ଭୁବନେଶ୍ବର: ନିର୍ବାଚନକୁ ଆଉ ଦିନ କେଇଟା ବାକି । ତିନି ପ୍ରମୁଖ ରାଜନୈତିକ ଦଳ ନିର୍ବାଚନୀ ରଣନୀତି ପ୍ରସ୍ତୁତ କରିବାରେ ବ୍ୟସ୍ତ । କିନ୍ତୁ ବିଭିନ୍ନ ଦଳ ପାଇଁ ଏବେ ଚିନ୍ତାର ବିଷୟ ପାଲଟିଛି ଦଳ ଡିଆଁ ରାଜନୀତି । ଏଥର ଦଳ ଡିଆଁ ପର୍ବରେ ଶାସକ ବିଜେଡି ବେଶୀ କ୍ଷତିରେ ରହିଥିବାବେଳେ ଲାଭରେ ରହିଛି ବିରୋଧୀ ବିଜେପି । କାରଣ ବିଜେଡିର ଅନେକ ପୁରୁଣା ନେତା ଏବେ ଦଳ ଛାଡୁଛନ୍ତି । ଯାହା ବିଜେଡି ପାଇଁ ଭୁସ୍ଖଳନ ପ୍ରକ୍ରିୟା ଆରମ୍ଭ ହୋଇଛି ବୋଲି କହିଛନ୍ତି ରାଜନୈତିକ ସମୀକ୍ଷକ ଅକ୍ଷୟ ସାହୁ ।
ଅକ୍ଷୟ କହିଛନ୍ତି, "ବିଜେଡି ଯେତେବେଳେ 1997 ମସିହାରେ ଗଠନ ହୋଇଥିଲା ସେତେବେଳେ ଅନେକ ନେତା ଯେଉଁମାନେ ବିଜେଡିର ପରିକଳ୍ପନା କରିଥିଲେ ସେମାନେ ଗୋଟିଏ ରାଜନୈତିକ ଧାରାରୁ ଆସିଥିଲେ । ସେମାନେ ଦଳ ଗଠନ କରି ନବୀନ ପଟ୍ଟନାୟକଙ୍କୁ ମୁଖ୍ୟମନ୍ତ୍ରୀ କରାଇଲେ । ତା' ପରେ ସେହି ରାଜନୈତିକ ବ୍ୟକ୍ତିତ୍ବମାନଙ୍କୁ ନବୀନ ସାଇଡ୍ କରିବାକୁ ଲାଗିଲେ । ସେକେଣ୍ଡ ଜେନେରେସନ ନେତା ଆଗକୁ ଆସିଲେ । ତା' ପରେ ସେହି ନେତାଙ୍କୁ ବଦଳାଇ ତୃତୀୟ ଜେନେରେସନ ପଲିଟିସିଆନ ଆଣିଲେ ନବୀନ । ଦ୍ବିତୀୟ ଜେନେରେସନର ଯେଉଁ ପଲିଟିସିଆନ ଥିଲେ ସେମାନେ ନବୀନଙ୍କ ପରାମର୍ଶଦାତା ପ୍ୟାରୀମୋହନଙ୍କ ଦ୍ବାରା ପ୍ରମୋଟ ହୋଇଥିଲେ । ଏବଂ ସେମାନଙ୍କୁ ସାଇଡଲାଇନ କରିବା ପରେ ପ୍ରଣବ ପ୍ରକାଶ ଦାସଙ୍କ ପରି ରାଜନେତାମାନେ ଆସିଲେ । ଯେଉଁମାନେ ପ୍ରଶାସନିକ ପ୍ରକ୍ରିୟାରେ ଭାଗିଦାର ହେଲେ । ଏବେ ଗୋଟିଏ ନୂଆ ଗୋଷ୍ଠୀ ତିଆରି କରାଯାଉଛି ଯାହାର ନେତୃତ୍ବ ନେଉଛନ୍ତି ଭିକେ ପାଣ୍ଡିଆନ । ପୁରୁଣା ନେତାମାନେ ଏବେ ନିଜକୁ ସୁରକ୍ଷିତ ମଣୁନାହାନ୍ତି । ନୂଆ ଗୋଷ୍ଠୀ ନେତାଙ୍କ ସହିତ ଏହି ପୁରୁଣା ନେତାମାନେ ଖାପ ଖୁଆଇ ଚଳିପାରୁନାହାନ୍ତି । ଯାହା ଫଳରେ ସେମାନେ ଦଳ ଛାଡି ବିଜେପି କିମ୍ବା କଂଗ୍ରେସ ମୁହାଁ ହୋଇଛନ୍ତି ।"