ବୌଦ୍ଧ: ହ୍ରାସ ପାଇବାରେ ଲାଗିଛି ବୌଦ୍ଧ ଜିଲ୍ଲାର ଜଙ୍ଗଲ । ଏକଦା ସବୁଜିମାରେ ଭରପୁର ଥିବା ଜଙ୍ଗଲ ବର୍ତ୍ତମାନ କାଠ ମାଫିଆ ଓ ଗଞ୍ଜେଇ ମାଫିଆଙ୍କ ଯୋଗୁଁ ପଦା ହେବାକୁ ବସିଲାଣି । ଏହାର ସିଧାସଳଖ ପ୍ରଭାବ ବନ୍ୟଜନ୍ତୁଙ୍କ ଉପରେ ପଡୁଥିବା ବେଳେ ବନ ବିଭାଗ କୌଣସି କାର୍ଯ୍ୟାନୁଷ୍ଠାନ ନେଉ ନଥିବା ଅଭିଯୋଗ କରାଯାଇଛି । ଏନେଇ ଜନସାଧାରଣ ସିଧାସଳଖ ବନଖଣ୍ଡ ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି । ଏହି ଘଟଣାର ସିବିଆଇ ତଦନ୍ତ ପାଇଁ ମଧ୍ୟ ଦାବି କରିଛନ୍ତି ଅଞ୍ଚଳବାସୀ । ତେବେ ଏହି ବାବଦରେ ଏକ ଦାବିପତ୍ର ମଧ୍ୟ ପ୍ରଦାନ କରାଯାଇଛି ।
ବୌଦ୍ଧ ଜିଲ୍ଲାର ବିଭିନ୍ନ ଜଙ୍ଗଲ ଅଞ୍ଚଳରେ ଚାଲିଛି ମାଫିଆଙ୍କ ରାଜୁତି । ଜିଲ୍ଲାର ବିଭିନ୍ନ ଜଙ୍ଗଲ ସଫାକରି ସେଠାରେ ବେଆଇନ ଗଞ୍ଜେଇ ଚାଷ ହେଉଥିବା ବେଳେ ପ୍ରତ୍ୟେକ ଦିନ ମୂଲ୍ୟବାନ ଗଛକୁ କାଟି ନେଉଛନ୍ତି ମାଫିଆ । ଏପରିକି ଏସବୁ ଅନୈତିକ କାର୍ଯ୍ୟକଳାପରେ ଖୋଦ ବନଖଣ୍ଡ ଅଧିକାରୀଙ୍କ ସମ୍ପୃକ୍ତି ଥିବା ଅଭିଯୋଗ କରି ବିଭିନ୍ନ ସଂଗଠନ ପକ୍ଷରୁ ଏହାର ଉଚ୍ଚସ୍ତରୀୟ ତଦନ୍ତ ଦାବି କରାଯାଇଛି । ଏକଦା ଜଙ୍ଗଲ ସମ୍ପଦରେ ଭରପୁର ଥିବା ଜିଲ୍ଲାର ବିଭିନ୍ନ ଜଙ୍ଗଲ ବର୍ତ୍ତମାନ ମାଫିଆଙ୍କ କବଳରେ ରହିଛି । ବୌଦ୍ଧ ଜିଲ୍ଲାର ପାଞ୍ଚଟି ବନାଞ୍ଚଳର ବିଭିନ୍ନ ଜଙ୍ଗଲ ଅଞ୍ଚଳରେ କାଠ ଓ ଗଞ୍ଜେଇ ମାଫିଆମାନେ ସକ୍ରିୟ ହୋଇ ଉଠିଥିବା ବେଳେ ଜଙ୍ଗଲ ସୁରକ୍ଷା ଦାୟିତ୍ବରେ ଥିବା କର୍ମଚାରୀଙ୍କ ଅଧିକାଂଶ ସମୟରେ ବିଭିନ୍ନ ଆଳ ଦେଖାଇ ଜଙ୍ଗଲ ଅଞ୍ଚଳକୁ ଆଦୌ ଯାଉନଥିବା ଅଭିଯୋଗ ହୋଇଛି । ବୌଦ୍ଧ ଜିଲ୍ଲାର ବୌଦ୍ଧ ବନାଞ୍ଚଳ ସମେତ ମନମୁଣ୍ଡା ଓ କଣ୍ଟାମାଳ ବନାଞ୍ଚଳର ବିଭିନ୍ନ ଜଙ୍ଗଲ ଅଞ୍ଚଳରେ ହଜାର ହଜାର ଏକର ଜଙ୍ଗଲକୁ ମାଫିଆ ମାନେ ସଫା କରି ସେଠାରେ ବେଆଇନ ଗଞ୍ଜେଇ ଚାଷ କରୁଥିବା ଅଭିଯୋଗ କରାଯାଉଛି ।