ପାଟନା:ଦେଶରେ ବାରମ୍ବାର ରେଳ ଦୁର୍ଘଟଣା ଘଟିବାରେ ଲାଗିଛି । ଗତକାଲି ତାମିଲନାଡୁରେ ହୋଇଥିବା ରେଳ ଦୁର୍ଘଟଣା ପୁଣି ଥରେ ରେଳବାଇର ବୈଷୟିକ ପାରଦର୍ଶିତା ଓ ରେଳଯାତ୍ରୀଙ୍କୁ ସୁରକ୍ଷା ନେଇ ପ୍ରଶ୍ନ ସୃଷ୍ଟି କରିଛି । ବାରମ୍ବାର ଦୁର୍ଘଟଣାକୁ ସାରା ଦେଶରେ ରେଳଯାତ୍ରୀଙ୍କ ମଧ୍ୟରେ ଭୟର ବାତାବରଣ ଦେଖାଯାଇଛି । ସିଗ୍ନାଲିଂ ସିଷ୍ଟମରେ ତ୍ରୁଟି ପାଇଁ ବାରମ୍ବାର ରେଳ ଦୁର୍ଘଟଣା ଘଟୁଥିବା ଦେଖିବାକୁ ମିଳିଛି । ଗତବର୍ଷ ବାହାନଗାରେ ହୋଇଥିବା ଭୟଙ୍କର ରେଳ ଦୁର୍ଘଟଣାରେ ପ୍ରାୟ 3ଶହ ଯାତ୍ରୀଙ୍କ ପ୍ରାଣହାନୀ ହୋଇଥିଲା । ଏବେ ଏହି ଘଟଣାକୁ ନେଇ ରେଳ ବିଭାଗର କାର୍ଯ୍ୟଶୈଳୀ ସନ୍ଦେହରେ ଥିଲା ବେଳେ ଏହି ପ୍ରସଙ୍ଗରେ ଜଣେ କେନ୍ଦ୍ରମନ୍ତ୍ରୀଙ୍କ ବିବାଦୀୟ ତଥା ଅସମ୍ବେଦନଶୀଳ ମନ୍ତବ୍ୟ ଏବେ ଚର୍ଚ୍ଚା ସୃଷ୍ଟି କରିଛି । ‘ରେଳ ଦୁର୍ଘଟଣା ହୁଏ’ ବୋଲି କହି ଅଘଟଣକୁ ଅତି ହାଲୁକାରେ ନେଇଛନ୍ତି କେନ୍ଦ୍ର ମନ୍ତ୍ରୀ ।
- ଅସମ୍ବେଦନଶୀଳ ମନ୍ତବ୍ୟ ଦେଲେ କେନ୍ଦ୍ରମନ୍ତ୍ରୀ ଲଲନ ସିଂ
ଗତକାଲି ବିହାରର ଏକ କାର୍ଯ୍ୟକ୍ରମ ଅବସରରେ କେନ୍ଦ୍ର ମତ୍ସ୍ୟ, ପଶୁପାଳନ ମନ୍ତ୍ରୀ ତଥା ଜେଡିୟୁର ବରିଷ୍ଠ ନେତା ଲଲନ ସିଂଙ୍କୁ ଗଣମାଧ୍ୟମ ଦେଶରେ ହୋଇଥିବା ବାରମ୍ବାର ରେଳ ଦୁର୍ଘଟଣା ଘଟୁଥିବା ସମ୍ପର୍କରେ ପ୍ରଶ୍ନ କରିଥିଲେ । ଏଥିରେ କେନ୍ଦ୍ରମନ୍ତ୍ରୀ ଲଲନ ଅତି ହାଲୁକା ଭାବରେ ଓ ଅସମ୍ବେଦନଶୀଳ ଭାବରେ ମନ୍ତବ୍ୟ ରଖିଥିଲେ । ସାମ୍ବାଦିକଙ୍କ ପ୍ରଶ୍ନରେ ମନ୍ତ୍ରୀ କହିଥିଲେ‘‘ ଆରେ ହୋତେ ରୈହେତା ହୈ ଟ୍ରେନ ଆକ୍ସିଡେଣ୍ଟ ।’’ କେନ୍ଦ୍ରମନ୍ତ୍ରୀଙ୍କ ଏହି ବୟାନକୁ ବିରୋଧୀ ନାପସନ୍ଦ କରିଛନ୍ତି । ବିଭିନ୍ନ ମହଲରେ ଏହାକୁ ସମାଲୋଚନା କରାଯାଉଛି ।