ହାଇଦ୍ରାବାଦ: ବେଙ୍ଗାଲୁରୁର ଷ୍ଟାର୍ଟଅପ ସର୍ଭମ AI (Sarvam AI) ଭାଷା ଭିତ୍ତିକ ଏଆଇ ମଡେଲ ସର୍ଭମ-1 ଲଞ୍ଚ କରିଛି । ଯାହାକି 11ଟି ଭାରତୀୟ ଭାଷାକୁ ସପୋର୍ଟ କରୁଛି । ସବୁଠୁ ଖାସ କଥା ହେଉଛି ଏଥିରେ ଓଡ଼ିଆ ଭାଷା ମଧ୍ୟ ସ୍ଥାନ ପାଇଛି । ଯାହାକି ଓଡ଼ିଆ ଭାଷାରେ ମଧ୍ୟ ଅନେକ ତଥ୍ୟ ପ୍ରଦାନ କରିବାରେ ସକ୍ଷମ ହେବ । ଓଡ଼ିଆ ଭାଷାଭାଷୀ ଲୋକେ ଅନେକ ତଥ୍ୟ ଖୋଜିବାରେ ଏହି ଏଆଇ ମଡେଲର ବ୍ୟବହାର କରିପାରିବେ । ଏହି ଏଆଇ ମଡେଲଟି ମେଟାର Llama-3 ଓ ଗୁଗଲର Gemma-2ଠାରୁ ଅଧିକ ଭଲ ପ୍ରଦର୍ଶନ କରୁଛି ବୋଲି କମ୍ପାନୀ ଦାବି କରିଛି ।
10ଟି ଭାରତୀୟ ଭାଷା ସାମିଲ:-
ଏହି ଏଆଇ ମଡେଲଟି 2 ବିଲିୟନ ମାପଦଣ୍ଡ ସହିତ ବିକଶିତ ହୋଇଛି । ଯାହାକି ଇଂରାଜୀ ସହିତ 10 ଭାରତୀୟ ଭାଷା ଯେପରିକି ଓଡ଼ିଆ, ବଙ୍ଗାଳୀ, ଗୁଜୁରାଟୀ, ହିନ୍ଦୀ, କନ୍ନଡ, ମାଲାୟାଲାମ, ମରାଠୀ, ପଞ୍ଜାବୀ, ତାମିଲ ଓ ତେଲୁଗୁ ଭାଷାକୁ ସମର୍ଥନ କରେ ।
Sarvam-1 କେତେ ଫଳପ୍ରଦ ?
କମ୍ପାନୀ ଦାବି କରିଛି ଯେ ଏହି ଏଆଇ ମଡେଲଟି ବୃହତ ଏଆଇ ମଡେଲ ଯେପରିକି ମେଟାର Llama-3 ଓ ଗୁଗଲର Gemma-2ଠାରୁ ଅଧିକ ଭଲ ପ୍ରଦର୍ଶନ କରୁଛି । TriviaQA ବେଞ୍ଚମାର୍କରେ ସର୍ଭମ-1 ପ୍ରାୟ 86.11 ପ୍ରତିଶତ ସଠିକତା ପ୍ରଦାନ କରୁଛି । ଏତିକି ବେଳେ ମେଟାର Llama-3.1ର ସ୍କୋର 61.47 ରହିଛି । ଅନ୍ୟପଟେ ସର୍ଭମ-1 ଗଣନାତ୍ମକ ଭାବରେ Gemma-2-9B ଓ Llama-3.1-8B ଠାରୁ 4ରୁ 6ଗୁଣା ଦକ୍ଷ ।
Sarvam ସମ୍ପର୍କରେ...
ଭାରତରେ AI ଦକ୍ଷତାକୁ ବୃଦ୍ଧି କରିବା ଲାଗି ଏହି କମ୍ପାନୀ ଲକ୍ଷ୍ୟ ରଖିଛି । ଏହି କମ୍ପାନୀର ସହ ପ୍ରତିଷ୍ଠାତା ହେଉଛନ୍ତି ଡଃ ବିବେକ ରାଘବନ୍ (ଜଣେ ଉଦ୍ୟୋଗୀ, ଟେକ୍ନୋଲୋଜିଷ୍ଟ ) ଓ ପ୍ରତ୍ୟୁଶ କୁମାର (AI ଇଞ୍ଜିନିୟରିଂ ଗବେଷକ) । କମ୍ବାନୀ ଭାରତରେ GenAI ଆପ୍ସର ବିକାଶ, ଉପଯୋଗ ଏବଂ ବିସ୍ତାରକୁ ଯଥେଷ୍ଟ ଦୃଢ ଏବଂ ପ୍ରଭାବଶାଳୀ କରିବାକୁ ଲକ୍ଷ୍ୟ ରଖିଛି ।
