ବୌଦ୍ଧରେ ବିପର୍ଯ୍ୟସ୍ତ ସ୍ବାସ୍ଥ୍ୟ ସେବା, କଲବଲ ରୋଗୀ

ବୌଦ୍ଧ ଜିଲ୍ଲାର ବିଭିନ୍ନ ଡାକ୍ତରଖାନାରେ ଆବଶ୍ୟକ ସଂଖ୍ୟାରେ ଡାକ୍ତର ଓ କର୍ମଚାରୀଙ୍କ ଅଭାବରୁ ସ୍ବାସ୍ଥ୍ୟ ସେବାରେ ବ୍ୟାଘାତ ଘଟୁଛି ।

ବୌଦ୍ଧ: ଜିଲ୍ଲାର ଉପାନ୍ତ ଅଞ୍ଚଳରେ ଅପହଞ୍ଚ ସ୍ବାସ୍ଥ୍ୟ ସେବା । ବିଭିନ୍ନ ଡାକ୍ତରଖାନାରେ ଡାକ୍ତର ଓ କର୍ମଚାରୀଙ୍କ ଅଭାବ ଯୋଗୁ ଦୁର୍ଗମ ଅଞ୍ଚଳର ଅଧିବାସୀଙ୍କ ପାଇଁ ସ୍ବାସ୍ଥ୍ୟ ସେବା ବ୍ୟାହତ । ବିଶେଷ ଭାବରେ ଡେଙ୍ଗୁ, ଡାଇରିଆ, ମ୍ୟାଲେରିଆ, କିଡନୀ ଭଳି ରୋଗ ଜିଲ୍ଲାର ଉପାନ୍ତ ଅଞ୍ଚଳରେ ବ୍ୟାପିବା ସହିତ ଉପଯୁକ୍ତ ଚିକିତ୍ସା ଅଭାବରୁ ଲୋକେ ଗୁଣିଗାରେଡି, ଝଡା ଫୁଙ୍କା ଉପରେ ନିର୍ଭର କରିବାକୁ ବାଧ୍ୟ ହେଉଥିବା ଅଭିଯୋଗ ହୋଇଛି ।

ଜିଲ୍ଲାରେ ସ୍ବାସ୍ଥ୍ୟ ସେବା ଏକପ୍ରକାର ବିପର୍ଯ୍ୟସ୍ତ ହୋଇ ପଡିଥିବା କହିଲେ ଭୁଲ ହେବନି । ସାଧାରଣ ନାଗରିକ ଉପଯୁକ୍ତ ସ୍ବାସ୍ଥ୍ୟ ସେବା ପାଇବାରୁ ବଞ୍ଚିତ ଥିବା ଅଭିଯୋଗ ହୋଇଛି । ବୌଦ୍ଧ ଜିଲ୍ଲାରେ ଜିଲ୍ଲା ମୁଖ୍ୟ ଡାକ୍ତରଖାନା ଓ ପାଞ୍ଚଟି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ସମେତ ସମସ୍ତ ପଞ୍ଚାୟତ ସ୍ତରରେ ପ୍ରାଥମିକ ଆରୋଗ୍ୟ କେନ୍ଦ୍ର ରହିଛି । କିନ୍ତୁ କେବଳ ଜିଲ୍ଲା ମୁଖ୍ୟ ଡାକ୍ତରଖାନାକୁ ଛାଡିଦେଲେ ଅନ୍ୟ କୌଣସି ଡାକ୍ତରଖାନାରେ ବିଶେଷଜ୍ଞ ଡାକ୍ତର ନାହାନ୍ତି । ଏହାଛଡା ଆବଶ୍ୟକ ସଂଖ୍ୟକ ପାରାମେଡିକାଲ ତଥା କର୍ମଚାରୀଙ୍କ ଅଭାବରୁ ସ୍ବାସ୍ଥ୍ୟ ସେବା ବିପର୍ଯ୍ୟସ୍ତ ହୋଇ ପଡିଛି ।

ବୌଦ୍ଧରେ ବିପର୍ଯ୍ୟସ୍ତ ସ୍ବାସ୍ଥ୍ୟ ସେବା (ETV BHARAT ODISHA)

ଜିଲ୍ଲା ମୁଖ୍ୟ ଡାକ୍ତରଖାନାର ତିନି ଶହ ଶଯ୍ୟା ବିଶିଷ୍ଟ ନୂତନ କୋଠା ନିର୍ମାଣ କାର୍ଯ୍ୟ ସରିଥିଲେ ମଧ୍ୟ ତାହା କାର୍ଯ୍ୟକ୍ଷମ ହୋଇ ନଥିବାରୁ ପୁରୁଣା ଡାକ୍ତରଖାନାରେ ରୋଗୀ ଅତ୍ୟନ୍ତ ଦୟନୀୟ ଅବସ୍ଥାରେ ଚିକିତ୍ସିତ ହେଉଛନ୍ତି । ଅଧିକାଂଶ ସମୟରେ ରୋଗୀ ଡାକ୍ତରଖାନାର ଚଟାଣରେ ଚିକିତ୍ସିତ ହେଉଥିବା ବେଳେ ବିଶେଷଜ୍ଞ ଡାକ୍ତରଙ୍କ ଅଭାବରୁ ରୋଗୀଙ୍କୁ ବୁର୍ଲା ପଠାଇ ଦିଆଯାଉଛି । ଇତି ମଧ୍ୟରେ ରାଜ୍ୟ ସ୍ବାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ ଓ କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ ବୌଦ୍ଧ ଜିଲ୍ଲା ମୁଖ୍ୟ ଡାକ୍ତରଖାନା ସହିତ ନୂତନ ଡାକ୍ତରଖାନାର କୋଠା ପରିଦର୍ଶନ କରି ସ୍ବାସ୍ଥ୍ୟ ବିଭାଗର ସମୀକ୍ଷା କରିଥିଲେ । ଏହାପରେ ମଧ୍ୟ ସ୍ବାସ୍ଥ୍ୟ ସେବାରେ ସୁଧାର ଆସିପାରୁ ନାହିଁ ।

ସେପଟେ ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ବିଭିନ୍ନ ଉପାନ୍ତ ତଥା ଦୁର୍ଗମ ଅଞ୍ଚଳକୁ ଯୋଗାଯୋଗ ବିଚ୍ଛିନ୍ନ ହେତୁ ସେସବୁ ଅଞ୍ଚଳରେ ଆମ୍ବୁଲାନ୍ସ ସେବା ଓ ସ୍ବାସ୍ଥ୍ୟ ସେବା ଆଜି ପର୍ଯ୍ୟନ୍ତ ଠିକରେ ପହଞ୍ଚି ପାରୁ ନଥିବା ଅଭିଯୋଗ ହୋଇଛି । ହରଭଙ୍ଗା ବ୍ଲକର ବଣ ପାହାଡ ଘେରା କଣ୍ଡରା, କାଚପାଜୁ, ଫାଲପାଜୁ, ମାରଡା, ରାଣୀସାହି, ଲେଙ୍ଗେରପାଜୁ, ସୁଲକେଟୀ, ଗେରେଡିସାହି ଭଳି ପ୍ରାୟ ତିରିଶରୁ ଉର୍ଦ୍ଧ୍ବ ଆଦିବାସୀ ଅଧ୍ୟୁଷିତ ଦୁର୍ଗମ ଅଞ୍ଚଳରେ ସ୍ବାସ୍ଥ୍ୟ ସେବା ଅତ୍ୟନ୍ତ ଦୁର୍ବିସହ ହୋଇ ପଡିଥିବା ଅଭିଯୋଗ ହୋଇଛି । ଅଧିକାଂଶ ଗ୍ରାମରେ ଆମ୍ବୁଲାନ୍ସ ସେବା ପହଞ୍ଚି ପାରୁନଥିବାରୁ ରୋଗୀ ବିଶେଷ ଭାବରେ ଗର୍ଭବତୀ ମହିଳାଙ୍କୁ ଭାରରେ ବୋହି ମୁଖ୍ୟ ସଡକକୁ ନେବାକୁ ପଡୁଛି । ଅନେକ ସମୟରେ ଲୋକେ ଚିକିତ୍ସା ଅଭାବରୁ ଆଧୁନିକ ଚିକିତ୍ସା ଉପରେ ନିର୍ଭର ନକରି ବାଧ୍ୟ ହୋଇ ଝଡା ଫୁଙ୍କା ଓ ଗୁଣିଗାରେଡି ଉପରେ ନିର୍ଭର କରୁଛନ୍ତି । ଏଭଳି ଘଟଣାକୁ ଜିଲ୍ଲାର ବରିଷ୍ଠ ସ୍ବାସ୍ଥ୍ୟ ଅଧିକାରୀ ସ୍ବୀକାର କରିଛନ୍ତି ।

ବୁଦ୍ଧିଜୀବୀ ସୂର୍ଯ୍ୟ ନାରାୟଣ ମହାପାତ୍ର କହିଛନ୍ତି, ''ବୌଦ୍ଧରେ ସ୍ବାସ୍ଥ୍ୟ ସେବା ପୁରା ବିପର୍ଯ୍ୟସ୍ତ ହୋଇପଡିଛି । ଡେଙ୍ଗୁ, ଡାଇରିଆ, ମ୍ୟାଲେରିଆ ରୋଗୀ ସଂଖ୍ୟା ବଢିବାରେ ଲାଗିଛି । ସେମାନଙ୍କୁ ଚିକିତ୍ସା କରିବା ପାଇଁ ଏଠାରେ ସ୍ବାସ୍ଥ୍ୟ କର୍ମଚାରୀ, ଡାକ୍ତର ନାହାନ୍ତି । ନାହିଁ ନାହିଁରେ ଡାକ୍ତରଖାନା ଚାଲିଛି । ନୂଆ ଡାକ୍ତରଖାନା କେବେ ହେବ ତାହା ଜଣା ନାହିଁ । ପୁରା ଜିଲ୍ଲାରେ ଡାକ୍ତର ନାହାନ୍ତି । ସରକାରଙ୍କୁ ଅନୁରୋଧ ଡାକ୍ତର ବିଶେଷଜ୍ଞ ପଠାନ୍ତୁ । ''

ଇଟିଭି ଭାରତ, ବୌଦ୍ଧ