ସମ୍ବଲପୁର: ଗାଈଗୋରୁଙ୍କୁ ରକ୍ଷା କରିବ ରେଡ଼ିୟମ ନେକ ବ୍ୟାଣ୍ଡ । ଚାରଣ ଭୂମି ଏବଂ ପଡ଼ିଆ ଅଭାବରୁ ଗାଈଗୋରୁ ଏଣେତେଣେ ବୁଲିବା ସହିତ ତାଙ୍କ ଯୋଗୁ ଦୁର୍ଘଟଣା ବୃଦ୍ଧି ପାଇବାରେ ଲାଗିଛି l ଏହା ଦ୍ୱାରା ଉଭୟ ମଣିଷ ଓ ବୁଲା ଗାଇ ଗୋରୁ ମୃତାହତ ହେଉଛନ୍ତି l ଏହିଭଳି ଦୁର୍ଘଟଣାକୁ ଏଡେଇବା ପାଇଁ ଏକ ଉଦ୍ୟମ ଆରମ୍ଭ କରିଛନ୍ତି ସମ୍ବଲପୁର ସହରର କେତେକ ଅବସରପ୍ରାପ୍ତ ସେନା କର୍ମଚାରୀ l ସେମାନେ ଗାଈଗୋରୁଙ୍କ ବେକରେ ରେଡ଼ିୟମ ଯୁକ୍ତ ନେକ ବ୍ୟାଣ୍ଡ ବାନ୍ଧି ରାତିରେ ହେଉଥିବା ଦୁର୍ଘଟଣାକୁ ଏଡେଇବା ପାଇଁ ଏକ ଅଭିନବ ପ୍ରୟାସ ଆରମ୍ଭ କରିଛନ୍ତି ।
ଦିନକୁ ଦିନ ସମ୍ବଲପୁର ସହରର ଜନସଂଖ୍ୟା ବୃଦ୍ଧି ପାଇବା ସହିତ ଯାନ ବାହାନ ସଂଖ୍ୟା ମଧ୍ୟ ବଢିବାରେ ଲାଗିଛି l ଅନ୍ୟପଟେ ସହରାଞ୍ଚଳରେ କଂକ୍ରିଟକରଣ ବୃଦ୍ଧି ପାଉଥିବା ବେଳେ ସହରରେ ଚାରଣ ଭୂମି ଓ ଖେଳ ପଡିଆ ହ୍ରାସ ପାଇବାରେ ଲାଗିଛି l ଏଭଳି ପରିସ୍ଥିତିରେ ସହରରେ ବୁଲା ଗାଈଗୋରୁଙ୍କ କୌଣସି ଆଶ୍ରୟସ୍ଥଳୀ ନଥିବା ବେଳେ ସେମାନେ ମୁଖ୍ୟ ସଡ଼କ ଉପରେ ଏଣେ ତେଣେ ଘୁରି ବୁଲୁଛନ୍ତି l ମୁଖ୍ୟତଃ ରାତି ସମୟରେ ଏହି ବୁଲା ଗାଈ ଗୋରୁ ଏଣେ ତେଣେ ବୁଲା ବୁଲି କରୁଥିବାରୁ ଅନ୍ଧାରରେ ବିଭିନ୍ନ ସମୟରେ ଦୁର୍ଘଟଣା ଘଟି ଉଭୟ ମଣିଷ ଓ ଗାଈଗୋରୁ ମୃତାହତ ହେଉଛନ୍ତି l ସମ୍ବଲପୁର ସହରରେ ମାସକୁ ପ୍ରାୟ 200ଟି ଏହିଭଳି ଛୋଟ ବଡ଼ ଦୁର୍ଘଟଣା ହେଉଥିବା ସୂଚନା ରହିଛି l ଏହିଭଳି ଦୁର୍ଘଟଣାକୁ ଏଡାଇବା ପାଇଁ ସମ୍ବଲପୁର ସହରର ହୋପ ସ୍କୋପ ଫିଜିକାଲ ଏକାଡେମୀ ଏକ ନିଆରା ଉଦ୍ୟମ ଆରମ୍ଭ କରିଛି l