ବ୍ରହ୍ମପୁରରେ ନବରାତ୍ର ପୂଜା, ଚଣ୍ଡୀପାଠରେ କମ୍ପିଲା ପରିବେଶ - NAVRATRI PUJA
Published : Oct 11, 2024, 10:56 PM IST
ବ୍ରହ୍ମପୁର: ଦୁର୍ଗାପୂଜାରେ ଉତ୍ସବ ମୁଖର ରେଶମ ସହର ବ୍ରହ୍ମପୁର । ବିଭିନ୍ନ ପୂଜା ମଣ୍ଡପରେ ଚାଲିଛି ମା' ଜଗତଜନନୀଙ୍କ ଆରାଧନା । ସହରର ନେହୁରୁ ପାର୍କ ସ୍ଥିତ ପୂଜା ମଣ୍ଡପରେ ମା'ଙ୍କ ପୁଜାର୍ଚ୍ଚନା ଚାଲିଥିବାବେଳେ ମା'ଙ୍କୁ ଦର୍ଶନ କରିବାକୁ ଜମିଛି ଭକ୍ତଙ୍କ ଭିଡ । ସେପଟେ ଗତ 9 ଦିନ ଧରି ମା'ଙ୍କର ପୂଜାର୍ଚ୍ଚନା ଚାଲିଥିବାବେଳେ ଆଜି ରାତ୍ରରେ ହେବ ପୂର୍ଣ୍ଣାହୂତି । ମୁଖ୍ୟତଃ ମା'ଙ୍କ ସକାଳର ସୂର୍ଯ୍ୟପୂଜାଠାରୁ ଆରମ୍ଭ କରି ରାତ୍ରର ଷୋଡଷ ଉପଚାର ପୂଜା, ଚଣ୍ଡୀପାଠ ପର୍ଯ୍ୟନ୍ତ ସମସ୍ତ ପ୍ରକାର ପୂଜାର୍ଚ୍ଚନା କରାଯାଉଛି ।
ନେହରୁ ପାର୍କ ଦୁର୍ଗାପୂଜା କମିଟି ପକ୍ଷରୁ ଶାରଦୀୟ ପୂଜା ପାଇଁ ଚଳିତବର୍ଷ ସମସ୍ତ ପ୍ରକାର ପ୍ରସ୍ତୁତି କରାଯାଇଥିବାବେଳେ ବିଭିନ୍ନ ପୂଜା ମଣ୍ଡପରେ ଭଳିକି ଭଳି ତୋରଣ ନିର୍ମାଣ ସାଙ୍ଗକୁ ଚିତାକର୍ଷକ ଆଲୋକମାଳାରେ ସଜ୍ଜିତ କରାଯାଇଛି । ବ୍ରହ୍ମପୁର ସହରର ହିଲପାଟଣା ନେହରୁ ପାର୍କ ନିକଟରେ ଗତ 5 ବର୍ଷ ଧରି ଜାକଜମକରେ ହୋିଆସୁଛି ପୂଜା। ତେବେ ୨୦୧୮ ମସିହାରେ ହାପି କ୍ଲବପୂଜା କମିଟି ପକ୍ଷରୁ ପ୍ରଥମ କରି ଦୁର୍ଗାପୂଜା ଆୟୋଜନ କରାଯାଇଥିଲା। କୋଭିଡ ସମୟରେ ଦୁଇ ବର୍ଷ ଛାଡ଼ି ଦେଲେ ଏଠାରେ ଦୁର୍ଗା ପୂଜା କରାଯାଉଛି । ପୂର୍ବରୁ ଶାରଦୀୟ ପୁଜା ସମୟରେ ମା’ଙ୍କ ମହାସପ୍ତମୀ, ମହାଷ୍ଟମୀ ଓ ମହାନବମୀ ପୂଜା କରାଯାଇଥିବାବେଳେ ବର୍ତ୍ତମାନ ନବରାତ୍ର ପୂଜା ମଧ୍ୟ କୁହାଯାଇଛି । ଚଳିତ ବର୍ଷ ମା'ଙ୍କ ୧୧ ଫୁଟ୍ ଉଚ୍ଚର ସିଂହବାହିନୀ ମୂର୍ତ୍ତି ଶୋଭା ପାଉଥିବାବେଳେ ପ୍ରାୟ ୫୦ ଫୁଟ୍ ଉଚ୍ଚର ତୋରଣ ନିର୍ମାଣ କରାଯାଇଛି। ମେଢ଼ ଆଖାପାଖ ଅଞ୍ଚଳକୁ ଆଲୋକମାଳରେ ସଜାଯାଇଛି।
ଇଟିଭି ଭାରତ, ବ୍ରହ୍ମପୁର