ਚੰਡੀਗੜ੍ਹ: ਪੰਜਾਬੀ ਸਿਨੇਮਾ ਅਤੇ ਮਿਊਜ਼ਿਕ ਵੀਡੀਓਜ਼ ਦੇ ਖੇਤਰ ਵਿੱਚ ਆਪਣੀ ਨਾਯਾਬ ਅਦਾਕਾਰੀ ਦੇ ਮੱਦੇਨਜ਼ਰ ਚੋਖੀ ਭੱਲ ਕਾਇਮ ਕਰਨ ਵਿੱਚ ਸਫਲ ਰਹੀ ਹੈ ਅਦਾਕਾਰਾ ਦਿਲਜੋਤ, ਜੋ ਆਪਣੀ ਘੁਮੱਕੜ ਸ਼ੌਂਕ ਦੇ ਚੱਲਦਿਆਂ ਇੰਨੀਂ-ਦਿਨੀਂ ਰਾਜਸਥਾਨ ਦੇ ਖੂਬਸੂਰਤ ਸ਼ਹਿਰ ਜੈਪੁਰ ਪੁੱਜੀ ਹੋਈ ਹੈ, ਜੋ ਅਗਲੇ ਕੁਝ ਦਿਨ ਇਸ ਗੁਲਾਬੀ ਨਗਰੀ ਦੇ ਮਨਮੋਹਕ ਨਜ਼ਾਰਿਆਂ ਦਾ ਆਨੰਦ ਮਾਣੇਗੀ।
ਓਟੀਟੀ ਪਲੇਟਫ਼ਾਰਮ 'ਤੇ ਅਗਲੇ ਦਿਨੀਂ ਰਿਲੀਜ਼ ਹੋਣ ਜਾ ਰਹੀ ਆਪਣੀ ਵੈੱਬ-ਸੀਰੀਜ਼ 'ਪਲੱਸਤਰ' ਨੂੰ ਲੈ ਕੇ ਇੰਨੀਂ ਦਿਨੀਂ ਕਾਫ਼ੀ ਚਰਚਾ ਦਾ ਕੇਂਦਰ ਬਿੰਦੂ ਬਣੀ ਹੋਈ ਹੈ ਇਹ ਹੋਣਹਾਰ ਅਦਾਕਾਰਾ, ਜੋ ਇਸ ਡਰਾਮਾ ਫਿਲਮ ਵਿੱਚ ਮਹੱਤਵਪੂਰਨ ਅਤੇ ਲੀਡਿੰਗ ਕਿਰਦਾਰ ਅਦਾ ਕਰਦੀ ਨਜ਼ਰੀ ਪਵੇਗੀ।
'ਚੌਪਾਲ ਸਟੂਡੀਓਜ਼' ਵੱਲੋਂ ਨਿਰਮਿਤ ਕੀਤੀ ਗਈ ਉਕਤ ਵੈੱਬ ਸੀਰੀਜ਼ ਦਾ ਲੇਖਨ ਪ੍ਰਿੰਸ ਕੰਵਲਜੀਤ ਸਿੰਘ ਵੱਲੋਂ ਕੀਤਾ ਗਿਆ ਹੈ, ਜਦ ਇਸ ਦੇ ਨਿਰਦੇਸ਼ਕ ਐਮਜੀ ਮੇਹੁਲ ਗਦਾਨੀ ਹਨ।
ਦੇਸ਼-ਵਿਦੇਸ਼ ਦੇ ਵੱਖ-ਵੱਖ ਖੂਬਸੂਰਤ ਹਿੱਸਿਆਂ ਵਿੱਚ ਘੁੰਮਣ ਫਿਰਨ ਵਿੱਚ ਉੱਥੇ ਦੀਆਂ ਪ੍ਰਮੁੱਖ ਸੈਲਾਨੀ ਜਗਾਵਾਂ ਨੂੰ ਵੇਖਣ ਵਿੱਚ ਖਾਸੀ ਦਿਲਚਸਪੀ ਰੱਖਦੀ ਹੈ ਇਹ ਬਾਕਮਾਲ ਅਦਾਕਾਰਾ, ਜੋ ਹਾਲੀਆ ਦਿਨਾਂ ਵਿੱਚ ਕੈਨੇਡਾ ਸਮੇਤ ਕਈ ਵਿਦੇਸ਼ੀ ਹਿੱਸਿਆਂ ਦਾ ਟੂਰ ਇਸੇ ਸ਼ੌਂਕ ਸਿਲਸਿਲੇ ਅਧੀਨ ਕਰ ਚੁੱਕੀ ਹੈ, ਜਿੰਨਾਂ ਅਨੁਸਾਰ ਰਾਜਸਥਾਨ ਦਾ ਜੈਪੁਰ ਉਨਾਂ ਦੀਆਂ ਮਨਪਸੰਦ ਡੈਸਟੀਨੇਸ਼ਨ ਵਿੱਚ ਹਮੇਸ਼ਾ ਸ਼ਾਮਿਲ ਰਿਹਾ ਹੈ, ਜਿੱਥੇ ਸ਼ੂਟਿੰਗ ਰੁਝੇਵਿਆਂ ਵਿੱਚੋਂ ਫੁਰਸਤ ਦਾ ਸਮੇਂ ਮਿਲਦਿਆਂ ਹੀ ਉਹ ਫੁਰਸਤ ਦਾ ਸਮਾਂ ਬਿਤਾਉਣਾ ਕਾਫ਼ੀ ਪਸੰਦ ਕਰਦੀ ਹੈ।
ਉਨਾਂ ਅੱਗੇ ਦੱਸਿਆ ਕਿ ਗੁਲਾਬੀ ਨਗਰੀ ਵਜੋਂ ਜਾਣੇ ਜਾਂਦੇ ਇਸ ਵਿਰਾਸਤੀ ਅਤੇ ਇਤਿਹਾਸਿਕ ਸ਼ਹਿਰ ਦੇ ਆਸਪਾਸ ਪੇਂਡੂ ਖੇਤਰ ਵੀ ਉਨਾਂ ਦੀ ਇਸ ਯਾਤਰਾ ਦਾ ਵਿਸ਼ੇਸ਼ ਹਿੱਸਾ ਰਹਿਣਗੇ, ਜਿਸ ਦੌਰਾਨ ਇੱਥੇ ਦੇ ਸੱਭਿਆਚਾਰ ਅਤੇ ਲੋਕ ਨਾਚ ਦੀਆਂ ਵੱਖ-ਵੱਖ ਵੰਨਗੀਆਂ ਨੂੰ ਹੋਰ ਨੇੜਿਓ ਜਾਣਨਾ ਵੀ ਉਸ ਦੀ ਤਰਜ਼ੀਹ ਰਹੇਗੀ।
ਹਾਲੀਆ ਕਰੀਅਰ ਦੌਰਾਨ ਕਈ ਬਿਹਤਰੀਨ ਫਿਲਮਾਂ ਦਾ ਬਤੌਰ ਲੀਡ ਅਦਾਕਾਰਾ ਹਿੱਸਾ ਰਹੀ ਇਹ ਦਿਲਕਸ਼ ਅਦਾਕਾਰਾ ਆਉਣ ਵਾਲੇ ਦਿਨਾਂ ਵਿੱਚ ਵੀ ਕਈ ਪੰਜਾਬੀ ਫਿਲਮਾਂ, ਓਟੀਟੀ ਪ੍ਰੋਜੈਕਟਸ ਅਤੇ ਮਿਊਜ਼ਿਕ ਵੀਡੀਓਜ਼ ਵਿੱਚ ਆਪਣੀ ਸ਼ਾਨਦਾਰ ਮੌਜ਼ੂਦਗੀ ਦਾ ਇਜ਼ਹਾਰ ਕਰਵਾਉਣ ਜਾ ਰਹੀ ਹੈ, ਜਿਸ ਸੰਬੰਧੀ ਹੋਰ ਵਿਸਥਾਰਕ ਜਾਣਕਾਰੀ ਸਾਂਝੀ ਕਰਦਿਆਂ ਉਨਾਂ ਦੱਸਿਆ ਕਿ ਕਮਰਸ਼ਿਅਲ ਦੇ ਨਾਲ-ਨਾਲ ਕੁਝ ਆਫਬੀਟ ਫਿਲਮਾਂ ਵੀ ਕਰਨ ਨੂੰ ਪਹਿਲ ਦੇ ਰਹੀ ਹਾਂ, ਤਾਂਕਿ ਕੁਝ ਵੱਖਰਾ ਕਰਨ ਦਾ ਮੌਕਾ ਮਿਲ ਸਕੇ।
