ହାଇଦ୍ରାବାଦ: ଚଳିତ ବର୍ଷ ସେପ୍ଟେମ୍ବର ତ୍ରିମାସରେ ଭାରତରେ ଏଯାବତ ସବୁଠୁ ବଡ଼ ରାଜସ୍ବ ରେକର୍ଡ କରିଛି ଆପଲ୍ । ବ୍ୟବସାୟରେ ଏହି ସଫଳତା ପାଇବା ପରେ ଆପଲ୍ ଭାରତରେ ଆଉ 4ଟି ନୂଆ ଷ୍ଟୋର ଖୋଲିବାକୁ ଯାଉଛି ବୋଲି ଟେକ୍ ଜାଏଣ୍ଟର ସିଇଓ ଟିମ କୁକ୍ ସୂଚନା ଦେଇଛନ୍ତି । ଜୁଲାଇ-ସେପ୍ଟେମ୍ବର ମାସ ମଧ୍ୟରେ ଆପଲ୍ 94.9 ବିଲିୟନ ଡଲାର ରାଜସ୍ବ ସଂଗ୍ରହ କରିଛି । ଯାହାକି ସେପ୍ଟେମ୍ବର ତ୍ରିମାସରେ ସବୁଠୁ ବଡ଼ ରେକର୍ଡ । ପୂର୍ବ ଗୋଟିଏ ବର୍ଷ ତୁଳନାରେ ଏଥିରେ 6% ଅଭିବୃଦ୍ଧି ଘଟିଛି ।
ଭାରତରେ ପ୍ରତି ଭୌଗୋଳିକ କ୍ଷେତ୍ରରେ ଆଇଫୋନ (iPhone)ର କ୍ରେଜ ଦେଖିବାକୁ ମିଳିଛି । ଆଇଫୋନ 16 ଲଞ୍ଚ ହେବା ପରେ ଦେଶରେ ଅନେକ ସ୍ଥାନରେ ବିପୁଳ ମାତ୍ରାରେ ଆଇଫୋନ-15 ବିକ୍ରି ହୋଇଥିବା ରିପୋର୍ଟରୁ ଜଣାପଡ଼ିଥିଲା । ଏହି କାରଣରୁ ସେପ୍ଟେମ୍ବର ତ୍ରୟମାସରେ କମ୍ପାନୀ ନୂଆ ରାଜସ୍ବ ରେକର୍ଡ କରିପାରିଛି । ମୋଟ ଦେଖିବାକୁ ଗଲେ, କମ୍ପାନୀ ବର୍ଷ ପରେ ବର୍ଷ ଭାରତରେ ସେବା ଯୋଗାଇ ରାଜସ୍ବ ରେକର୍ଡରେ 12 ପ୍ରତିଶତ ବୃଦ୍ଧି କରିଛି ।
| ଏହା ବି ପଢନ୍ତୁ |
ଗୁରୁବାର ବିଳମ୍ବିତ ରାତିରେ ତ୍ରି-ମାସ ଆୟ କାଳ (ଆର୍ଥିକ ବର୍ଷ 2024ରେ 4ର୍ଥ ତ୍ରିମାସ) ଅବସରରେ ସିଇଓ କୁକ୍ କହିଥିଲେ, "ଆମେ ଭାରତରେ ଯେଉଁ ପ୍ରକାର ଉତ୍ସାହ ଦେଖୁଛି, ସେଥିରେ ଆମେ ମଧ୍ୟ ଉତ୍ସାହିତ ହୋଇପଡିଛୁ । ଭାରତରେ ଆମେ ଏଯାବତ ସବୁଠୁ ବଡ଼ ରାଜସ୍ବ ରେକର୍ଡ କରିଛୁ । ଏହା ଆପଲ୍ରେ ନୂତନତାର ଏକ ଅସାଧାରଣ ବର୍ଷ ରହିଛି । ବିକଶିତ ବଜାରରେ ବୃଦ୍ଧି ବ୍ୟତୀତ ଆମେ ମେକ୍ସିକୋ, ବ୍ରାଜିଲ, ମଧ୍ୟ ପୂର୍ବ, ଭାରତ ଓ ଦକ୍ଷିଣ ଏସିଆରେ ଦୁଇ ଅଙ୍କ ବୃଦ୍ଧି ସହିତ ଅନେକ ଅଗ୍ରଗାମୀ ବଜାରରେ ମଜଭୁତ ସ୍ଥିତି ପ୍ରଦର୍ଶନ କରିଛୁ ।"