ରାଉରକେଲା: ସ୍କୁଟିକୁ ଧକ୍କା ଦେଲା ବୁଲେଟ । ଦୁର୍ଘଟଣାରେ ଚାଲିଗଲା ଦୁଇ ଯୁବକଙ୍କ ଜୀବନ । ସମ୍ବଲପୁର-ରାଉରକେଲା ବିଜୁ ଏକ୍ସପ୍ରେସ୍ ୱେ’ର କାଂଶବାହାଲ ନିକଟ ମାଣ୍ଡିଆକୁଦର ସୋନୁ ଢାବା ନିକଟରେ ଘଟିଛି ଏହି ଦୁର୍ଘଟଣା । ଗତକାଲି(ଗୁରୁବାର) ସନ୍ଧ୍ୟାରେ ଏକ ସ୍କୁଟିକୁ ପଛରୁ ବୁଲେଟ ଧକ୍କା ଦେଇଥିଲା । ଫଳରେ ସ୍କୁଟି ଡିଭାଇଡରରେ ପିଟି ହୋଇଯାଇଥିଲା । ଡିଭାଇଡରରେ ପିଟି ହୋଇ ଦୁଇ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବା ସୂଚନା ମିଳିଛି । ତେବେ ମୃତକ ଦୁଇ ଜଣ ହେଲେ ମୃତକ ହେଲେ ରାଜଗାଙ୍ଗପୁର ଅଞ୍ଚଳର ୨୫ ବର୍ଷୀୟ ରବୀନ୍ଦ୍ର ପଣ୍ଡା ଏବଂ ୨୬ ବର୍ଷିୟ ରଶ୍ମିରଞ୍ଜନ ସ୍ବାଇଁ ।
ସୂଚନା ଅନୁସାରେ, ଗତକାଲି ସନ୍ଧ୍ୟା ପ୍ରାୟ 7 ଟାରେ ରବୀନ୍ଦ୍ର ଏବଂ ରଶ୍ମିରଞ୍ଜନ ସ୍କୁଟିରେ ରାଉରକେଲାକୁ ଆସିଥିଲେ । ସେମାନେ ତାଙ୍କ ବେକେରୀ ପାଇଁ କିଛି ସାମଗ୍ରୀ ନେବା ପାଇଁ ଯାଇଥିଲା । ପରେ ବେକେରୀ ପାଇଁ ସାମଗ୍ରୀ କିଣାକିଣି କରି ସମସ୍ତ ସାମଗ୍ରୀ ନେଇ ବିଜୁ ଏକ୍ସପ୍ରେସ୍ ୱେରେ ରାଜଗାଙ୍ଗପୁରକୁ ଫେରୁଥିଲେ । ହେଲେ କିଏ ଜାଣିଥିଲା ତାଙ୍କୁ ଯମ ବାଟରେ ଜଗି ବସିଛି । ସେ ଫେରିବା ସମୟରେ ଅଚାନକ ଦ୍ରୁତ ଗତିରେ ଯାଉଥିବା ଏକ ବୁଲେଟ୍ ସ୍କୁଟିକୁ ପଛରୁ ଧକ୍କା ଦେଇଥିଲା । ଫଳରେ ସ୍କୁଟିଟି ରାସ୍ତାପାର୍ଶ୍ବ ଡିଭାଇଡରରେ ଛିଟିକି ପଡି ପିଟି ହୋଇଯାଇଥିଲା । ପିଟିହେବା ଫଳରେ ଭାରସାମ୍ୟ ହରାଇ ସ୍କୁଟି ପଡ଼ିଯାଇଥିଲା । ଫଳରେ ସ୍କୁଟିରେ ବସିଥିବା ଦୁହେଁ ରାସ୍ତାରେ ପଡ଼ି ଯାଇଥିଲେ ।