇ ਫਿਲੌਰ ਵਿੱਚ ਹੋਏ ਚਿੰਟੂ ਬਲਾਈਂਡ ਕਤਲ ਕੇਸ ਨੂੰ ਟਰੇਸ ਕਰ ਇੱਕ ਆਰੋਪੀ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਸ 'ਤੇ ਜਾਣਕਾਰੀ ਦਿੰਦੇ ਹੋਏ ਐੱਸਐੱਸਪੀ ਨਵਜੋਤ ਸਿੰਘ ਮਾਹਲ ਨੇ ਦੱਸਿਆ ਕਿ ਪਿਛਲੇ ਸਾਲ 31 ਅਕਤੂਬਰ ਨੂੰ ਹਰਪ੍ਰੀਤ ਸਿੰਘ ਉਰਫ਼ ਚਿੰਟੂ ਦਾ ਕਤਲ ਕੀਤਾ ਗਿਆ ਸੀ। ਚਿੰਟੂ 'ਤੇ ਫਾਇਰਿੰਗ ਕੀਤੀ ਗਈ ਸੀ ਅਤੇ ਉਸ ਨੂੰ 13 ਗੋਲੀਆਂ ਲੱਗੀਆਂ ਸਨ।

ਪੁਲਿਸ ਨੇ ਉਸ ਸਮੇਂ ਅਗਿਆਤ ਲੋਕਾਂ 'ਤੇ ਮਾਮਲਾ ਦਰਜ ਕੀਤਾ ਸੀ। ਇਸ ਬਲਾਈਂਡ ਕਤਲ ਕੇਸ ਨੂੰ ਸੁਲਝਾਉਣ ਲਈ ਐਸਐਸਪੀ ਨਵਜੋਤ ਸਿੰਘ ਮਾਹਲ ਨੇ ਇੱਕ ਟੀਮ ਦਾ ਗਠਨ ਕੀਤਾ ਸੀ। ਜਿਸ ਵਿੱਚ ਦਿਹਾਤੀ ਪੁਲਸ ਦੇ ਉੱਚ ਅਧਿਕਾਰੀ ਅਤੇ ਨਾਲ ਸੀਆਈਏ ਸਟਾਫ ਦੇ ਪ੍ਰਭਾਰੀ ਸ਼ਿਵ ਕੁਮਾਰ ਨੂੰ ਇਸ ਕੇਸ ਨੂੰ ਟਰੇਸ ਕਰਨ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਸੀ, ਜਿਸ 'ਤੇ ਕਾਰਵਾਈ ਕਰਦੇ ਹੋਏ ਸੀਆਈਏ ਪੁਲਿਸ ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਅਕਤੂਬਰ ਮਹੀਨੇ ਵਿੱਚ ਲਾਂਬੜਾ ਤੋਂ ਆਲਟੋ ਗੱਡੀ ਕਰਤਾਰਪੁਰ ਦੇ ਇਲਾਕੇ ਵਿੱਚ ਆਈ ਹੈ ਜਿਸ ਤੇ ਕਾਰਵਾਈ ਕਰਦੇ ਹੋਏ ਅੱਡਾ ਦਿਆਲਪੁਰ ਤੋਂ ਗੱਡੀ ਵਿੱਚ ਸਵਾਰ ਅਰੋਪੀ ਕੰਵਲਜੀਤ ਸਿੰਘ ਉਰਫ ਕਮਲ ਪੁੱਤਰ ਰਛਪਾਲ ਸਿੰਘ ਵਾਸੀ ਫਿਰੋਜ਼ਪੁਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ।

ਤਲਾਸ਼ੀ ਦੌਰਾਨ ਆਰੋਪੀ ਕੋਲੋਂ ਪਿਸਤੌਲ ਅਤੇ ਚਾਰ ਜਿੰਦਾ ਕਾਰਤੂਸ ਬਰਾਮਦ ਕੀਤੇ ਗਏ ਹਨ। ਪੁੱਛਗਿੱਛ ਦੌਰਾਨ ਆਰੋਪੀ ਨੇ ਦੱਸਿਆ ਕਿ ਫਿਲੌਰ ਵਿੱਚ ਹੋਏ ਚਿੰਟੂ ਮਰਡਰ ਕੇਸ ਵਿੱਚ ਨਵਪ੍ਰੀਤ ਸਿੰਘ ਉਰਫ ਨਵੀ ਨੇ ਉਸ ਨੂੰ ਚਿੰਟੂ ਦੀ ਸੁਪਾਰੀ ਦਿੱਤੀ ਸੀ। ਉਸ ਦੇ ਨਾਲ ਹਰਪ੍ਰੀਤ ਸਿੰਘ ਢਿੱਡੀ ਸਤਵੰਤ ਸਿੰਘ ਅਤੇ ਅਨੁਜ ਅਰੋੜਾ ਨੇ ਪਿਸਤੌਲ ਦੀ ਨੋਕ 'ਤੇ ਪਹਿਲਾਂ ਲਾਂਬੜੇ ਤੋਂ ਇੱਕ ਗੱਡੀ ਖੋਹੀ ਅਤੇ ਫਿਰ ਫਿਲੌਰ ਜਾ ਕੇ ਚਿੰਟੂ ਦਾ ਮਰਡਰ ਕਰ ਦਿੱਤਾ ਸੀ। ਆਰੋਪੀ ਦੇ ਕੋਲੋਂ ਇੱਕ ਪਿਸਤੌਲ ਬਰਾਮਦ ਹੋਈ ਹੈ ਜੋ ਕਿ ਇਸ ਮਰਡਰ ਕੇਸ ਵਿੱਚ ਇਸਤੇਮਾਲ ਹੋਈ ਸੀ। 6 ਜਨਵਰੀ ਨੂੰ ਨਵੀ ਨੇ ਟਿੱਡੀ ਕੋਲੋਂ ਪੈਸੇ ਲੈਣ ਲਈ ਉਸ ਨੂੰ ਸੋਨੀਪਤ ਬੁਲਾਇਆ ਜਿੱਥੇ ਉਸ ਨੇ ਟਿੱਡੀ ਅਤੇ ਸਤਵੰਤ 'ਤੇ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਵਿੱਚ ਟਿੱਡੀ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਸੀ।

ਐਸਐਸਪੀ ਨਵਜੋਤ ਸਿੰਘ ਮਾਹਲ ਨੇ ਦੱਸਿਆ ਕਿ ਚਿੰਟੂ ਅਤੇ ਨਵੀਂ ਵੱਡੇ ਪੱਧਰ 'ਤੇ ਅੰਤਰਰਾਸ਼ਟਰੀ ਹੈਰੋਇਨ ਸਮਗਲਿੰਗ ਦਾ ਕਾਰੋਬਾਰ ਕਰਦੇ ਸੀ।