ଭୁବନେଶ୍ବର:ରାସ୍ତା ଉପରେ ରୋଡ ରୋମିଓଙ୍କ ଉତ୍ପାତ । ସାଇଡ ମରାକୁ କେନ୍ଦ୍ର କରି ଯୁବକଙ୍କୁ ମାଡ଼ ମରାଯାଇଥିବାର ଦୃଶ୍ୟ ସିସିଟିଭିରେ କଏଦ ହୋଇଛି । ଇନଫୋସିଟି ଥାନା ଅଞ୍ଚଳରୁ ସାମ୍ନାକୁ ଆସିଛି ଏଭଳି ଘଟଣା । ଏହା ପଛରେ କିଛି ଘରୋଇ ଶିକ୍ଷାନୁଷ୍ଠାନର ଛାତ୍ର ସାମିଲ ଥିବା ସନ୍ଦେହ କରାଯାଉଛି । ଶ୍ରୀବିହାର ଅଞ୍ଚଳର ଯୁବକ ଜେପି ରାଜେଶ ରତନଙ୍କୁ ଏଭଳି ଆକ୍ରମଣ କରିଛନ୍ତି ଦୁର୍ବୃତ୍ତ । ସେ ନିଜର ଗାଡି ଯୋଗେ ମାଗ୍ନେଟ ଛକରୁ ଶିଖରଚଣ୍ଡି ଆଡ଼କୁ ଯିବା ସମୟରେ ତାଙ୍କ ଗାଡି ସାମ୍ନାରେ କିଛି ଯୁବକ ଗାଡି ସାଇଡ ମାରିଥିଲେ । ଏନେଇ ପ୍ରତିବାଦ କରିବାରୁ ସେମାନେ ଅଶାଳୀନ ଭାଷାରେ ଗାଳି ଗୁଲଜ ସହ ଧମକ ଚମକ ଦେଇଥିଲେ । ଏଥିରେ ଭୟଭୀତ ହୋଇ ରାଜେଶ ସେଠାରୁ ପଳାଇ ଆସିବା ପରେ ସମ୍ପୃକ୍ତ ଯୁବକମାନେ ତାଙ୍କୁ ପିଛା କରି ଆସି ପ୍ରଶାନ୍ତି ବିହାର ନିକଟରେ ମରଣାନ୍ତକ ଆକ୍ରମଣ କରିଥିଲେ ।
ଅଭିଯୋଗକାରୀ ଜଣଙ୍କ ଜୀବନ ବିକଳରେ ସେଠାରେ ଚିତ୍କାର କରିବା ପରେ ସ୍ଥାନୀୟ ଲୋକେ ଆସି ଉଦ୍ଧାର କରିଥିଲେ । ଘଟଣାକୁ ନେଇ ଇନଫୋସିଟି ଥାନାର ଦ୍ବାରସ୍ଥ ହୋଇଛନ୍ତି ରାଜେଶ । ଘଟଣା ସ୍ଥଳରେ ପୋଲିସ ପହଞ୍ଚି ତନାଘନା କରିଛି। ଆକ୍ରମଣକାରୀ ଯୁବକଙ୍କ ସିସିଟିଭି ଫୁଟେଜ ସହ ଅଭିଯୁକ୍ତମାନଙ୍କୁ ଚିହ୍ନଟ କରାଯାଇଛି । ସେମାନଙ୍କ ମଧ୍ୟରୁ କେତେକ ଅଭିଯୁକ୍ତ ସ୍ଥାନୀୟ ଏକ ଘରୋଇ ଶିକ୍ଷାନୁଷ୍ଠାନର ଛାତ୍ର ବୋଲି ଜଣାପଡିଛି । ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରିଛି । ଖୁବଶୀଘ୍ର ସେମାନଙ୍କୁ ଗିରଫ କରାଯିବ ବୋଲି ସୂଚନା ଦେଇଛନ୍ତି ଇନଫୋସିଟି ଥାନା ଅଧିକାରୀ ।
ଏହା ବି ପଢନ୍ତୁ...ନିର୍ବାଚନ ପୁର୍ବରୁ ଅଶାନ୍ତ ହେଲା ରାଜଧାନୀ, କାରକୁ ବୋମା ଫିଙ୍ଗିଲେ ଦୁର୍ବୃତ୍ତ