ପାଦ ଦେଖି ଜାଣିପାରିବେ ଆପଣ ସୁସ୍ଥ କି ଅସୁସ୍ଥ । ଆଜ୍ଞା ହଁ ! କାରଣ ଏମିତି କିଛି ରୋଗ ଅଛି, ଯାହାର ଲକ୍ଷଣ ପାଦରୁ ଜଣାପଡିଥାଏ । ଆମେ ସାଧାରଣତଃ ନିଜ ଶରୀର, ଓଜନ ଓ ତ୍ବଚାରେ ହେଉଥିବା ପରିବର୍ତ୍ତନ ଦେଖି ସ୍ବାସ୍ଥ୍ୟ ସମସ୍ୟାର ଅନୁମାନ କରିଥାଉ । ହେଲେ ପାଦ ଉପରେ ଧ୍ୟାନ ଦେଇନଥାଉ । କିନ୍ତୁ ପାଦର ଚର୍ମ, ନଖ ଓ ଶିରା ମଧ୍ୟ ଶରୀରରେ ହେଉଥିବା କିଛି ରୋଗର ସଙ୍କେତ ଦେଇପାରେ । ଚାଲନ୍ତୁ ଜାଣିବା ପାଦରେ କେଉଁ ପରିବର୍ତ୍ତନ କେଉଁ ରୋଗର ସଙ୍କେତ ହୋଇଥାଏ ।
ପାଦ ଓ ସ୍ବାସ୍ଥ୍ୟ ମଧ୍ୟରେ ସମ୍ପର୍କ:
ମୁମ୍ବାଇ ସ୍ଥିତ ଆରୋଗ୍ୟଧାମ ଆୟୁର୍ବେଦିକ ଚିକିତ୍ସାଳୟର ଚିକିତ୍ସକ ଡଃ ମନୀଷା କାଲେ କହିଛନ୍ତି, ପାଦରେ ଯନ୍ତ୍ରଣା, ଜଳାପୋଡା, କୁଣ୍ଡେଇ ହେବା, ଫୁଲିବା, ନଖ ଓ ଶିରାର ରଙ୍ଗ ବଦଳିବା ବେଳେବେଳେ ଶରୀରର ଘଟୁଥିବା ଅନେକ ଜଟିଳ ସ୍ବାସ୍ଥ୍ୟ ସମସ୍ୟା ସହ ଜଡିତ ହୋଇଥାଏ । କେବଳ ଆୟୁର୍ବେଦରେ ନୁହେଁ, ବରଂ ପ୍ରାୟ ସବୁ ଚିକିତ୍ସା ବିଧିରେ ଏହି ସଙ୍କେତକୁ ଶରୀରର ବିଭିନ୍ନ ଅଙ୍ଗ ସହ ଜଡିତ ରୋଗର ଲକ୍ଷଣ ଭାବେ ଗଣାଯାଏ ।
ଏହି ରୋଗଗୁଡିକ ଆମର କିଡନୀ, ହାଡ, ପାଚନ ତନ୍ତ୍ର, ହୃଦୟ ଏବଂ ସ୍ନାୟୁ ସମ୍ବନ୍ଧୀୟ ସମସ୍ୟାର ସଙ୍କେତ ଦେଇପାରେ । ଏମିତିକି ପାଦ ସହ ଜଡିତ କିଛି ସମସ୍ୟା ଡାଇବେଟିସର ଲକ୍ଷଣ ଭାବରେ ବିଚାର କରାଯାଏ । ଚିକିତ୍ସକ କହିଛନ୍ତି ଯେ, ଯେଉଁ ଲୋକଙ୍କ ପାଦ କିମ୍ବା ପାଦ ତଳ ଲଗାତାର ପୋଡାଜଳା, ଯନ୍ତ୍ରଣା ହେବା, ଫୁଲିବା, ଶିରା ପ୍ରଶିରାରେ ସମସ୍ୟା ଦେଖାଯାଏ, ସେମାନେ ସଙ୍ଗେ ସଙ୍ଗେ ଡାକ୍ତରଙ୍କ ପରାମର୍ଶ ନେବା ଜରୁରୀ ।
ପାଦ ସହ ଜଡିତ ସମସ୍ୟା ଓ ଲକ୍ଷଣ:
ବିଶେଷଜ୍ଞଙ୍କ ଅନୁସାରେ, ପାଦ ସହ ଜଡିତ କିଛି ଲକ୍ଷଣ ଯାହା ରୋଗ ବା ସ୍ବାସ୍ଥ୍ୟ ସମସ୍ୟାର ସଙ୍କେତ ଦେଇପାରେ, ସେଗୁଡିକ ହେଲା-
ପାଦ ଫୁଲିବା:ଯଦି ବାରମ୍ବାର ଆପଣଙ୍କ ପାଦ ଫୁଲୁଛି, ତାହେଲେ ହାର୍ଟ, କିଡନୀ କିମ୍ବା ଲିଭରରେ କୌଣସି ସମସ୍ୟା ହୋଇପାରେ ।
ନଖ ହଳଦିଆ ଓ ନୀଳ ପଡିବା: ପାଦ ନଖର ରଙ୍ଗ ବଦଳିବା ଫୁସଫୁସ ଓ ରକ୍ତଅଭାବ ସହ ଜଡିତ ସମସ୍ୟାର ଲକ୍ଷଣ ହୋଇପାରେ ।
ପାଦରେ ପୋଡାଜଳା ଓ କୁଣ୍ଡେଇହେବା:ଅନେକ ଲୋକଙ୍କ ପାଦ ବାରମ୍ବାର କୁଣ୍ଡେଇ ହେବା ଓ ପୋଡାଜଳା କରୁଥିବା ଦେଖାଯାଏ । ଏହି ସଙ୍କେତ ଡାଇବେଟିସ କିମ୍ବା ସ୍ନାୟୁ ପ୍ରଣାଳୀରେ ସମସ୍ୟାର ଲକ୍ଷଣ ଭାବେ ଦେଖାଯାଏ ।
ମୋଟା ନଖ: ନଖ ମୋଟା ହେବା ଫଙ୍ଗଲ ସଂକ୍ରମଣର ଲକ୍ଷଣ ହୋଇପାରେ । ହେଲେ କେତେକ କ୍ଷେତ୍ରରେ ଏହା ଥାଇରଏଡ ସମସ୍ୟା ସହିତ ମଧ୍ୟ ଜଡିତ ଥାଏ ।
କିପରି ସୁସ୍ଥ ରହିବେ ?
ବିଶେଷଜ୍ଞଙ୍କ ଅନୁସାରେ, କିଛି ବିଷୟ ପ୍ରତି ଧ୍ୟାନ ଦେଇ ଓ ସତର୍କତା ପାଳନ କରି ଏହି ସଙ୍କେତଗୁଡିକୁ ନିୟନ୍ତ୍ରଣ କରାଯିବା ସହ ଏହା ଜନିତ ସମସ୍ୟା ରୋକାଯାଇପାରିବ ।
- ସ୍ବାସ୍ଥ୍ୟକର ଆହାର ଓ ନିୟମିତ ବ୍ୟାୟାମ କରିବା ଦ୍ବାରା ପାଦ ସମସ୍ୟା କମ୍ କରାଯାଇପାରେ ।
- ସ୍ବାସ୍ଥ୍ୟକର ଖାଦ୍ୟ ଖାଇଲେ ମୋଟାପା ଓ କେତେକ ରୋଗ ଆଶଙ୍କା କମିଥାଏ । ସେହିପରି ନିୟମିତ ବ୍ୟାୟାମ ଶରୀରରେ ରକ୍ତ ସଞ୍ଚାଳନ ଠିକ୍ ରଖେ ।
- ସବୁବେଳେ ପାଦକୁ ସଫାସୁତୁରା ରଖିବା ଉଚିତ୍ । ଏହାଦ୍ବାରା ନଖ ଓ ଚର୍ମରେ ଫଙ୍ଗଲ କିମ୍ବା ଅନ୍ୟାନ୍ୟ ସଂକ୍ରମଣ ଆଶଙ୍କା କମିଥାଏ ।
- ପାଦ ଫୁଲିବା ଓ ଯନ୍ତ୍ରଣାରୁ ମୁକ୍ତି ପାଇଁ ସବୁବେଳେ ଠିକ୍ ଆକାରର ଆରାମଦାୟକ ଚପଲ ପିନ୍ଧନ୍ତୁ । ଏଥିରେ ପାଦରେ ରକ୍ତ ପ୍ରବାହ ଠିକ୍ ହୁଏ ।
- ଧୂମ୍ରପାନ ରକ୍ତ ଶିରାଗୁଡିକୁ ଦୁର୍ବଳ କରିଦିଏ । ଏହାଦ୍ବାରା ପାଦ ସହ ଜଡିତ ସମସ୍ୟା ବଢିପାରେ ।
ଯଦି ପାଦରେ ଅସ୍ବାଭାବିକ ପରିବର୍ତ୍ତନ ହେଉଛି ଅର୍ଥାତ୍ ଶିରାଗୁଡିକର ରଙ୍ଗ ଗାଢ ହେବା ଓ ସ୍ପଷ୍ଟ ଦେଖାଯିବା, ଲଗାତାର ଫୁଲିବା, ପୋଡାଜଳା କରିବା, ଯନ୍ତ୍ରଣା ହେବା ଇତ୍ୟାଦି ତେବେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ । କୌଣସି ବି ସମସ୍ୟା କିମ୍ବା ଲକ୍ଷଣଗୁଡିକ ଅଣଦେଖା କରିବା ଗମ୍ଭୀର ରୋଗର କାରଣ ହୋଇପାରେ ।
ଏହା ମଧ୍ୟ ପଢନ୍ତୁ:ବିନା ମେଡିସିନରେ କମିପାରିବ ଡାଇବେଟିସ, ବାସ୍ କରନ୍ତୁ ଏହି କାମ
ଏହା ମଧ୍ୟ ପଢନ୍ତୁ:ଶୀତ ଦିନେ ରୁପି ସମସ୍ୟା କରନ୍ତୁ ଦୂର, ଆପଣାନ୍ତୁ ଏହି 5 ଘରୋଇ ଉପଚାର
ଏହା ମଧ୍ୟ ପଢନ୍ତୁ:ହିଟର ରଡ୍ରେ କରୁଛନ୍ତି କି ପାଣି ଗରମ ? ସ୍ବିଚ ଅନ୍ କରିବା ପୂର୍ବରୁ ଜାଣନ୍ତୁ ଏହି ଜରୁରୀ କଥା
