ପାରଳାଖେମୁଣ୍ଡି:ଟଙ୍କା ଦିଅ ସାର୍ଟିଫିକେଟ ନିଅ । ଟଙ୍କା ନଦେଲେ ମିଳିବନି ସାର୍ଟିଫିକେଟ । ସରକାରୀ ନିୟମକୁ ଫୁ କରି ବିଦ୍ୟାଳୟରେ ଚାଲିଛି ମନମାନି । ସରକାର ବଦଳିଲେ, କିନ୍ତୁ ସରକାରୀ କର୍ମଚାରୀଙ୍କ ମନୋଭାବ ବଦଳିନି । ଏହାର ଏକ ଉଦାହରଣ ଦେଖିବାକୁ ମିଳିଛି ଶିକ୍ଷା ବିଭାଗରେ । ହାଇସ୍କୁଲରୁ ମାଟ୍ରିକ ପାସ କରିଥିବା ପିଲାଙ୍କୁ ପ୍ରମାଣପତ୍ର ଦେବା ପାଇଁ ନିଆଯାଉଛି ହାତଗୁଞ୍ଜା । ସ୍କୁଲରୁ ସାର୍ଟିଫିକେଟ ନେବାକୁ ହେଲେ ଦେବାକୁ ପଡ଼ିବ ହାତଗୁଞ୍ଜା । ନହେଲେ ଦିଆଯିବନି ପ୍ରମାଣପତ୍ର । ଏଭଳି ଅଭିଯୋଗ ଆସିବା ପରେ ଖୋଦ ଜିଲ୍ଲା ଶିକ୍ଷାଧିକାରୀ ବିଦ୍ୟାଳୟରେ ପହଞ୍ଚି ସ୍ଥିତି ପରଖିଛନ୍ତି । ପ୍ରାଥମିକ ତଦନ୍ତରୁ ହାତଗୁଞ୍ଜା ନିଆଯାଉଥିବା କଥା ସ୍ପଷ୍ଟ ହୋଇଛି ।
ଗଜପତି ଜିଲ୍ଲାର ସଦର ମହକୁମା ପାରଳାଖେମୁଣ୍ଡି ଉପକଣ୍ଠରେ ରହିଛି କାଶୀନଗର ବ୍ଲକ ଅଧିନସ୍ଥ ରାଣୀପେଣ୍ଠ ସରକାରୀ ହାଇସ୍କୁଲ । ଏଠାରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ରହିଥିବା ବେଳେ 250ରୁ ଅଧିକ ଛାତ୍ରଛାତ୍ରୀ ପଢ଼ୁଛନ୍ତି । ୨୦୨୪ ମାଟ୍ରିକ ପରୀକ୍ଷାରେ ଏହି ସ୍କୁଲର ୪୨ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ । ସମସ୍ତେ ଉତ୍ତୀର୍ଣ୍ଣ ହୋଇଛନ୍ତି । ସେମାନେ +2ରେ ନାମ ଲେଖାଇବା ପାଇଁ ସ୍କୁଲ ପ୍ରମାଣପତ୍ର ଆବଶ୍ୟକ ରହିଥିବାରୁ ଏହାକୁ ନେବା ପାଇଁ ସ୍କୁଲରେ ଛାତ୍ରଛାତ୍ରୀମାନେ ଭିଡ ଜମାଉଛନ୍ତି । ଏହାର ଫାଇଦା ନେଇ ପ୍ରତ୍ୟେକ ପିଲାଙ୍କ ଠାରୁ ଶହେ ଟଙ୍କା ଲେଖାଏଁ ସ୍କୁଲ କର୍ତ୍ତୃପକ୍ଷ ଦାବି କରୁଛନ୍ତି । ଟଙ୍କା ନଦେଲେ ପିଲାଙ୍କୁ ପ୍ରମାଣପତ୍ର ଦେଉନାହାନ୍ତି । ବାରମ୍ବାର ଯିବା ପରେ ମଧ୍ୟ ପ୍ରମାଣପତ୍ର ପାଉନଥିବା ପିଲା ବାଧ୍ୟ ହୋଇ ହାତଗୁଞ୍ଜା ଦେଇ ପ୍ରମାଣପତ୍ର ନେଉଥିବା ଅଭିଯୋଗ କରିଛନ୍ତି ।