ਕਿਸਾਨਾਂ ਨੇ ਬਾਰਡਰਾਂ ਅਤੇ ਔਰਤਾਂ ਨੇ ਘਰਾਂ ਵਿੱਚ ਸੰਭਾਲੇ ਮੋਰਚੇ, ਖੇਤੀਬਾੜੀ ਦੇ ਨਾਲ ਪਸ਼ੂਆਂ ਦੀ ਵੀ ਦੇਖਭਾਲ ਕਰ ਰਹੀਆਂ ਨੇ ਔਰਤਾਂ

ਹੱਕੀ ਮੰਗਾਂ ਲਈ ਪੰਜਾਬ ਦੇ ਕਿਸਾਨ ਇਸ ਸਮੇਂ ਬਾਰਡਰਾਂ ਉੱਤੇ ਸਰਕਾਰ ਨਾਲ ਮੱਥਾ ਲੈਕੇ ਬੈਠੇ ਹਨ। ਅੰਮ੍ਰਿਤਸਰ ਵਿੱਚ ਕਿਸਾਨਾਂ ਦੇ ਬਾਰਡਰ ਉੱਤੇ ਜਾਣ ਮਗਰੋਂ ਖੇਤੀਬਾੜੀ ਅਤੇ ਪਸ਼ੂਆਂ ਦੀ ਦੇਖਭਾਲ ਦਾ ਕੰਮ ਹੁਣ ਮਹਿਲਾਵਾਂ ਸੰਭਾਲ ਰਹੀਆਂ ਹਨ।

ਅੰਮ੍ਰਿਤਸਰ: ਬੀਤੀ 13 ਫਰਵਰੀ ਤੋਂ ਜਿੱਥੇ ਵੱਖ-ਵੱਖ ਕਿਸਾਨ ਜਥੇਬੰਦੀਆਂ ਨਾਲ ਜੁੜੇ ਕਿਸਾਨ ਆਗੂ ਪਿੰਡਾਂ ਸ਼ਹਿਰਾਂ ਵਿੱਚੋਂ ਉੱਠ ਕੇ ਹਰਿਆਣੇ ਦੇ ਵੱਖ-ਵੱਖ ਬਾਰਡਰਾਂ ਦੇ ਉੱਤੇ ਦਿੱਲੀ ਕੂਚ ਕਰਨ ਦੇ ਲਈ ਜਦੋ-ਜਹਿਦ ਕਰਦੇ ਨਜ਼ਰ ਆ ਰਹੇ ਹਨ ਉੱਥੇ ਹੀ ਜੇਕਰ ਕਿਸਾਨ ਬਾਰਡਰਾਂ ਉੱਤੇ ਡਟੇ ਹਨ ਅਤੇ ਉਹਨਾਂ ਵੱਲੋਂ ਵੱਖ-ਵੱਖ ਮੋਰਚੇ ਸੰਭਾਲੇ ਜਾ ਰਹੇ ਹਨ। ਉੱਥੇ ਹੀ ਪਿੱਛੇ ਘਰਾਂ ਵਿੱਚ ਬੈਠੀਆਂ ਸੁਆਣੀਆਂ ਵੱਲੋਂ ਬੰਦਿਆਂ ਵਾਂਗ ਘਰਾਂ ਦੇ ਹਰ ਇੱਕ ਕੰਮ ਨੂੰ ਖੁਸ਼ੀ-ਖੁਸ਼ੀ ਪੂਰਾ ਕਰਦਿਆਂ ਆਸ ਕੀਤੀ ਜਾ ਰਹੀ ਹੈ ਕਿ ਜੇਕਰ ਉਹਨਾਂ ਦੇ ਪੁੱਤ, ਭਰਾ, ਪਿਤਾ ਅਤੇ ਪਤੀ ਹੱਕੀ ਨੀ ਮੰਗਾਂ ਲਈ ਲੜ ਰਹੇ ਹਨ ਤਾਂ ਇੱਕ ਦਿਨ ਜਰੂਰ ਉਹ ਕਿਸਾਨੀ ਮੋਰਚਾ ਜਿੱਤ ਕੇ ਜਲਦ ਘਰ ਵਾਪਸ ਪਰਤਣਗੇ।

ਘਰ ਸੰਭਾਲ ਰਹੀਆਂ ਔਰਤਾਂ ਦਾ ਕਹਿਣਾ ਹੈ ਕਿ ਘਰ ਦੇ ਪਰਿਵਾਰਕ ਜੀ ਦਿੱਲੀ ਮੋਰਚੇ ਉੱਤੇ ਗਏ ਹਨ ਅਤੇ ਉਹ ਘਰ ਦੇ ਵਿੱਚ ਰਸੋਈ ਤੋਂ ਲੈ ਕੇ ਪਸ਼ੂਆਂ ਅਤੇ ਪੈਲੀ ਦੇ ਸਾਰੇ ਕੰਮ ਕਾਜ ਨੂੰ ਸਾਂਭ ਰਹੀਆਂ ਹਨ। ਗੱਲਬਾਤ ਦੌਰਾਨ ਔਰਤਾਂ ਦਾ ਕਹਿਣਾ ਹੈ ਕਿ ਸਾਡੇ ਮਰਦ ਕੇਂਦਰ ਸਰਕਾਰ ਕੋਲੋਂ ਆਪਣਾ ਹੱਕ ਮੰਗਣ ਲਈ ਮੋਰਚੇ ਉੱਤੇ ਗਏ ਹੋਏ ਹਨ ਅਤੇ ਅਸੀਂ ਚਾਹੁੰਦੇ ਹਾਂ ਕਿ ਉਹ ਆਪਣੇ ਹੱਕ ਲੈ ਕੇ ਹੀ ਵਾਪਸ ਆਉਣ। ਉਹਨਾਂ ਕਿਹਾ ਕਿ ਅਸੀਂ ਆਪਣੇ ਮਰਦਾਂ ਨੂੰ ਕਿਹਾ ਹੈ ਕਿ ਚਾਹੇ ਤਹਾਨੂੰ ਜਿਨ੍ਹਾਂ ਚਿਰ ਮਰਜ਼ੀ ਧਰਨੇ ਉੱਤੇ ਬੈਠਣਾ ਪਵੇ ਤੁਸੀਂ ਆਪਣੇ ਹੱਕ ਲੈ ਕੇ ਹੀ ਵਾਪਸ ਮੁੜਨਾ ਹੈ। ਉਹਨਾਂ ਕਿਹਾ ਕਿ ਉਹ ਘਰ ਦਾ ਫ਼ਿਕਰ ਨਾ ਕਰਨ ਉਨ੍ਹਾਂ ਨੂੰ ਘਰ ਚੰਗੀ ਤਰ੍ਹਾਂ ਸੰਭਾਲਣਾ ਆਉਂਦਾ ਹੈ।

• ਪਾਰਦਰਸ਼ਤਾ ਹੀ ‘ਘਰ-ਘਰ ਮੁਫਤ ਰਾਸ਼ਨ’ ਸਕੀਮ ਦੀ ਮੁੱਖ ਵਿਸ਼ੇਸ਼ਤਾ : ਲਾਲ ਚੰਦ ਕਟਾਰੂਚੱਕ
  
  ਮੋਰਚੇ ਉੱਤੇ ਗਏ ਇੱਕ ਕਿਸਾਨ ਦੀ ਮਾਂ ਅਤੇ ਪਤਨੀ ਨੇ ਕਿਹਾ ਕਿ ਕੇਂਦਰ ਸਰਕਾਰ ਕਿਸਾਨਾਂ ਨਾਲ ਜੁਲਮ ਕਰ ਰਹੀ ਹੈ । ਉਹ ਸ਼ਾਂਤਮਈ ਤਰੀਕੇ ਨਾਲ ਆਪਣਾ ਹੱਕ ਮੰਗ ਰਹੇ ਹਨ ਪਰ ਫਿਰ ਵੀ ਸਰਕਾਰ ਕਿਸਾਨਾਂ ਉੱਤੇ ਤਸ਼ੱਦਦ ਕਰ ਰਹਾ। ਔਰਤਾਂ ਨੇ ਕਿਹਾ ਕਿ ਉਹ ਕੇਂਦਰ ਅਤੇ ਹਰਿਆਣਾ ਸਰਕਾਰ ਨਾਲ ਮੱਥਾ ਲਾ ਰਹੇ ਕਿਸਾਨਾਂ ਦੇ ਨਾਲ ਹਨ ਭਾਵੇਂ ਕਿੰਨਾ ਵੀ ਸਮਾਂ ਲੱਗ ਜਾਵੇ ਪਰ ਸੰਘਰਸ਼ ਕਰ ਰਹੇ ਕਿਸਾਨਾਂ ਦਾ ਉਹ ਘਰ ਅਤੇ ਜ਼ਮੀਨ ਸੰਭਾਲ ਕੇ ਸਾਥ ਦੇਣਗੀਆਂ।