ମୁମ୍ବାଇ: ନିର୍ଦ୍ଦେଶକ ରୋହିତ ଶେଟ୍ଟୀଙ୍କ ବହୁ ପ୍ରତୀକ୍ଷିତ ଫିଲ୍ମ "ସିଂଘମ ଏଗେନ"କୁ ଚଳଚ୍ଚିତ୍ରପ୍ରେମୀ ଅପେକ୍ଷାର ସହ ଚାହିଁ ରହିଛନ୍ତି । ଏହି ଚଳଚ୍ଚିତ୍ରରେ ଅଜୟ ଦେବଗନଙ୍କ ସହ ରଣବୀର ସିଂ, କରୀନା କପୁର ଖାନ, ଟାଇଗର ଶ୍ରଫ ଏବଂ ଦୀପିକା ପାଦୁକୋନଙ୍କ ଭଳି ଅନେକ ନାମୀଦାମୀ କଳାକାରଙ୍କୁ ଦେଖିବାକୁ ମିଳିବ । ତେବେ କିଛି ସମୟ ପୂର୍ବରୁ, ଫିଲ୍ମର ନିର୍ଦ୍ଦେଶକ ମାଆ ହେବାକୁ ଯାଉଥିବା ଦୀପିକା ପାଦୁକୋନଙ୍କ ଲାଟେଷ୍ଟ ଫଟୋ ସୋସିଆଲ ମିଡିଆରେ ପୋଷ୍ଟ କରିଛନ୍ତି । ଯାହା ସୋସିଆଲ ମିଡିଆରେ ଛାଇଯାଇଛି ।
ଆଜି (ଶୁକ୍ରବାର) ଏପ୍ରିଲ 19ରେ ବଲଉଡ ଫିଲ୍ମ ନିର୍ଦ୍ଦେଶକ ରୋହିତ ଶେଟ୍ଟୀ ନିଜର ଅଫିସିଆଲ ଇନଷ୍ଟାଗ୍ରାମ ଆକାଉଣ୍ଟରେ ଦୀପିକା ପାଦୁକୋନଙ୍କ ଏକ ଲାଟେଷ୍ଟ ଫଟୋ ପୋଷ୍ଟ କରିଛନ୍ତି । ଏହାସହ ଏଥିରେ କ୍ୟାପସନରେ ଲେଖିଛନ୍ତି, 'ମୋ ହିରୋ, ରିଲରେ ଏବଂ ରିୟଲରେ ଲେଡି ସିଙ୍ଗହମ୍ @ଦୀପିକା ପାଦୁକୋନ୍ '। ରୋହିତ ସେୟାର କରିଥିବା ଏହି ଫଟୋରେ ଅଭିନେତ୍ରୀ ଦୀପିକା ପାଦୁକୋନଙ୍କୁ ପୋଲିସ ୟୁନିଫର୍ମରେ ଥିବାର ଦେଖିବାକୁ ମିଳିଛି । ଏହାସହ ଷ୍ଟାଇଲିସ୍ ଚଷମା ପିନ୍ଧିଥିବା ଲୁକରେ ଅଛନ୍ତି ଦୀପିକା । ଭାଇବ୍ରାଣ୍ଟ ବ୍ୟାକଗ୍ରାଉଣ୍ଡ ସହ ଖାକି ୟୁନିଫର୍ମରେ ଦୀପିକାଙ୍କ ଲୁକ୍ ଖୁବ୍ ଆକର୍ଷଣୀୟ ଦେଖାଯାଉଛି । ରୋହିତ ସେୟାର କରିଥିବା ଏହି ଫଟୋରେ ଦୀପିକା ପାଦୁକୋନଙ୍କୁ ଅଜୟ ଦେବଗନଙ୍କ 'ସିଂଘମ' ଷ୍ଟେପ୍ ସହିତ ଦେଖିବାକୁ ମିଳୁଛି । ଯାହା ଫ୍ୟାନମାନଙ୍କୁ ଖୁବ ପସନ୍ଦ ଆସିଛି ।