ਹੈਦਰਾਬਾਦ:ਰੈਟਰੋ-ਆਧੁਨਿਕ ਬਾਈਕ ਨਿਰਮਾਤਾ ਕੰਪਨੀ ਰਾਇਲ ਐਨਫੀਲਡ ਦੀ ਕਲਾਸਿਕ 350 ਭਾਰਤੀ ਬਾਜ਼ਾਰ 'ਚ ਸਭ ਤੋਂ ਮਸ਼ਹੂਰ ਬਾਈਕਸ 'ਚੋਂ ਇੱਕ ਹੈ। ਹੁਣ ਰਾਇਲ ਐਨਫੀਲਡ ਨੇ ਆਪਣਾ 2024 ਰਾਇਲ ਐਨਫੀਲਡ ਕਲਾਸਿਕ 350 ਮਾਡਲ ਭਾਰਤ ਵਿੱਚ ਲਾਂਚ ਕਰ ਦਿੱਤਾ ਹੈ। ਇਸ ਨਵੇਂ ਮੋਟਰਸਾਈਕਲ ਦੀ ਬੁਕਿੰਗ ਵੀ ਸ਼ੁਰੂ ਹੋ ਗਈ ਹੈ ਅਤੇ ਕੰਪਨੀ ਨੇ ਕੀਮਤ ਬਾਰੇ ਵੀ ਖੁਲਾਸਾ ਕਰ ਦਿੱਤਾ ਹੈ। ਧਿਆਨ ਯੋਗ ਹੈ ਕਿ ਰਾਇਲ ਐਨਫੀਲਡ ਨੇ 12 ਅਗਸਤ ਨੂੰ ਮੋਟਰਸਾਈਕਲ ਦੇ ਅਪਡੇਟਿਡ ਮਾਡਲ ਨੂੰ ਪੇਸ਼ ਕੀਤਾ ਸੀ, ਪਰ ਇਸਦੀ ਕੀਮਤ ਅੱਜ ਸਾਹਮਣੇ ਆਈ ਹੈ। ਕਲਾਸਿਕ 350 ਦੇ 2024 ਮਾਡਲ ਨੂੰ ਸੂਖਮ ਵਿਜ਼ੂਅਲ ਅਪਡੇਟ ਅਤੇ ਕੁਝ ਵਾਧੂ ਫੀਚਰਸ ਦੇ ਨਾਲ ਪੇਸ਼ ਕੀਤਾ ਗਿਆ ਹੈ, ਜਦਕਿ ਇਸ ਵਿੱਚ ਕੋਈ ਮਕੈਨੀਕਲ ਬਦਲਾਅ ਨਹੀਂ ਕੀਤੇ ਗਏ ਹਨ।
2024 Royal Enfield Classic 350 ਦੀ ਕੀਮਤ: ਲਾਂਚਿੰਗ ਦੇ ਨਾਲ ਹੀ ਇਸ ਮੋਟਰਸਾਈਕਲ ਦੀ ਕੀਮਤ ਬਾਰੇ ਵੀ ਜਾਣਕਾਰੀ ਸਾਹਮਣੇ ਆ ਗਈ ਹੈ। 2024 Royal Enfield Classic 350 ਦੀ ਕੀਮਤ 1,99,500 ਰੁਪਏ ਰੱਖੀ ਗਈ ਹੈ। ਇਸਦੇ ਨਾਲ ਹੀ, ਅੱਜ ਕੰਪਨੀ ਨੇ 2024 Royal Enfield Classic 350 ਦੀ ਬੁੱਕਿੰਗ ਵੀ ਸ਼ੁਰੂ ਕਰ ਦਿੱਤੀ ਹੈ।
ਕੀ ਹੋਏ ਬਦਲਾਅ: ਬਲਬ-ਟਾਈਪ ਹੈੱਡਲੈਂਪਸ ਅਤੇ ਟਾਈਗਰ ਲੈਂਪਾਂ ਦੀ ਥਾਂ 'ਤੇ ਹੁਣ LED ਯੂਨਿਟਾਂ ਦੀ ਵਰਤੋਂ ਕੀਤੀ ਗਈ ਹੈ। ਇਸਦੇ ਨਾਲ ਹੀ ਐਡਜਸਟੇਬਲ ਕਲਚ ਅਤੇ ਬ੍ਰੇਕ ਲੀਵਰ ਵੀ ਸ਼ਾਮਲ ਕੀਤੇ ਗਏ ਹਨ। ਇਸ ਦੇ ਟਾਪ-ਸਪੈਕ ਵੇਰੀਐਂਟ ਵਿੱਚ LED ਟਰਨ ਇੰਡੀਕੇਟਰ ਦੇਖਣ ਨੂੰ ਮਿਲਣਗੇ, ਜਦਕਿ ਹੇਠਲੇ ਟ੍ਰਿਮਸ ਵਿੱਚ ਬਲਬ ਇੰਡੀਕੇਟਰ ਵਰਤੇ ਗਏ ਹਨ। ਹਾਲਾਂਕਿ, ਰਾਇਲ ਐਨਫੀਲਡ ਨੇ ਨਵੇਂ ਕਲਾਸਿਕ 350 ਦੇ ਇੰਸਟਰੂਮੈਂਟ ਕਲੱਸਟਰ 'ਚ ਕੋਈ ਬਦਲਾਅ ਨਹੀਂ ਕੀਤਾ ਹੈ ਪਰ ਹੁਣ ਇਸ ਨੇ ਆਪਣੀ ਛੋਟੀ LCD ਡਿਸਪਲੇ 'ਚ ਗਿਅਰ ਪੋਜੀਸ਼ਨ ਇੰਡੀਕੇਟਰ ਨੂੰ ਸ਼ਾਮਲ ਕੀਤਾ ਹੈ। ਇਸ ਤੋਂ ਇਲਾਵਾ, USB-C ਚਾਰਜਿੰਗ ਪੋਰਟ ਵੀ ਬਾਈਕ 'ਚ ਸ਼ਾਮਲ ਕੀਤੇ ਗਏ।