ବରଗଡ଼: ବରଗଡ଼ରେ ରାଜରାସ୍ତାରେ ଚାଷୀ ସଙ୍ଗଠନ । ସଂଯୁକ୍ତ କିସାନ ମୋର୍ଚ୍ଚା ର ଆହ୍ବାନ କ୍ରମେ ଆଜି ବରଗଡ଼ ଜୟ କିସାନ ଆନ୍ଦୋଳନ ତରଫରୁ ଏକ ଟ୍ରାକ୍ଟର ଶୋଭାଯାତ୍ରା ଆୟୋଜନ କରାଯାଇଥିଲା । ଜିଲ୍ଲାର ବିଭିନ୍ନ ଗାଁରୁ କୃଷକ ପ୍ରତିନିଧି ମାନେ ବ୍ୟାନର ଓ ପତାକା ବାନ୍ଧି ଶତାଧିକ ଟ୍ରାକ୍ଟର ବୀର ଛକରୁ ବାହାରି ଭଟଲି ଛକ ଓ ଗାନ୍ଧୀ ଛକ ଦେଇ ସହର ପରିକ୍ରମା କରି ସମତା ଭବନ ଠାରେ ସମାପନ କରାଯାଇଥିଲା । ଚାଷୀମାନେ କେନ୍ଦ୍ର ସରକାରଙ୍କ କୃଷି ନୀତି, WTO ର ଚାଷୀ ବିରୋଧୀ ଅଭିମୁଖ୍ୟ ଓ ସ୍ବାମୀନାଥନ କମିଶନ ରିପୋର୍ଟ ଲାଗୁ ନକରିବା ପ୍ରସଙ୍ଗରେ ପ୍ରତିବାଦ କରିଥିଲେ ।
ପଞ୍ଜାବ ଓ ହରିୟାଣା ସୀମାରେ ଟ୍ରାକ୍ଟର ଓ ଜେସିବି ସହ ଡେରା ପକାଇଛନ୍ତି ହଜାର ହଜାର କୃଷକ । ସେମାନଙ୍କ ଉପରେ କେନ୍ଦ୍ର ସରକାର ଦମନଲୀଳା ଚଳାଇବାକୁ ନେଇ ପଶ୍ଚିମ ଓଡିଶା କୃଷକ ସଂଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ ପ୍ରଧାନ ତୀବ୍ର ସମାଲୋଚନା କରିଛନ୍ତି । ଏହି ଟ୍ରାକ୍ଟର ଶୋଭାଯାତ୍ରାରେ ଯୋଗଦେଇ ସେ କହିଛନ୍ତି ଯେ ଭାରତ ସରକାର ବିଶ୍ବ ବାଣିଜ୍ୟ ସଂଗଠନ (ଡବ୍ଲୁ ଟି ଓ)ର ଚାପରେ ସରକାର ଦେଶର ଅନ୍ନଦାତା ମାନଙ୍କୁ ତାଙ୍କ ଅଧିକାରରୁ ବଞ୍ଚିତ କରୁଛି, ଏହାକୁ ବରଦାସ୍ତ କରାଯିବ ନାହିଁ । ସଂଗଠନ ପକ୍ଷରୁ ଜୟ କିସାନ ଆନ୍ଦୋଳନ ଆରମ୍ଭ ସାମିଲ ହୋଇ ଆସିଛି ଏବଂ ଆଗାମୀ ଦିନରେ ସଂଯୁକ୍ତ କିସାନ ମୋର୍ଚ୍ଚା ର ପ୍ରତ୍ୟେକ ଡାକରାକୁ ବରଗଡ଼ରେ କାର୍ଯ୍ୟକାରୀ କରାଯିବ ବୋଲି ସେ କହିଛନ୍ତି ।