କଂଗ୍ରେସ ଛାଡ଼ିଲେ ରାୟଗଡା ଜିଲ୍ଲା ସଭାପତି ବିଜୟ ଗମାଙ୍ଗୋ (ETV BHARAT ODISHA) ରାୟଗଡା: ଜିଲ୍ଲା କଂଗ୍ରେସକୁ ଝଟକା । ଦଳ ଛାଡିଲେ ରାୟଗଡା ଜିଲ୍ଲା କଂଗ୍ରେସ ସଭାପତି ବିଜୟ କୁମାର ଗମାଙ୍ଗୋ । ଦଳ ବିରୋଧୀ କାର୍ଯ୍ୟ ପାଇଁ ପିସିସି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ କମିଟି ଅଧ୍ୟକ୍ଷ ରିପୋର୍ଟ ତଲବ କରିଥିଲେ । ବହୁଥର ପିସିସି ଓ ଜିଲ୍ଲା ସ୍ତରୀୟ ଦଳୀୟ ନେତା ଅଣଦେଖା କରିଥିବା, କୌଣସି କାର୍ଯ୍ୟକ୍ରମକୁ ସୂଚନା ଦେଉ ନଥିବା ଅଭିଯୋଗ କରି ଆତ୍ମସମ୍ମାନ ଦୃଷ୍ଟିରୁ ପ୍ରାଥମିକ ସଦସ୍ୟରୁ ଇସ୍ତଫା ଦେଇଥିବା କହିଛନ୍ତି ବିଜୟ । ଇସ୍ତଫା ପତ୍ର ପିସିସି ସଭାପତି ଓ ରାଜ୍ୟ ପର୍ଯ୍ୟବେକ୍ଷକକୁ ପଠାଇ ଥିବା ବିଜୟ ଗମାଙ୍ଗୋ ସୂଚନା ଦେଇଛନ୍ତି ।
ପୂର୍ବରୁ ମଧ୍ୟ ଦଳ ବିଧାନସଭା ପ୍ରାର୍ଥୀ ନାମ ଘୋଷଣା କରିବା ପରେ ଅସନ୍ତୋଷ ହୋଇ ଯୁବ କଂଗ୍ରେସ ବ୍ଲକ ସଭାପତି ,ଏସଟି ମୋର୍ଚ୍ଚା, ଏସସି ମୋର୍ଚ୍ଚା ସଭାପତି, ଯୁବ କଂଗ୍ରେସ ରାଜ୍ୟ ପ୍ରବକ୍ତା, ପିସିସି ସଦସ୍ୟ ଦଳ ଛାଡିଥିଲେ । ଭୋଟ ଗ୍ରହଣ ଆଉ ଦିନ କେଇଟା ଥିବାବେଳେ ଜିଲ୍ଲା ସଭାପତି ଦଳ ଛାଡିବା ସମସ୍ୟା ସୃଷ୍ଟି କରିବ ବୋଲି ଚର୍ଚ୍ଚା ହେଉଛି । ଏଠାରେ ସୂଚନା ଯୋଗ୍ୟ ଯେ, ବିଜୟ ଗମାଙ୍ଗ ହେଲେ ଅବିନାଶ ଗମାଙ୍ଗଙ୍କ ବାପା ଏବଂ ଅବିନାଶ ଗମାଙ୍ଗ କୋରାପୁଟ ଲୋକସଭା ଆସନ ପାଇଁ ସ୍ଵାଧୀନ ଭାବେ ଲଢୁଛନ୍ତି ।
ସେପଟେ ଆଜି ପ୍ରଦେଶ କଂଗ୍ରେସ ସଭାପତି ଶରତ ପଟ୍ଟନାୟକ ଏକ ପ୍ରେସ ବାର୍ତ୍ତାରେ ଅବିନାଶ ଗମାଙ୍ଗ ସମେତ ଗୁଡାରିର ଭାସ୍କର ଜାଗରଙ୍ଗା,ବିଷମକଟକର ଚନ୍ଦ୍ର ଶେଖର ବେହେରା,ଅଶୋକ ଆଚାର୍ଯ୍ୟ , ନୀଳମାଧବ ଉଲାକା, କଲ୍ୟାଣସିଂହପୁରର ରାମି ତ୍ରିପାଠୀ , ରାୟଗଡାର ପୂର୍ଣ୍ଣ ଚନ୍ଦ୍ର ମାଝି ଏବଂ ରାଜେନ୍ଦ୍ର ନାୟକଙ୍କୁ କଂଗ୍ରେସର ପ୍ରାଥମିକ ସଦସ୍ୟରୁ ବହିଷ୍କାର କରାଯାଇଥିବା ସୂଚନା ଦେଇଛନ୍ତି । ନୀଳମାଧବ ଉଲକା ବିଷମକଟକ ନିର୍ବାଚନ ମଣ୍ଡଳୀରେ ବିଧାୟକ ପାର୍ଥୀ ଭାବେ ସ୍ଵାଧୀନରେ ଲଢୁଛନ୍ତି ଏବଂ ସେ କଂଗ୍ରେସର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ଡମ୍ବରୁଧର ଉଲକାଙ୍କୁ ପୁଅ ।
ଏହା ମଧ୍ୟ ପଢନ୍ତୁ......ବିଜେପି ଛାଡ଼ିଲେ କୋରେଇ ପୂର୍ବତନ ବିଧାୟକ ପ୍ରାର୍ଥୀ ବିଶ୍ବଜିତ - BISWAJEET NAYAK QUITS BJP
ସେହିଭଳି ପୂର୍ଣ୍ଣଚନ୍ଦ୍ର ମାଝୀ ପୂର୍ବତନ ମନ୍ତ୍ରୀ ତଥା କଂଗ୍ରେସ ବରିଷ୍ଠ ନେତା ସ୍ଵର୍ଗତ ଅନନ୍ତ ରାମ ମଝିଙ୍କ ପୁଅ ତଥା ବର୍ତ୍ତମାନ ରାୟଗଡା ବିଧାନସଭାରେ ଲଢୁଥିବା ଅନୁସୟା ମାଝିଙ୍କ ବଡଭାଇ । ଏମାନଙ୍କୁ ଦଳ ବିରୋଧୀ କାର୍ଯ୍ୟକଳାପ ପାଇଁ ପ୍ରାଥମିକ ସଦସ୍ୟତାରୁ ବହିଷ୍କାର କରାଯାଇଥିବା ସୂଚନା ଦିଆଯାଇଛି ।
ଇଟିଭି ଭାରତ,ରାୟଗଡା
