ਲਾਪਤਾ ਬੱਚਿਆਂ ਦੀ ਯਾਦ 'ਚ ਮਨਾਇਆ ਜਾਂਦਾ ਹੈ ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ, ਜਾਣੋ ਕਿਵੇਂ ਹੋਈ ਸੀ ਇਸਦੀ ਸ਼ੁਰੂਆਤ - International Missing Childrens Day

International Missing Children's Day: ਹਰ ਸਾਲ 25 ਮਈ ਨੂੰ ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਮਨਾਇਆ ਜਾਂਦਾ ਹੈ। ਇਹ ਦਿਨ ਲਾਪਤਾ ਬੱਚਿਆਂ ਦੀ ਯਾਦ ਵਿੱਚ ਮਨਾਇਆ ਜਾਂਦਾ ਹੈ।

ਹੈਦਰਾਬਾਦ: ਬਾਲ ਸੁਰੱਖਿਆ ਅਤੇ ਸੁਰੱਖਿਅਤ ਬਚਪਨ ਪ੍ਰਦਾਨ ਕਰਨ ਦੇ ਉਦੇਸ਼ ਨਾਲ ਹਰ ਸਾਲ 25 ਮਈ ਨੂੰ ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਮਨਾਇਆ ਜਾਂਦਾ ਹੈ। ਇਸ ਦਿਨ ਦੁਨੀਆ ਭਰ ਵਿੱਚ ਲਾਪਤਾ ਬੱਚਿਆਂ ਨੂੰ ਯਾਦ ਕੀਤਾ ਜਾਂਦਾ ਹੈ। ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਮਨਾਉਣ ਦਾ ਐਲਾਨ ਸਾਲ 1983 ਵਿੱਚ ਕੀਤਾ ਗਿਆ ਸੀ। ਅਮਰੀਕੀ ਰਾਸ਼ਟਰਪਤੀ ਰੋਨਾਲਡ ਰੀਗਨ ਨੇ ਇਸ ਦਿਨ ਨੂੰ ਮਨਾਉਣ ਦਾ ਐਲਾਨ ਕੀਤਾ ਸੀ। 25 ਮਈ 2001 ਨੂੰ ਇੰਟਰਨੈਸ਼ਨਲ ਸੈਂਟਰ ਫਾਰ ਮਿਸਿੰਗ ਐਂਡ ਐਕਸਪਲੋਇਟਿਡ ਚਿਲਡਰਨ, ਮਿਸਿੰਗ ਚਿਲਡਰਨ ਯੂਰਪ ਅਤੇ ਯੂਰਪੀਅਨ ਕਮਿਸ਼ਨ ਦੇ ਸਾਂਝੇ ਯਤਨਾਂ ਦੁਆਰਾ ਪਹਿਲੀ ਵਾਰ ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਦੀ ਸਥਾਪਨਾ ਕੀਤੀ ਗਈ ਸੀ।

ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਦਾ ਇਤਿਹਾਸ: 25 ਮਈ 1979 ਨੂੰ 6 ਸਾਲਾ ਲੜਕਾ ਈਟਨ ਪੈਟਜ਼ ਨਿਊਯਾਰਕ ਵਿੱਚ ਬੱਸ ਰਾਹੀਂ ਸਕੂਲ ਜਾਂਦੇ ਸਮੇਂ ਲਾਪਤਾ ਹੋ ਗਿਆ ਸੀ। ਪਹਿਲੀ ਵਾਰ ਕਿਸੇ ਬੱਚੇ ਦੇ ਲਾਪਤਾ ਹੋਣ ਦੀ ਘਟਨਾ ਨੇ ਪੂਰੇ ਅਮਰੀਕਾ ਵਿੱਚ ਭੂਚਾਲ ਮਚਾ ਦਿੱਤਾ ਸੀ। ਏਟਨ ਪੈਟਜ਼ ਦੇ ਪਿਤਾ ਇੱਕ ਫੋਟੋਗ੍ਰਾਫਰ ਸਨ। ਉਨ੍ਹਾਂ ਨੇ ਆਪਣੇ ਬੱਚੇ ਦੀ ਬਲੈਕ ਐਂਡ ਵ੍ਹਾਈਟ ਤਸਵੀਰ ਜਾਰੀ ਕੀਤੀ ਸੀ, ਜਿਸ ਰਾਹੀਂ ਉਸ ਨੂੰ ਲੱਭਣ ਦੀ ਅਪੀਲ ਕੀਤੀ ਗਈ ਸੀ। ਇਸ ਤੋਂ ਬਾਅਦ ਹਰ ਸਾਲ 25 ਮਈ ਨੂੰ ਅਮਰੀਕਾ 'ਚ ਰਾਸ਼ਟਰੀ ਪੱਧਰ 'ਤੇ ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਮਨਾਇਆ ਜਾਣ ਲੱਗਾ। ਸਾਲ 2001 ਵਿੱਚ 25 ਮਈ ਨੂੰ ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਮਨਾਉਣ ਦੀ ਸ਼ੁਰੂਆਤ ਹੋਈ ਸੀ। 25 ਮਈ ਹੁਣ ਵਿਆਪਕ ਤੌਰ 'ਤੇ ਅੰਤਰਰਾਸ਼ਟਰੀ ਗੁੰਮਸ਼ੁਦਾ ਬਾਲ ਦਿਵਸ ਵਜੋਂ ਜਾਣਿਆ ਜਾਂਦਾ ਹੈ।

ਏਟਨ ਪੈਟਜ਼ ਦਾ ਕਤਲ: ਦੱਸ ਦਈਏ ਕਿ ਅਮਰੀਕਾ ਦੇ ਨਿਊਯਾਰਕ ਸ਼ਹਿਰ ਤੋਂ ਲਾਪਤਾ ਹੋਏ ਬੱਚੇ ਏਟਨ ਪੈਟਜ਼ ਦਾ ਕਤਲ ਹੋ ਗਿਆ ਸੀ, ਜਿਸਦਾ ਖੁਲਾਸਾ ਲਗਭਗ ਤਿੰਨ ਦਹਾਕਿਆਂ ਬਾਅਦ ਹੋਇਆ ਸੀ। ਉਸ ਬੱਚੇ ਦੇ ਕਤਲ ਦੀ ਗੱਲ ਪੇਡਰੋ ਹਰਨਾਂਡੇਜ਼ ਨਾਂ ਦੇ ਵਿਅਕਤੀ ਨੇ ਕਬੂਲ ਕੀਤੀ ਸੀ। ਉਸ ਨੇ ਦੱਸਿਆ ਸੀ ਕਿ ਮੈਂ ਬੱਚੇ ਦਾ ਸਕੂਲ ਜਾਂਦੇ ਸਮੇਂ ਕਤਲ ਕਰ ਦਿੱਤਾ ਸੀ।