OTT ਉਤੇ ਸਭ ਤੋਂ ਜਿਆਦਾ ਦੇਖੀ ਜਾਣ ਵਾਲੀ ਫਿਲਮ ਬਣੀ 'ਅਮਰ ਸਿੰਘ ਚਮਕੀਲਾ', ਹੁਣ ਤੱਕ ਮਿਲੇ ਇੰਨੇ ਵਿਊਜ਼ - Amar Singh Chamkila

Amar Singh Chamkila Became Most Watched Film on OTT: ਦਿਲਜੀਤ ਦੁਸਾਂਝ ਅਤੇ ਪਰਿਣੀਤੀ ਚੋਪੜਾ ਦੀ ਫਿਲਮ 'ਅਮਰ ਸਿੰਘ ਚਮਕੀਲਾ' OTT ਉਤੇ ਸਭ ਤੋਂ ਜਿਆਦਾ ਦੇਖੀ ਜਾਣ ਵਾਲੀ ਫਿਲਮ ਬਣ ਗਈ ਹੈ। ਅੱਧ ਸਾਲ ਦੀ ਰਿਪੋਰਟ ਮੁਤਾਬਕ ਫਿਲਮ ਨੇ ਕਾਫੀ ਚੰਗੇ ਵਿਊਜ਼ ਪ੍ਰਾਪਤ ਕੀਤੇ ਹਨ।

ਹੈਦਰਾਬਾਦ:ਪੰਜਾਬ ਦੇ ਮਰਹੂਮ ਗਾਇਕ 'ਅਮਰ ਸਿੰਘ ਚਮਕੀਲਾ' ਦੇ ਜੀਵਨ ਉਤੇ ਬਣੀ ਫਿਲਮ 'ਅਮਰ ਸਿੰਘ ਚਮਕੀਲਾ' ਲੋਕਾਂ ਨੂੰ ਕਾਫੀ ਪਸੰਦ ਆ ਰਹੀ ਹੈ। ਫਿਲਮ 2024 ਦੀ ਸਭ ਤੋਂ ਜਿਆਦਾ OTT ਉਤੇ ਦੇਖੀ ਜਾਣ ਵਾਲੀ ਫਿਲਮ ਬਣ ਗਈ ਹੈ। ਅੱਧ ਸਾਲ ਦੀ ਰਿਪੋਰਟ ਦੇ ਮੁਤਾਬਕ ਫਿਲਮ ਨੇ ਹੁਣ ਤੱਕ 12.9 ਮਿਲੀਅਨ ਵਿਊਜ਼ ਪ੍ਰਾਪਤ ਕੀਤੇ ਹਨ। ਫਿਲਮ ਵਿੱਚ ਦਿਲਜੀਤ ਦੁਸਾਂਝ ਅਤੇ ਪਰਿਣੀਤੀ ਦੀ ਐਕਟਿੰਗ ਨੇ ਕਾਫੀ ਤਾਰੀਫ਼ਾਂ ਹਾਸਿਲ ਕੀਤੀਆਂ ਹਨ।

ਤੁਹਾਨੂੰ ਦੱਸ ਦੇਈਏ ਕਿ 'ਅਮਰ ਸਿੰਘ ਚਮਕੀਲਾ' ਦਾ ਕਿਰਦਾਰ ਦਿਲਜੀਤ ਦੁਸਾਂਝ ਨੇ ਨਿਭਾਇਆ ਹੈ, ਗਾਇਕ ਨੇ ਆਪਣੀ ਦਮਦਾਰ ਆਵਾਜ਼ ਦੇ ਨਾਲ ਲੋਕਾਂ ਨੂੰ ਕਾਫੀ ਖਿੱਚਿਆ। ਦੁਸਾਂਝ ਨੇ ਚਮਕੀਲਾ ਦੀ ਪੂਰੀ ਸ਼ਖਸੀਅਤ ਨੂੰ ਕਾਫੀ ਸੋਹਣੇ ਢੰਗ ਨਾਲ ਫੜ੍ਹਿਆ ਅਤੇ ਉਸ ਨੂੰ ਬਾਖੂਬੀ ਤਰੀਕੇ ਨਾਲ ਸਕ੍ਰੀਨ ਉਤੇ ਪੇਸ਼ ਕੀਤਾ। ਫਿਲਮ ਦਾ ਸੰਗੀਤ ਸਦਾਬਹਾਰ ਗੀਤਾਂ ਵਿੱਚ ਸ਼ਾਮਿਲ ਹੋ ਗਿਆ ਹੈ, ਜੋ ਕਿ ਲੋਕਾਂ ਨੂੰ ਕਾਫੀ ਪਸੰਦ ਆ ਰਿਹਾ ਹੈ।

ਦੂਜੇ ਪਾਸੇ ਜੇਕਰ ਪਰਿਣੀਤੀ ਚੋਪੜਾ ਦੇ ਕਿਰਦਾਰ ਬਾਰੇ ਗੱਲ ਕਰੀਏ ਤਾਂ ਉਸ ਨੇ ਮਰਹੂਮ ਗਾਇਕ ਚਮਕੀਲਾ ਦੀ ਦੂਜੀ ਪਤਨੀ ਅਮਰਜੋਤ ਕੌਰ ਦਾ ਕਿਰਦਾਰ ਨਿਭਾਇਆ ਹੈ। ਫਿਲਮ ਵਿੱਚ ਚਮਕੀਲਾ ਅਤੇ ਉਸ ਦੀ ਗਾਇਕਾ ਪਤਨੀ ਦਾ ਕਾਫੀ ਪਿਆਰ ਦਿਖਾਇਆ ਜਾਂਦਾ ਹੈ। ਉਸ ਦੀ ਪਤਨੀ ਸਾਰੀਆਂ ਮੁਸੀਬਤਾਂ ਵਿੱਚ ਉਸ ਦੇ ਨਾਲ ਖੜ੍ਹੀ ਰਹਿੰਦੀ ਹੈ।

ਫਿਲਮ ਨੇ ਗਾਇਕ ਪ੍ਰਤੀ ਬਣੇ ਲੋਕਾਂ ਦੇ ਕਾਫੀ ਭਰਮ-ਭਲੇਖੇ ਤੋੜ੍ਹੇ। ਹਾਲਾਂਕਿ ਕੁੱਝ ਗੱਲਾਂ ਨੂੰ ਸਿਰਫ਼ ਬਿੰਬਾਂ ਰਾਹੀਂ ਹੀ ਵਿਅਕਤ ਕੀਤਾ ਗਿਆ। ਇਮਤਿਆਜ਼ ਅਲੀ ਦੁਆਰਾ ਨਿਰਦੇਸ਼ਤ ਇਸ ਫਿਲਮ ਦੀ ਅਰਥ ਭਰਪੂਰ ਕਹਾਣੀ ਨੇ ਫਿਲਮ ਨੂੰ ਦੂਜੀਆਂ ਫਿਲਮਾਂ ਦੀ ਅਲੱਗ ਸ਼੍ਰੇਣੀ ਵਿੱਚ ਸ਼ਾਮਲ ਕਰ ਦਿੱਤਾ।