ପୁରୀ:ପୁରୀରେ ଅଟୋ ଚାଳକଙ୍କ ବ୍ୟବସାୟ ଠପ । ଜନଗହଳି ପୂର୍ଣ୍ଣ ସ୍ଥାନରେ ଅଟୋ ରଖିବାକୁ ବାରଣ ପରେ ଏପରି ଅସୁବିଧାର ସମ୍ମୁଖୀନ ହେଉଛନ୍ତି ଅଟୋ ଚାଳକ । ଏହାକୁ ବିରୋଧ କରି ଶନିବାର ବିକ୍ଷୋଭ ପ୍ରଦର୍ଶନ କରିଥିଲେ ଅଟୋ ଚାଳକ ୟୁନିଅନ । ବଡ଼ଦାଣ୍ଡ ସମେତ ପୁରୁଣା ଜେଲ ରୋଡ, ଦିଗବାରେଣି ଖୁଣ୍ଟ ଓ ସମୁଦ୍ର କୂଳ ଅଞ୍ଚଳରେ ଅଟୋ ନ ରଖିବା ପାଇଁ ଜିଲ୍ଲା ପ୍ରଶାସନ କଟକଣା ଲଗାଇଛି । ଅଟୋ ରଖିବା ପାଇଁ ସ୍ଥାନ ଦିଆଯାଉନଥିଵାରୁ ବ୍ୟବସାୟ ସମ୍ପୂର୍ଣ୍ଣ ଠପ୍ ହୋଇ ଯାଇଛି । ଯାହା ଫଳରେ ଋଣ କରି ଅଟୋ ଆଣି ବ୍ୟବସାୟ କରୁଥିବା ଅଟୋ ଚାଳକ ତାଙ୍କର ଜୀବନ ଜୀବିକାକୁ ନେଇ ଚିନ୍ତାରେ ରହିଛନ୍ତି । ପ୍ରଶାସନ ଏ ଦିଗରେ ତୁରନ୍ତ ପଦକ୍ଷେପ ନେବାକୁ ଶ୍ରୀକ୍ଷେତ୍ର ଅଟୋ ଚାଳକ ୟୁନିଅନ ପକ୍ଷରୁ ପୁରୀ ଜିଲ୍ଲାପାଳ ଓ ଏସପିଙ୍କୁ ଦାବିପତ୍ର ପ୍ରଦାନ କରାଯାଇଛି ।
ପୁରୀରେ ଯାତ୍ରୀ ମାନଙ୍କ ପାଇଁ ପ୍ରଶାସନ ବିଭିନ୍ନ ପାର୍କିଂରୁ ବ୍ୟାଟେରୀ ଅଟୋ ଦ୍ଵାରା ଦେୟ ମୁକ୍ତ ପରିବହନ ସେବା ଆରମ୍ଭ କରିଛି । ଏହା ଦ୍ଵାରା ଶହ ଶହ ଅଟୋ ଚାଳକ ମାନେ ରୋଜଗାର ହରାଉଛନ୍ତି । ସେହିପରି ଟାଉନ ବସ ଗୁଡ଼ିକ ବଡ ଦାଣ୍ଡର ମର୍ଚିକୋର୍ଟ ଛକ ପର୍ଯ୍ୟନ୍ତ ଯାଇ ବେପାର କରୁଛନ୍ତି । ଅଥଚ ଅଟୋ ଚାଳକ ମାନଙ୍କୁ ମର୍ଚୀ କୋର୍ଟ ପର୍ଯ୍ୟନ୍ତ ଯିବାକୁ ଅନୁମତି ଦେଉନି ପ୍ରଶାସନ । ଏହା ଦ୍ବାରା ବେପାର ଠପ୍ ହୋଇ ପଡିଥିବା ବେଳେ ଏବେ ଶହ ଶହ ଅଟୋ ଚାଳକ ଭୋକ ଉପାସରେ ଦିନ କାଟୁଛନ୍ତି । ଏହା ବିରୁଦ୍ଧରେ ଶ୍ରୀକ୍ଷେତ୍ର ଅଟୋ ଚାଳକ ୟୁନିଅନ ଜିଲ୍ଲାପାଳ ଓ ଏସପିଙ୍କୁ ଭେଟି ଦାବିପତ୍ର ଦେଇଛି।