ଚୋର ଆସିଲେ ବାଜିବ ବଜର୍‌ ଉଠିଯିବ ଫଟୋ, ଏମିତି ସ୍ମାର୍ଟଲକ୍‌ ତିଆରି କଲେ ଇଞ୍ଜିନିୟର

ଚୋରଙ୍କୁ ସାବାଡ୍‌ କରିବ ସମ୍ବଲପୁର ଇଞ୍ଜିନୟରଙ୍କ ସ୍ମାର୍ଟ ଲକ୍‌ । ତାଲା ଆଗକୁ ଆସିବା ମାତ୍ରେ ଜୋରରେ ବାଜି ଉଠିବ ଆଲାର୍ମ ଆଉ ଉଠିଯିବ ଫଟୋ ।

ସମ୍ବଲପୁର:ଘରକୁ ଚୋର ଦାଉରୁ ସୁରକ୍ଷା ଦେବା ପାଇଁ ଆମେ ସାଧାରଣତଃ ତାଲା ବ୍ୟବହାର କରିଥାଉ । ଏଥିପାଇଁ ବହୁତ ବ୍ରାଣ୍ଡେଡ୍‌ କମ୍ପାନୀ ନିଜର ତାଲା ବହୁତ ଭଲ ବୋଲି ଵିଜ୍ଞାପନରେ ପ୍ରଦର୍ଶନ କରନ୍ତି । ତଥାପି ବିଭିନ୍ନ ସମୟରେ ଯେତେ ଦୃଢ଼ତର ତାଲା ହୋଇଥିଲେ ମଧ୍ୟ ଚୋର ଲୁଟେରା ତାଲା ଭାଙ୍ଗି ଚୋରି କରିଥିବାର ନଜିର ରହିଛି । ତାଲାକୁ ଦୃଢ କରିବା ପରିବର୍ତ୍ତେ ସ୍ମାର୍ଟ କରିବା ଉଦ୍ଦେଶ୍ୟରେ ସମ୍ବଲପୁରର ଜଣେ ଯୁବ ଇଞ୍ଜିନିୟର ସ୍ମାର୍ଟ ଲକ୍‌ ବା ତାଲା ତିଆରି କରିଛନ୍ତି । ଚୋର ତାଲା ଭାଙ୍ଗିବାକୁ ଆସିବା ମାତ୍ରେ ଏହା ଜୋରରେ ଶବ୍ଦ କରିବା ସହ ଫଟୋ ଉଠାଇବ ବୋଲି କହିଛନ୍ତି ଇଞ୍ଜିନିୟର ।

ସ୍ମାର୍ଟ ଯୁଗର ସ୍ମାର୍ଟ ତାଲା:-

ସମ୍ବଲପୁର ଜିଲ୍ଲାର ରେଙ୍ଗାଲି ବ୍ଲକ ରମ୍ପେଲା ଗାଁର ଯୁବ ଇଞ୍ଜିନିୟର ଏହି ସ୍ମାର୍ଟ ତାଲା ତିଆରି କରିଛନ୍ତି ଯେଉଁ ତାଲା ବ୍ୟବହାର କଲେ ଚୋର ପାଖକୁ ଆସୁ ଆସୁ ଆଲାର୍ମ ବାଜିବାକୁ ଲାଗିବ । କେଵଳ ଏତିକି ନୁହେଁ, ତାଲାରେ ଲାଗିଥିବା କ୍ୟାମେରାରେ ଚୋରର ଫଟୋ ଓ ଭିଡିଓ ମଧ୍ୟ କ୍ୟାପଚର୍‌ ହୋଇଯିବ । ଏଭଳି ଭାବେ ସ୍ମାର୍ଟ ଉପାୟରେ ଚୋରଙ୍କୁ ଧରିବା ସହଜ ହେବ । ଯୁବ ଇଞ୍ଜିନିୟର ଆଶିଷ ଏହି ଏକ ସ୍ମାର୍ଟ ତାଲାକୁ ମାତ୍ର 2500 ଟଙ୍କା ଭିତରେ ତିଆରି କରି ଚର୍ଚ୍ଚା ସାଉଣ୍ଟୁଛନ୍ତି ।

ତାଲା ସମ୍ମୁଖକୁ ଚୋର ଆସିବା ମାତ୍ରେ ବାଜିବ ବଜର (ETV Bharat)

ଏହା ବି ପଢନ୍ତୁ

10ଫୁଟ ଦୂରରୁ ବାଜିବ ଆଲାର୍ମ:-

ସମ୍ବଲପୁର ଇଞ୍ଜିିନିୟରଙ୍କ ସ୍ମାର୍ଟ ତାଲା (ETV Bharat)

ସ୍ମାର୍ଟତାଲା ତିଆରି କରିବାକୁ ଆଶିଷଙ୍କୁ 4 ଦିନ ସମୟ ଲାଗିଥିଲା । ଏଥିରେ ସେ ଅଲଟ୍ରାସାଉଣ୍ଡ ସେନ୍ସର, ନାଇଟ୍‌ ଭିଜନ କ୍ୟାମେରା, ଵଜର ଆଦି ଉପକରଣ ବ୍ୟବହାର କରିଛନ୍ତି । ଏହି ସ୍ମାର୍ଟ ଲକ୍‌ରେ ଲାଗିଥିବା ନାଇଟ୍‌ ଭିଜନ କ୍ୟାମେରା ରାତିରେ ମଧ୍ୟ ଏହା ସମ୍ମୁଖକୁ ଆସୁଥିବା ଯେକୌଣସି ବ୍ୟକ୍ତିର ଉଭୟ ଭିଡିଓ ଓ ଫଟୋ ଉତ୍ତୋଳନ ସ୍ବୟଂଚାଳିତ ଭାବରେ କରିପାରିବ । ସ୍ମାର୍ଟ ଲକ୍‌କୁ ଅନ୍‌ କରିଦିଆଯାଇଥିଲେ, ଏହାର ସମ୍ମୁଖର 10 ଫୁଟ ଦୂରତାରେ ବି ଯଦି କେହି ଆସେ ଏହାର ଆଲାର୍ମ ଜୋରରେ ବାଜିବାକୁ ଲାଗିବ ଓ ସେହି ବ୍ୟକ୍ତିରେ ଫଟୋ ଅଟୋମେଟିକ ଉତ୍ତୋଳନ ହୋଇଯିବ । ଏହାସହ ଜଣେ ଚାହିଁଲେ ଏହି ତାଲାର କ୍ୟାମେରାକୁ ୱାଇ ଫାଇ ଜରିଆରେ ନିଜ ମୋବାଇଲ ସହ କନେକ୍ଟ କରି ରଖିପାରିବେ ଓ ତାଲା ସମ୍ମୁଖର ସବୁ ଗତିବିଧି ଉପରେ ନଜର ରଖିପାରିବେ ବୋଲି ଆଶିଷ କହିଛନ୍ତି ।

ସ୍ମାର୍ଟ ଲକ୍‌କୁ ନେଇ ଇଞ୍ଜିନିୟର ଆଶିଷ ମହାନା କୁହନ୍ତି, "ଆମେ ଚୋରିରୁ ରକ୍ଷା ପାଇବା ପାଇଁ ତାଲାର ବ୍ୟବହାର କରିଥାଉ । କିନ୍ତୁ ଚୋରମାନେ ଯେତେ ଭଲ କି ଯେତେ ଷ୍ଟ୍ରଙ୍ଗ ତାଲା ହେଲେବି ସେମାନେ ତାକୁ କାଟି ଦେଉଛନ୍ତି । କମ୍ପାନୀମାନେ ବିଶେଷ କରି ତାଲାର ଷ୍ଟ୍ରଙ୍ଗନେସ୍‌ ଉପରେ ଧ୍ୟାନ ଦେଉଛନ୍ତି, ଆଉ ଚୋର ଯେକୌଣସି ଉପାୟରେ ହେଉ ବା କୌଣସି କଟରରେ ତାଲାକୁ କାଟି ଦେଉଛି । ଏଭଳି ସ୍ଥିତିରେ ତାଲାକୁ ଷ୍ଟ୍ରଙ୍ଗ କରିବା ଅପେକ୍ଷା ସ୍ମାର୍ଟ ଯଦି କରାଯାଏ, ତାହେଲେ ଚୋର ଧରିହେବ । ମୁଁ ସେଇ ଚିନ୍ତା ନେଇକି ସ୍ମାର୍ଟଲକ୍‌ ତିଆରି କରିଛି । ତେବେ ଜିଲ୍ଲା ପ୍ରଶାସନ ଆର୍ଥିକ ସହାୟତା କିମ୍ବା ପ୍ରୋତ୍ସାହନ ଦେଲେ ମୁଁ ଆହୁରି ବହୁତ କିଛି ନୂଆ ନୂଆ ଜିନିଷ ତିଆରି କରିପାରିବି ।"

ଇଟିଭି ଭାରତ, ସମ୍ବଲପୁର