ବଲାଙ୍ଗୀର: ଜାରି ରହିଛି ପ୍ରବଳ ଗ୍ରୀଷ୍ମ ପ୍ରବାହ । ବଲାଙ୍ଗୀର ଜିଲ୍ଲାରେ ପାରଦ ଉପର ମୁହାଁ ଥିବାବେଳେ ସ୍ଥିତି ଏବେବି ଅସହ୍ୟ ରହିଛି । ଏହାରି ମଧ୍ୟରେ ଆଜି ପୁଣି ୩ଟି ଅଂଶୁଘାତ ମୃତ୍ୟୁ ଅଭିଯୋଗ ଆସିଛି । ସରକାରୀ ରିପୋର୍ଟ ଅନୁସାରେ ଏଯାଏଁ ଜଣକର ଅଂଶୁଘାତରେ ମୃତ୍ୟୁ ହୋଇଥିବାବେଳେ ଅନ୍ୟ ସବୁ ଅଭିଯୋଗର ତଦନ୍ତ ଜାରି ରହିଛି । ସକାଳୁ ଅସହ୍ୟ ଟାଣ ଖରା ସାଙ୍ଗକୁ ଗରମ ଝାଞ୍ଜି ପବନ ଓ ଗୁଳୁଗୁଳି ସମସ୍ତଙ୍କୁ କଲବଲ କରିଛି । ଜରୁରୀ କାମ ନ ଥିଲେ ଲୋକ ବାହାରକୁ ବାହାରୁ ନାହାଁନ୍ତି । ଅନ୍ୟପଟେ ସକାଳ ୧୦ଟା ପରେ ଏଠାରେ ରାସ୍ତାଘାଟ ସବୁ ଖାଁ ଖାଁ ରହୁଛି । ସେପଟେ ପ୍ରବଳ ଗ୍ରୀଷ୍ମ ପ୍ରବାହ ନେଇ ସତର୍କତା ଜାରି କରିଛି ଜିଲ୍ଲା ପ୍ରଶାସନ । ଲୋକଙ୍କୁ ଡାକ ବାଜି ଯନ୍ତ୍ର ମଧ୍ୟରେ ସଚେତନ ମଧ୍ୟ କରାଯାଉଛି ।
ସେହିପରି ଅଂଶୁଘାତ ଜନିତ ସଂଖ୍ୟା ମଧ୍ୟ ଏଠାରେ ବୃଦ୍ଧିପାଇଛି । ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଡାକ୍ତରଖାନାରେ ଦୈନକ ୧୦ରୁ ଅଧିକ ରୋଗୀ ଭର୍ତ୍ତି ହେଉଛନ୍ତି । ଗତକାଲି (ଗୁରୁବାର) ଏଠାରେ ୩ ଜଣଙ୍କର ଅଂଶୁଘାତରେ ମୃତ୍ୟୁ ହୋଇଥିବାର ଅଭିଯୋଗ ଆସିଥିଲା । ଆଜି ମଧ୍ୟ ୩ ଜଣଙ୍କର ସମାନ କାରଣରୁ ମୃତ୍ୟୁ ହୋଇଥିବାର ତାଙ୍କ ପରିବାର ଲୋକେ ଅଭିଯୋଗ ଆଣିଛନ୍ତି । ମୃତକଙ୍କ ମଧ୍ୟରେ ବଲାଙ୍ଗୀର ଗାନ୍ଧୀନଗରପଡ଼ାର ସୁଦୀପ ସାହୁ ରହିଛନ୍ତି । ଯିଏକି ନିଜ କାମରେ ବାହାରି ଥିବାବେଳେ ସ୍ଥାନୀୟ ହିନ୍ଦୀ ହାଇସ୍କୁଲ ପାଖରେ ଅଚେତ୍ ହୋଇଯାଇଥିଲେ । ପରିବାରଲୋକେ ତାଙ୍କୁ ଡାକ୍ତରଖାନା ନେବା ପରେ ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ସେପଟେ ମୃତକଙ୍କ ସମ୍ପର୍କୀୟ ଅଂଶୁଘାତ ଯୋଗୁଁ ତାଙ୍କର ମୃତ୍ୟୁ ହୋଇଥିବାର ଅଭିଯୋଗ କରିଛନ୍ତି । ସେହିପରି ପାଟଣାଗଡ଼ ଗେର୍ଡା ଗ୍ରାମର ବୃଦ୍ଧା ପଦ୍ମା ବରିହାଙ୍କ ମଧ୍ୟ ଅଂଶୁଘାତରେ ମୃତ୍ୟୁ ହୋଇଥିବାର ଅଭିଯୋଗ ଆସିଛି ।