ନିମ୍ନମାନର ରାସ୍ତା କାମ ଅଭିଯୋଗ, ତଦନ୍ତ ଦାବି କଲେ ଗ୍ରାମବାସୀ

କୋଣାର୍କ ଥାନା ଅଞ୍ଚଳରେ ରାସ୍ତା କାର୍ଯ୍ୟ ନିମ୍ନମାନର ହୋଇଥିବା ଅଭିଯୋଗ । ୧୨ କିଲୋମିଟର ରାସ୍ତା ନିର୍ମାଣ କାର୍ଯ୍ୟ ଉପରେ ଉଚ୍ଚସ୍ତରୀୟ ତଦନ୍ତ ଦାବି ।

ନିମାପଡ଼ା (ପୁରୀ): ଗ୍ରାମ୍ୟ ଉନ୍ନୟନ ବିଭାଗ ରାସ୍ତା କାର୍ଯ୍ୟ ନିମ୍ନମାନର ହୋଇଥିବା ଅଭିଯୋଗରେ ଉଚ୍ଚସ୍ତରୀୟ ତଦନ୍ତ ପାଇଁ ଦାବି କରିଛନ୍ତି ସ୍ଥାନୀୟ ବାସିନ୍ଦା । ପୁରୀ ଜିଲ୍ଲା କୋଣାର୍କ କୋଣାର୍କ ଥାନା ଅନ୍ତର୍ଗତ ବାଲିଦୋକାନ ବଜାରଠାରୁ ସିଂହାରପାଳ ଓ ସିଂହାରପାଳ ଠାରୁ ତଣ୍ଡାହାର ପର୍ଯ୍ୟନ୍ତ ଯାଇଥିବା ଗ୍ରାମ୍ୟ ଉନ୍ନୟନ ବିଭାଗର ରାସ୍ତା କାର୍ଯ୍ୟ ନିମ୍ନମାନର ହୋଇ ଅର୍ଥ ହରିଲୁଟ ହୋଇଥିବା ଅଭିଯୋଗ ହୋଇଛି । ଗାର୍ଡ ଓ୍ବାଲ ସହ ୧୨ କିଲୋମିଟର ରାସ୍ତା ନିର୍ମାଣ କାର୍ଯ୍ୟର ଉଚ୍ଚସ୍ତରୀୟ ତଦନ୍ତ କରିବା ପାଇଁ ଗ୍ରାମବାସୀ ଦାବି କରିଛନ୍ତି ।

• 5 କୋଟିର ବ୍ୟୟ ଅଟକଳ, ଦୁଇ ଠିକା ସଂସ୍ଥା ନେଇଛନ୍ତି ଟେଣ୍ଡର :

କୋଣାର୍କ ଥାନା ଅନ୍ତର୍ଗତ ବାଲିଦୋକାନ ବଜାର ଠାରୁ ସିଂହାରପାଳ ଓ ସିଂହାରପାଳ ଠାରୁ ତଣ୍ଡାହର ପର୍ଯ୍ୟନ୍ତ ୧୨ କି.ମି ରାସ୍ତା । ଯାହା ଉପରେ ୪ଟି ପଞ୍ଚାୟତର ପ୍ରାୟ ୨୦ ହଜାରରୁ ଊର୍ଦ୍ଧ୍ବ ଲୋକଙ୍କ ପ୍ରତ୍ୟେକ ଦିନ ଯାତାୟତ କରିଥାନ୍ତି । କୋଣାର୍କ, କାକଟପୁର ଓ ଅସ୍ତରଙ୍ଗ ଅଞ୍ଚଳର ଲୋକେ ଏହି ରାସ୍ତା ଉପରେ ଯାତାୟତ କରୁଥିବା ବେଳେ ଗତ କିଛିଦିନ ହେବ ୮ କୋଟିରୁ ଊର୍ଦ୍ଧ୍ବ ଟଙ୍କା ବ୍ୟୟ ଅଟକଳ କରାଯାଇଥିବା ରାସ୍ତାର ପ୍ରଶସ୍ତୀକରଣ ଓ ଉନ୍ନତିକରଣ କାର୍ଯ୍ୟ କାକଟପୁରର ଓ ଅସ୍ତରଙ୍ଗର ୨ଟି ଠିକା ସଂସ୍ଥାକୁ ଦିଆଯାଇଛି । କିନ୍ତୁ ୨ଟି ସଂସ୍ଥାର ଯନ୍ତ୍ରୀ ଓ ଠିକାଦାରଙ୍କ ଭିତିରି ସଲାସୁତୁରା ଯୋଗୁଁ ରାସ୍ତା କାର୍ଯ୍ୟ ଅତ୍ୟନ୍ତ ନିମ୍ନମାନର ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଆସୁଛନ୍ତି । କିନ୍ତୁ ଅଭିଯୋଗକୁ ବେଖାତିରି କରି ଠିକାଦାର ନିମ୍ନମାନର କାର୍ଯ୍ୟ ଜାରି ରଖିଛନ୍ତି । ରାସ୍ତା ନିର୍ମାଣ ସହ ଗାର୍ଡ-ୱାଲ ନିର୍ମାଣ ମଧ୍ଯ ନିମ୍ନମାନର ହେଉଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।

ଏହା ମଧ୍ୟ ପଢ଼ନ୍ତୁ...ପୁରୁଣା ରାସ୍ତା ଦେଖାଇ ଫେକ୍ ବିଲ୍, ୮ ଲକ୍ଷ ହଡ଼ପ ଅଭିଯୋଗ ଆଣିଲେ ଗ୍ରାମବାସୀ ଏହା ମଧ୍ୟ ପଢ଼ନ୍ତୁ...ସରକାର ବଦଳିଲା ପରେ କାମ ବନ୍ଦ କରିଦେଲା ଠିକାସଂସ୍ଥା ! ଅଧପନ୍ତରିଆ ରାସ୍ତା ଏବେ ମରଣଯନ୍ତା

ଏହି ରାସ୍ତାଟି ନିର୍ମାଣ କାର୍ଯ୍ୟ ଶେଷ ହେଲେ ଏଥିରେ କାକଟପୁର ବ୍ଳକ ଅବଦାନ ପଞ୍ଚାୟତ ଅସ୍ତରଙ୍ଗ ବ୍ଳକ ଶିଶୁଅ ପଞ୍ଚାୟତ ସହ ଆଖପାଖ ଦୁଇଟି ପଞ୍ଚାୟତର ୨୦ ହଜାର ଲୋକମାନଙ୍କ ସହ ଛାତ୍ରଛାତ୍ରୀ ଯାତାୟତ କରିବାକୁ ସୁବିଧା ପାଇବା । ଚାଷୀମାନେ ନିଜର ପନିପରିବା କୋଣାର୍କ ଓ ବାଲିଦୋକାନ ବଜାରକୁ ଆଣି ଦୁଇ ପଇସା ରୋଜଗାର ମଧ୍ୟ କରିପାରନ୍ତେ । କିନ୍ତୁ ରାସ୍ତା ନିର୍ମାଣ କାର୍ଯ୍ୟରେ ସ୍ଥାନୀୟ ଲୁଣା ବାଲିର ବ୍ୟବହାର କରିବା ସହ ଗୋଡିରେ ମଧ୍ୟ ବାଲି ମିଶାଯାଉଥିବା ଅଭିଯୋଗ ହୋଇଛି । କେବଳ ସେତିକି ନୁହେଁ କଞ୍ଚାମାଲ ଭାଗମାପରେ ଅନିୟମିତତା ସହ ନିମ୍ନମାନର ଡଷ୍ଟ, ଡବଲ୍ୟୁଏମ, ଜିଏସ୍ପି ଓ ମେଣ୍ଟାଲ ବ୍ୟବହାର କରାଯାଉଛି । ଯାହାର ଦୀର୍ଘ ସ୍ଥାୟୀତ୍ବ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ବୋଲି ସ୍ଥାନୀୟ ଲୋକଙ୍କ ସହ ପୂର୍ବତନ ସରପଞ୍ଚ କହିଛନ୍ତି ।

Poor Quality Road Work (ETV Bharat Odisha)

• ଗ୍ରାମବାସୀଙ୍କ ସହ ସ୍ବର ମିଳିଇଲେ ପୂର୍ବତନ ବିଧାୟକ:-

ଏନେଇ ସ୍ଥାନୀୟ ଅଞ୍ଚଳର ପୂର୍ବତନ ବିଧାୟକ ବିଚିତ୍ର ନନ୍ଦ ଦାସକହିଛନ୍ତି, "ବାଲିଦୋକାନ ଠାରୁ ତଣ୍ଡାହାର ପର୍ଯ୍ୟନ୍ତ ଯେଉଁ ରାସ୍ତା କାମ କରାଯାଉଛି ସେଥିରେ ଅତି ନିମ୍ନମାନର କାର୍ଯ୍ୟ ହେଉଛି । ନୂଆ ଢଲେଇ କରା ନଯାଇ ପୁରୁଣା ଢଳେଇକୁ ଓଲଟାଇ ସେଥିରେ ଡଷ୍ଟ ପକାଇ ଦେଉଛନ୍ତି । ଗାର୍ଡୱାଲ ମଧ୍ୟ ନିଚ୍ଚମାନର ହେଉଛି । ସରକାରଙ୍କ ନିୟମ ଅନୁସାରେ ମେଜରମେଣ୍ଟ ବକ୍ସ ରହିବା କଥା କିନ୍ତୁ ତା ନାହିଁ । ଲୁଣା ବାଲିରେ କାମ ହେଉଛି । ଏଥିପାଇଁ ଦୃଢ଼ ପ୍ରତିବାଦ କରାଯିବ । ଆଗାମୀ ଦିନରେ ରାସ୍ତାରୋକ କରାଯିବ । ତେଣୁ ଏଥିପ୍ରତି ନଜର ଦେବାପାଇଁ ମୁଁ ଉଚ୍ଚ କର୍ତ୍ତୃପକ୍ଷଙ୍କୁ ନିବେଦନ କରୁଛି ।"

• ଅଭିଯୋଗ ସମ୍ପର୍କରେ ଏମିତି କହିଲେ କନିଷ୍ଠ ଯନ୍ତ୍ରୀ

ସେପଟେ ଗ୍ରାମ୍ୟ ଉନ୍ନୟନ ବିଭାଗ କନିଷ୍ଠ ଯନ୍ତ୍ରୀ ନରେନ୍ଦ୍ର ପଢ଼ିଆରୀ କହିଛନ୍ତି,"ବର୍ତ୍ତମାନ ରାସ୍ତା କାମ ଜାରି ରହିଛି । ଆମେ ଖବର ପାଉଛୁ, ହେଲେ ଆମ୍ଭେମାନେ ଥିବାବେଳେ କାମ ଠିକ୍‌ କରୁଛନ୍ତି । ଏଥର ରାସ୍ତା କାର୍ଯ୍ୟ ବେଳେ ଆମେ ସମ୍ପୂର୍ଣ୍ଣ ଭାବରେ ଉପସ୍ଥିତ ରହିବୁ ।"

ଇଟିଭି ଭାରତ, ନିମାପଡ଼ା