ଭୁବନେଶ୍ବର: ସାଇବର ଠକ ଆପଣାଉଛନ୍ତି ନୂଆ ଚାଲ୍ । ମାତିଛନ୍ତି ଟେଲିଗ୍ରାମ ଓ ହ୍ବାଟ୍ସଆପ୍ ଗ୍ରୁପରେ ଠକ । ଅଜଣା ଗ୍ରୁପରେ ଆଡ୍ କରି ଦେଉଛନ୍ତି ଲୋଭନୀୟ ଅଫର୍ । ଘରେ ବସି ଟଙ୍କା ରୋଜଗାର ଲୋଭ ଦେଇ ଠକି ନେଉଛନ୍ତି ଲକ୍ଷ ଲକ୍ଷ ଟଙ୍କା । ଏହିକ୍ରମରେ ଜଣେ ମହିଳାଙ୍କ ଠାରୁ ଲୁଟ କରିଛନ୍ତି ସାଢେ ୩ ଲକ୍ଷ ଟଙ୍କା । ଏନେଇ ସାଇବର ଥାନାରେ ହୋଇଛି ଅଭିଯୋଗ ।
ଅଭିଯୋଗକାରିଣୀ ସ୍ମିତା ଚୌଧୁରୀଙ୍କ ଅଭିଯୋଗ ଅନୁସାରେ, ତାଙ୍କ ମୋବାଇଲ ନମ୍ବର ଏକ ଗ୍ରୁପ୍ରେ ଆଡ୍ ହେବା ପରେ ଗ୍ରୁପ୍ରେ ମାର୍କେଟିଂର ଏକ ଅଫର ଆସିଥିଲା । ଘରେ ବସି ଏକ ସାଇଟ୍ରେ ରେଟିଂ ଦେଲେ ମିଳିବ ୫୦ ଟଙ୍କା । ଏନେଇ ମହିଳା ଜଣକ ଆଗ୍ରହର ସହ ଜାଣିବା ପାଇଁ ଆରମ୍ଭ କଲେ ଓ ରେଟିଂ ଦେବାକୁ ସେହି ଗ୍ରୁପରେ ଦିଆଯାଇଥିବା ଲିଙ୍କ ଉପରେ କ୍ଲିକ୍ କରିଥିଲେ । ପରେ ଏକ ଅଜଣା ହ୍ବାଟ୍ସଆପ୍ ଗ୍ରୁପ୍ରେ ତାଙ୍କୁ ଏନେଇ ଗାଇଡ୍ କରଯାଇଥିଲା । ଏହା ଏକ ପ୍ରକ୍ରିୟା, ଯାହାଦ୍ବାରା ସେ ଟଙ୍କା ରୋଜଗାର କରିବେ ବୋଲି ତାଙ୍କୁ କୁହାଯାଇଥିଲା । ପ୍ରଥମେ ୨ ହଜାର ଟଙ୍କା ନେଇ ସଂପୃକ୍ତ ମହିଳାଙ୍କୁ ୨ ହଜାର ୮୦୦ ଟଙ୍କାର ରିଟର୍ଣ୍ଣ କରାଗଲା । ଏହିଭଳି ପରେ ୫ ହଜାର ଓ ୩୬ ହଜାର ଭଳି ଟଙ୍କାର କାରବାର ହୋଇଥିଲା । ଏନେଇ ଟିମ୍ ଟାସ୍କ ଭାବେ ଷ୍ଟେପ ପରେ ଷ୍ଟେପରେ ତାଙ୍କଠାରୁ ଟଙ୍କା ନେଇ ଚାଲିଲେ ଦୁର୍ବୃତ୍ତ । ହେଲେ ଆଉ ଟଙ୍କା ଫେରାଇଲେ ନାହିଁ । ଏଭଳି ୩ ଲକ୍ଷ ୩୭ ହଜାର ଟଙ୍କା ବିଭିନ୍ନ ୟୁପିଆଇ ଓ ବ୍ୟାଙ୍କ ଟ୍ରାନ୍ଜାକ୍ସନରେ ନେବା ପରେ ମହିଳା ଜଣଙ୍କ ଠକେଇର ଶିକାର ହୋଇଥିବା ଜାଣି ସାଇବର ଥାନାରେ ଅଭିଯୋଗ କରିଛନ୍ତି ।
ଏଭଳି ସାଇବର ଠକ ଏବେ ଧନୀ ଘରର ଲୋକଙ୍କ ତଥ୍ୟ ସଂଗ୍ରହ କରି ସେ ମହିଳା ବା ପୁରୁଷ ବା କଲେଜ ପଢୁଆଙ୍କୁ ଏହିଭଳି ଭାବେ ଫସାଇବା ପାଇଁ ଯୋଜନା କରୁଛନ୍ତି । ଏନେଇ ବିଶେଷ କରି ଟେଲିଗ୍ରାମ ଠକଙ୍କ ଟେକ୍ନିକ୍ ହେଉଛି ଏଇଭଳି ଗ୍ରୁପରେ ଆଡ୍ କରି ଘରେ ବସି ଟଙ୍କା ରୋଜଗାର କରିବାର ଲୋଭ ଦେଖାଇ ଗୋଟିଏ ପରେ ଗୋଟିଏ ପରବର୍ତ୍ତୀ ଷ୍ଟେପରେ ଟଙ୍କା ନେଲା ପରେ ସେହି ଟଙ୍କା ଫେରିପାଇବା ପାଇଁ ଆଉ କିଛି ଟଙ୍କା ଦେବାକୁ କହି ଠକି ନେଉଛନ୍ତି ସର୍ବସ୍ବ ।