ହାଇଦ୍ରାବାଦ/ଭୁବନେଶ୍ବର: ଆଜି ଭାରତୀୟ ଜନତା ପାର୍ଟି (ବିଜେପି) 8ମ ପର୍ଯ୍ୟାୟରେ ଓଡିଶାର ଅବଶିଷ୍ଟ 3 ସଂସଦୀୟ ଆସନ ସହ 3 ରାଜ୍ୟ ପଞ୍ଜାବ ଓ ପଶ୍ଚିମବଙ୍ଗ ପାଇଁ ଲୋକସଭା ପ୍ରାର୍ଥୀ ଘୋଷଣା କରିଛି । କଟକ ସଂସଦୀୟ ଆସନରୁ ନିକଟରେ ଦଳରେ ସାମିଲ ହୋଇଥିବା ବରିଷ୍ଠ ରାଜନତା ଭର୍ତ୍ତୃହରି ମହତାବ, କନ୍ଧମାଳରୁ ସୁକାନ୍ତ ପାଣିଗ୍ରାହୀ ଓ ଯାଜପୁରର ଦଳ ଡା.ରବୀନ୍ଦ୍ର ନାରାୟାଣ ବେହେରାଙ୍କୁ ପ୍ରାର୍ଥୀ କରିଛି । ପୂର୍ବ ପର୍ଯ୍ୟାୟରେ ଦଳ ଓଡିଶାରେ 18 ଲୋକସଭା ଆସନରେ ପ୍ରାର୍ଥୀ ଘୋଷଣା କରିଥିଲା । ଅବଶିଷ୍ଟ ଏହି 3 ଆସନରେ ଆଜି ଦଳ ପ୍ରାର୍ଥୀ ଘୋଷଣା କରି ଲୋକସଭା ପ୍ରାର୍ଥୀ ଘୋଷଣା ପ୍ରକ୍ରିୟା ଶେଷ କରିଛି ।
କଟକରେ ଭର୍ତ୍ତୃହରି- ସଂତୃପ୍ତ ଲଢେଇ:-
ଏବେ ସିଲିଭର ସିଟି କଟକରେ ରାଜ୍ୟର ଅନ୍ୟତମ ରୋଚକ ଲଢେଇ ଦେଖିବାକୁ ମିଳିବ । ରାଜ୍ୟରେ ଶାସନରେ ଥିବା ବିଜୁ ଜନତା ଦଳ କର୍ପୋରେଟ କ୍ଷେତ୍ରରୁ ରାଜନୀତିକୁ ଆସିଥିବା ନବାଗତ ସଂତୃପ୍ତ ମିଶ୍ରଙ୍କୁ ସଂସଦୀୟ ପ୍ରାର୍ଥୀ କରିଛି । ଦଳରୁ 6ଥର ସାଂସଦ ନିର୍ବାଚିତ ହୋଇଥିବା ବରିଷ୍ଠ ରାଜନେତା ଭର୍ତ୍ତୃହରି ମହତାବ ତୀବ୍ର ଅସନ୍ତୋଷ ବ୍ୟକ୍ତ କରିବା ସହ ଭାରତୀୟ ଜନତା ପାର୍ଟିରେ ସାମିଲ ହୋଇଥିଲେ । ଆଜି ବିଜେପି ତାଙ୍କୁ ନିଜ ପାରମ୍ପରିକ ଆସନ କଟକରୁ ପ୍ରାର୍ଥୀ କରିଛି । ଏବେ ରାଜନୀତିରେ ବେଶ ଅଭିଜ୍ଞ ଓ ବରିଷ୍ଠ ଭତ୍ତୃହରିଙ୍କ ସହ ନବାଗତ ସଂତୃପ୍ତଙ୍କ ସହ ମୁକାବିଲା ହେବାକୁ ଯାଉଛି ।
କନ୍ଧମାଳରେ ଅଚ୍ୟୁତଙ୍କୁ ଟକ୍କର ଦେବେ ସୁକାନ୍ତ:-
କନ୍ଧମାଳରେ ଆଜି ବିଜେପି ସୁକାନ୍ତ ପାଣିଗ୍ରାହୀଙ୍କୁ ସାଂସଦ ପ୍ରାର୍ଥୀ କରିଥିବା ବେଳେ ପୂର୍ବରୁ ଏହି ଆସନରେ ବିଜେଡି ବର୍ତ୍ତମାନର ସାଂସଦ ତଥା ଚର୍ଚ୍ଚିତ ଶିକ୍ଷାବିତ ଅଚ୍ଯୁତ ସାମନ୍ତଙ୍କୁ ପ୍ରାର୍ଥୀ କରିଛି । ସୁକାନ୍ତ ମଧ୍ୟ ପୂର୍ବରୁ 2014ରେ ଏହି ଆସନରେ ବିଜେପି ପକ୍ଷରୁ ପ୍ରାର୍ଥୀ ଭାବେ ନିର୍ବାଚନ ଲଢି ପରାଜିତ ହୋଇଥିଲେ । 2019ରେ ଏହି ଆସନରେ ବିଜେପି ପକ୍ଷରୁ ବରିଷ୍ଠ ନେତା ଖାରବେଳ ସ୍ବାଇଁ ପ୍ରାର୍ଥୀ ହୋଇଥିଲେ । ଅଚ୍ଯୁତଙ୍କ ସପକ୍ଷରେ ଜନାଦେଶ ଯାଇଥିଲା । ଏବେ ଏହି ଆସନରେ ସୁକାନ୍ତ ବିଜେପି ଟିକେଟରେ ଅଚ୍ଯୁତଙ୍କୁ ମୁକାବିଲା କରିବେ ।